ប្រទះឃើញបុរសម្នាក់លង់ទឹកស្លាប់ នៅភូមិកោះប្រាក់.កៀនស្វាយ
កណ្ដាល៖លោកព្រុំ សំណាង អធិការប៉ូលិសស្រុកកៀនស្វាយ បានអោយដឹងនៅរសៀលថ្ងៃទី២២ខែកុម្ភះនេះថា ករណី បុរស់ម្នាក់គាត់លង់ទឹកកាលពីល្ងាចថ្ងៃទី២១ ខែកុម្ភះ ឆ្នាំ២០២១នេះនៅចំណុចកើតហេតុ:ភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្ដាល។
ជនរងគ្រោះឈ្មោះ ឈួន គន្ធី ភេទប្រុស អាយុ ១៨ឆ្នាំ មុខរបរកម្មកររោងពុម្ព មានលំនៅភូមិដូនស ឃុំគគីរ ស្រុកកៀនស្វាយ ខេត្តកណ្តាល។
លោកអធិការបន្តទៀតថាដោយនៅថ្ងៃ២១ ខែកុម្ភះ ឆ្នាំ២០២១វេលាម៉ោង១៤ នឹង១០នាទី ជនរងគ្រោះ រួមនឹងមិត្តភ័ក្ដិ ០៣ នាក់ទៅ ០៤នាក់ បាននាំគ្នាមកផឹកស៊ីនៅហាងស្ទឹងគគីរ ១៦៨ នៅលើកញ្ចុះបណ្តែតទឹក ស្ថិតនៅភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្តាល ដោយគ្នាផឹកស៊ីតាំងមកពី ម៉ោងប្រមាណ ១៤:១០នាទី រហូតដល់ម៉ោង ១៦:៣០នាទី ហើយជនរងគ្រោះឈ្មោះ ឈួន គន្ធី ភេទប្រុស បានបបួលឈ្មោះ ណម ឆាន ហៅ ឌី ភេទប្រុស មានលំនៅភូមិតារាបដូនស ឃុំគគីរ ស្រុកកៀនស្វាយ ខេត្តកណ្តាល ចុះហែលទឹកលេង ដោយជនរងគ្រោះបានហែលទឹកទៅខាងទឹកជ្រៅ ឯឈ្មោះណម ឆាន ហៅ ឌី ភេទប្រុស នៅហែលទឹករាក់ៗជិតកញ្ចុះបណ្តែតទឹក ហើយក្រឡេចរកមើលជនរងគ្រោះដែលហែលទៅខាងទឹកជ្រៅម្តងទៀតតែមិនឃើញ ដោយមានការសង្ស័យថាលង់ទឹក ឈ្មោះ ណម ឆាន ហៅឌី ភេទប្រុស បានជ្រមុជទឹករកជនរងគ្រោះ ០២ ទៅ ០៣ដងដែរ តែរកមិនឃើញហើយបានឡើងពីទឹកមកវិញ និងបបួលមិត្តភក្តិដែលផឹកស៊ីជាមួយគ្នាដើររកតាមកញ្ចុះបណ្តែតទឹក ព្រោះមុនពេលជនរងគ្រោះ លង់ទឹកបានប្រាប់ថា អញហែលទៅរកមិត្តភ័ក្តិនៅកញ្ចុះខាងត្រើយម្ខាង ។ លុះដល់ម៉ោងម៉ោង ១៩:១០នាទី ថ្ងៃ ខែ ឆ្នាំដដែរទើបមានប្រជាពលរដ្ឋរាយការណ៍ថា មានមនុស្សលង់ទឹកខ្ពបកោះប្រាក់ ពេលនោះកំលាំងប៉ុស្តិ៍ រួមនិងប្រជាការពារ និងលោកនាយផ្នែកពិនិត្យហេតុបានចុះមកដល់កន្លែងកើតហេតុ តែជនរងគ្រោះដែលលង់ទឹកនោះ មិនទាន់រកឃើញនៅឡើយ។
លុះដល់ព្រឹកថ្ងៃ២២ ខែកុម្ភះ ឆ្នាំ២០២១ ម៉ោង៩ .៣៤ នាទីក្រុមការងារនិងសាច់ញាតិបានរុករកឃើញសពដែលលង់ទឹកនោះឃើញរួចដឹកសពនោះមកផ្ទះ នៅចំណុចភូមិដូនស ឃុំគគីរ ស្រុកកៀនស្វាយ ខេត្តកណ្តាល។
ក្រោយពិនិត្យសពរួចជំនាញនិងពេទ្យពិនិត្យឃើញថាជនរងគ្រោះពិតជាបានស្លាប់ដោយលង់ទឹកពិតប្រាកដមែន សពត្រូវបានជំនាញស្រុកប្រគល់ជូនសាច់ញាតិយកទៅធ្វើបុណ្យ៕
