កម្ពុជាដាក់ឲ្យប្រើប្រាស់ QR Code «Stop COVID» ដើម្បីតាមដានមនុស្សនៅកន្លែងចេញចូលច្រើន
ដើម្បីបង្កើនប្រសិទ្ធភាព និងល្បឿននៃការទប់ស្កាត់ការឆ្លងរាលដាលជំងឺកូវីដ-១៩(COVID-19) លោក ម៉ម ប៊ុនហេង រដ្ឋមន្ត្រីសុខាភិបាល បានដាក់ឱ្យប្រើប្រាស់នូវប្រព័ន្ធស្កេនQR Code«ទប់ស្កាត់កូវីដ ឬ Stop Covid» នៅទីកន្លែងមួយចំនួនដែលមានមនុស្សចេញ-ចូលច្រើន
បើតាមសេចក្តីប្រកាសព័ត៌មានរបស់លោកម៉ម ប៊ុនហេង នារសៀសថ្ងៃទី២០កុម្ភៈ ទីតាំងកន្លែងដែលត្រូវដាក់QR Code«ទប់ស្កាត់កូវីដ ឬ Stop Covid» នោះមានកន្លែងចេញ-ចូលសណ្ឋាគារ, ផ្ទះសំណាក់ ,ភោជនីយដ្ឋាន, អាហារដ្ឋាន, អាគារស្នាក់នៅរួម(ខុនដូ), ក្រុមហ៊ុន, រោងចក្រ និងសហគ្រាស ជាដើម។
បើតាមរដ្ឋមន្ត្រីក្រសួងសុខាភិបាលនិងជាប្រធានគណៈកម្មការអន្តរក្រសួងប្រយុទ្ធនឹងជំងឺកូវីដ-១៩ ប្រព័ន្ធស្កេនQR Codeនេះ នឹងកក់ត្រាទុកទីតាំងរបស់បុគ្គលដែលបានចេញ-ចូល និងផ្តល់ភាពងាយស្រួលក្នុងការស្វែងរកអ្នកដែលបានជាប់ពាក់ព័ន្ធឬប៉ះពាល់ ប្រសិនបើទីតាំងនោះរកឃើញវិជ្ជាមានកូវីដ-១៩។ លោក បានបញ្ជាក់ថា ប្រព័ន្ធនេះ គឺមិនតាមដានឯកជនភាពរបស់បុគ្គលឡើយ។
ជាមួយគ្នានេះ គណៈកម្មការអន្តរក្រសួងប្រយុទ្ធនឹងជំងឺកូវីដ-១៩ ស្នើឱ្យម្ចាស់ភោជនីដ្ឋាន និងម្ចាស់ទីតាំងដែលបានរៀបរាប់ខាងលើ ឱ្យប្រើប្រាស់នូវប្រព័ន្ធស្កេនQR Code«ទប់ស្កាត់កូវីដ ឬ Stop Covid»។ ដើម្បីទទួលបាន QR Codeនេះ យកទៅប្រើប្រាស់ម្ចាស់ទីតាំងដែលមានមនុស្សចេញ-ចូលច្រើនទាំងអស់ សូមចូលទៅកាន់គេហទំព័រ stopcovid.gov.kh រួចហើយចុចលើពាក្យ«ស្នើសុំQR Code»។ បន្ទាប់មក សូមបំពេញព័ត៌មាន រួចចុចលើពាក្យស្នើសុំQR Code និង Download ដើម្បីបានQR Code មួយសន្លឹក យកទៅព្រីន និងបិទនៅមុខទីកន្លែងចេញ-ចូលរបស់លោកអ្នក។ ការប្រើប្រាស់ប្រព័ន្ធនេះ មិនតម្រូវឱ្យចំណាយអ្វីឡើយ។
គណៈកម្មការអន្តរក្រសួងប្រយុទ្ធនឹងជំងឺកូវីដ-១៩ អំពាវនាវដល់សាធារណជនទាំងអស់ចូលរួមប្រើប្រាស់ប្រព័ន្ធQR Code នេះ ដើម្បីបង្ការសុខភាព និងចូលរួមទប់ស្កាត់ការរាតត្បាតជំងឺកូវីដ-១៩។ សម្រាប់ព័ត៌មានបច្ចេកទេសពាក់ព័ន្ធនឹងការប្រើនប្រាស់ប្រព័ន្ធស្កេនQR Code នេះ សាធារណជនអាចទាក់ទងទៅមជ្ឈមណ្ឌលទំនាក់ទំនងបឋមនៃក្រសួងប្រៃសណីយ៍ និងទូរគមនាគមន៍ តាមរយៈលេខកូដខ្លី ១២៣ ឬ ០៩៩ ៨៨៨ ៥១៦/ ០១២ ៩៧៩ ០៧៩ ដោយឥតគិតថ្លៃ៕
