ចាប់ខ្លួន កូនចៅកែកាប់ជ្រូកម្នាក់ ឈ្មោះហ៊ាពៅៗ និងកូនចៅ២នាក់ ដែលបើករថយន្ត Lexus 570 ដកកាំភ្លើងភ្ជង់ អ្នកបើករថយន្តស្ទូច តាមបញ្ជាអភិបាលរាជធានី
ភ្នំពេញ៖ ចាប់ខ្លួនកូនចៅកែកាប់ជ្រូកម្នាក់ឈ្មោះហ៊ាពៅៗអ្នកបើករថយន្ត Lexus 570 ស្លាកលេខរដ្ឋ07-2-8989 និងបក្ខពួកចំនួន២នាក់ ត្រូវសមត្ថកិច្ចចាប់វាយខ្នោះបញ្ជូន ទៅកាន់អធិការដ្ឋាននគរបាលខណ្ឌឬស្សីកែវ នៅថ្ងៃត្រង់ទី១៥ ខែសីហា ឆ្នាំ២០១៨នេះ ក្រោយកម្លាំងសមត្ថកិច្ចក្រោមការសម្របសម្រួលពីលោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ បានចុះទៅដកហូតរថយន្ត Lexus570 មកវិញ។
សមត្ថកិច្ចបញ្ញ្ជាក់ថា៖ដោយឡែក រថយន្តបង្កវិញត្រូវបានអូសយកទៅកាន់ទីការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីកាត់ការតាមនីតិវិធីច្បាប់។ជនបង្កគ្រោះថ្នាក់ចរាចរណ៍ខាងលើមានឈ្មោះ ទ្រី ដារិន ភេទប្រុស អាយុ៣៨ឆ្នាំ ហៅហ៊ាពៅៗ ជាកូនថៅកាប់ជ្រូក និងម្នាក់ទៀត ជាកម្មកសំណង់មានឈ្មោះ អ៊ុល ផានិត អាយុ២៥ឆ្នាំ មុខរបរកម្មករសំណង់ (ឃាត់យកមកសួរនាំនៅអធិការខណ្ឌ) ស្នាក់នៅកន្លែងកើតហេតុ។ ចំណែកឯអ្នកបើកបររថយន្តកូរ៉ូឡាមានឈ្មោះ ស្រ៊ុន ពិសិដ្ឋ ភេទប្រុស អាយុ៣០ឆ្នាំ មុខរបរកូនចៅ (ឃាត់យកមកសួរនាំនៅអធិការខណ្ឌ) ស្នាក់នៅ ក្នុងសង្កាត់គីឡូម៉ែត្រលេខ៦ ខណ្ឌឫស្សីកែវ។ យ៉ាងណាក៏ដោយ អត្ដសញ្ញាណ និងតួនាទីរបស់ជនបង្ករូបនេះ មិនទាន់មានការបញ្ជាក់ជាផ្លូវការរបស់សមត្ថកិច្ចនៅឡើយទេ។
ករណីដ៏ព្រហើននេះ ត្រូវបានផ្អើលរហូតដល់អភិបាលរាជធានីភ្នំពេញលោក ឃួង ស្រេង និងស្នងការនគរបាលរាជធានីភ្នំពេញ នាយឧត្តមសេនីយ៍ ជួន សុវណ្ណ បញ្ជាឲ្យនគរបាលចរាចរណ៍ ក្រោមការសម្របសម្រួលរបស់ព្រះរាជអាជ្ញា ចុះទៅយករថយន្ដដែលបង្ក និងបំផ្លាញទ្រព្យសម្បត្តិមួយគ្រឿងនេះ ព្រមទាំងចាប់វាយខ្នោះអ្នកបើករថយន្ដស៊េរីទំនើប និងបក្ខពួក ចាត់វិធានការតាមផ្លូវច្បាប់យ៉ាងម៉ឺងម៉ាត់ជាទីបំផុត ដែលត្រូវចោទប្រកាន់ពីបទ ប្លន់យកវត្ថុតាង របស់សមត្ថកិច្ច។
ក្រោយចាប់ខ្លួនហ៊ាពៅរួចមកប្លែកធ្លាយពីអ្នករកស៊ីកាប់ជ្រូក ថា ជនម្នាក់ឈ្មោះទ្រី ដារិន ហៅហ៊ាពៅនេះជាមនុស្សដើរបោកគេជាច្រើនករណី និងជាមនុស្សម្នាក់ដែលឈ្លើយណាស់ មិនចេះខ្លាចរអារច្បាប់ទម្លាប់នោះឡើយ។ ដូច្នេះលើកនេះទំនងដល់ថ្ងៃអន្សារបស់រូបគេហើយ ដែលធ្លាប់ដើរបោកប្រាក់គេរាប់សិបម៉ឺនដុល្លារនាពេលកន្លងមក។
គួរបញ្ជាក់ថា៖ ម្ចាស់រថយន្ដរូបនេះ រួមជាមួយបក្ខពួក២នាក់ទៀត បានបើករថយន្ដមួយគ្រឿងទៀត តាមរថយន្ដស្ទួចរបស់នគរបាលចរាចរណ៍ផ្លូវគោក ដែលដឹករថយន្ដរបស់ខ្លួន ទៅកាន់ការិយាល័យចរាចរណ៍ នៃស្នងការដ្ឋាននគរបាលរាជធានីភ្នំពេញ ដើម្បីធ្វើការដោះស្រាយ និងបង់ផាកពិន័យនោះ បានដកកាំភ្លើងទៅភ្ជង់អ្នកបើករថយន្ដស្ទួច ឲ្យដឹករថយន្ដរបស់ខ្លួន យកទៅទុកនៅក្នុងផ្ទះ ដែលស្ថិតនៅផ្ទះលេខ R0204 ក្រុម១ ភូមិខ១ សង្កាត់ច្រាំងចំរេះ២ ខណ្ឌឫស្សីកែវ។
សមត្ថកិច្ចបានបន្តទៀតថា៖រថយន្ត Lexus570 ពាក់ស្លាកលេខរដ្ឋ: 07-2-8989 បានបុកបង្គោលភ្លើងបាក់មួយដើម នៅសង្កាត់ឬស្សីកែវ ខណ្ឌឬស្សីកែវ កាលពីវេលាម៉ោងជាង៣ទៀបភ្លឺថ្ងៃទី១៥ ខែសីហាឆ្នាំ២០១៨ ត្រូវបានមន្ត្រីចរាចរណ៍ហៅរថយន្តស្ទួច ដឹកយកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ប៉ុន្តែដោយសារតែមន្ត្រីចរាចរណ៍ទៅមុន បែរជាម្ចាស់រថយន្ត Lexus 570នេះ យកកាំភ្លើងទៅភ្ជង់ម្ចាស់ឡានស្ទួច មិនឱ្យយកមកស្នងការរួចឱ្យដឹកយកទៅផ្ទះរបស់ខ្លួនវិញ៕