នៅថ្ងៃទី៦ កុម្ភៈខាងមុខនេះ ប្រជាពលរដ្ឋនៅភូមិបង្កោង បានកំណត់ធ្វើពិធីរកត្រីរួមគ្នានៅបឹងបុរាណ ទៅតាមទម្លាប់
សៀមរាប ៖ នៅសល់តែ៥ថ្ងៃទៀតប៉ុណ្ណោះ ប្រជាពលរដ្ឋនៅក្នុងភូមិបង្កោង ឃុំអំពិល ស្រុកប្រាសាទ បាគង ខេត្តសៀមរាប នឹងរៀបចំពិធីរកត្រីរួមគា្នក្នុងបឹងអភិរក្ស ទៅតាមទំនៀម ទម្លាប់របស់អ្នកភូមិ ដែលពិធីនេះគេធ្វើជារៀង រាល់ឆ្នាំមិន ដែលខកខាន ដើម្បីចាប់ត្រីមកទុក សម្រាប់ប្រារព្ធពិធីឡើងមាឃ ឬឡើងអ្នកតា។
លោក ពេជ្រ ឃិន មេភូមិបង្កោង បានឱ្យដឹងនៅព្រឹកថ្ងៃ៤រោចខែមាឃឆ្នាំជូតទោស័ក ព.ស. ២៥៦៤ ត្រូវនឹងថ្ងៃចន្ទទី០១ ខែកុម្ភៈឆ្នាំ២០២១នេះថា សម្រាប់ពិធីរកត្រីឆ្នាំនេះ គឺអ្នកភូមិបាន ឯក ភាពគ្នាកំណត់យក ថ្ងៃទី ០៦ ខែកុម្ភៈ ឆ្នាំ២០២១ ដើម្បីចុះចាប់ត្រីនៅក្នុងបឹងដែលបានអភិរក្ស ។ ប៉ុន្តែប្រជាពលរដ្ឋដែលអាចចុះចាប់ត្រីនៅក្នុងបឹងនេះ គឺបានសម្រាប់តែអ្នកភូមិបង្កោង ខេត្ដសៀមរាប តែ ប៉ុណ្ណោះ សម្រាប់អ្នកភូមិផ្សេងមិនត្រូវបានអនុញ្ញាតឱ្យចុះចាប់នោះទេ។
លោក ពេជ្រ ឃិន បានបញ្ជាក់ថា ក្រោយពីប្រកួកប្រកាសឱ្យនេសាទ អ្នកភូមិបានត្រៀមនូវឧបករណ៍សម្រាប់នេសាទបែបបុរាណមានសំណាញ់ ឈ្នាង អង្រុត ដោយមិនអនុញ្ញាតឱ្យប្រើប្រាស់ឧបករណ៍ឆក់នោះទេ។ កម្មវិធីនេសាទត្រីនេះ នឹងចាប់ផ្តើមនៅវេលាម៉ោង៧ព្រឹក ដោយមានគណៈ កម្មការចាំប្រកាសមេក្រូ និងបាញ់កាំជ្រួញជាសញ្ញា។ លោកបន្ថែមថា អ្នកភូមិដែលមកនេសាទទាំងអស់នោះ មិនផ្តោតតែលើរកត្រីមួយមុខនោះដែរ គឺមកជួបជុំសប្បាយ រីករាយ និងមានសាមគ្គីភាពកាន់តែស្និទ្ធស្នាលរវាងប្រជាជននៅក្នុងភូមិថែមទៀតផង។
សូមបញ្ជាក់ថា តំបន់រមណីយដ្ឋានអង្គរ ជាតំបន់បេតិកភណ្ឌរស់ដែលសម្បូរទៅ ដោយមរតកអរូបីជាច្រើន ហើយត្រូវបានអ្នករស់នៅក្នុងតំបន់អង្គរបន្តប្រតិបត្តិយ៉ាងខ្ជាប់ខ្ជួនរហូតមកដល់បច្ចុប្បន្ន។ ពិធីបុណ្យឡើងមាឃឬបុណ្យឡើងអ្នកតាក៏ជាទំនៀមទម្លាប់ប្រពៃណីមួយក្នុងចំណោមបេតិកភណ្ឌអរូបីជាច្រើន ប្រតិបត្តិដោយអ្នករស់នៅតំបន់អង្គរ៕ សំរិត
