ក្រសួងការងារបើកផ្តល់ប្រាក់ខែ ដល់កម្មករនៃរោងចក្រ ជូលី អាប់ភែរីល ក្រោយពេលថៅកែរោងចក្រ ចងកសម្លាប់ខ្លួន
ភ្នំពេញ៖ ក្រសួងការងារបណ្តុះបណ្តាលនិងវិជ្ជាជីវៈ បានសេចក្តីជូនដំណឹង ស្តីពីពិនិត្យបញ្ជីបើកផ្តល់ប្រាក់ឈ្នួល និងប្រាក់អត្ថប្រយោជន៍ ដល់បងប្អូនកម្មករនិយោជិតនៃរោងចក្រ ជូលី អាប់ភែរីល ដែលមានទីតាំងស្ថិនៅ ដីឡូត៍លេខ ២៨៨ ផ្លូវលេខ ៦៨K ភូមិចំការឳឡឹកទី១ សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
សូមបញ្ជាក់ថា កម្មករ កម្មការិនី ជាង២០០នាក់ នៅរោងចក្រ ជូលី អាប់ភើរ៉ែល (Jullee Apperal) នៅខណ្ឌពោធិ៍សែនជ័យ នាំគ្នាបិទផ្លូវជាថ្មី ដើម្បីទាមទាររកដំណោះស្រាយ បន្ទាប់ពីពួកគាត់ បាននាំគ្នាឈរ និងដេកយាម មុខរោងចក្រ រង់ចាំដំណោះស្រាយជិតកន្លះខែហើយ ដោយសារថៅកែរោងចក្រ ចងកសម្លាប់ខ្លួន និងអ្នកគ្រប់គ្រងរោងចក្រ បាននាំគ្នារត់ចោលរោងចក្រ។
ក្រសួងការងារ បានឲ្យដឹងថា បងប្អូនកម្មករនិយោជិតទាំងអស់ អញ្ជើញមកបើកថវិកាដោយផ្ទាល់ដៃ នៅថ្ងៃទី២០ ខែសីហា ឆ្នាំ២០១៨ នៅសាលាខណ្ឌពោធិ៍សែនជ័យ រាជធានីភ្នំពេញ ដោយត្រូវភ្ជាប់មកជាមួយនូវឯកសារដូចខាងក្រោម៖ ១. កាតសម្គាល់ខ្លួនកម្មករនិយោជិត ក្នុងរោងចក្រ (ច្បាប់ដើម) និងសៀវភៅការងារ ឬប័ណ្ណបេឡាជាតិរបបសន្តិសុខសង្គម ឬអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន ឬកិច្ចសន្យាការងារ។ ២. ប័ណ្ណបើកប្រាក់ឈ្នួលប្រចាំខែរបស់កម្មករនិយោជិតម្នាក់ៗ (បើមាន)។
កម្មករ កម្មការិនី ជាង២០០នាក់ នៅរោងចក្រ ជូលី អាប់ភើរ៉ែល (Jullee Apperal) បានទាមទាររកដំណោះស្រាយ ដោយសារថៅកែរោងចក្រ ចងកសម្លាប់ខ្លួន និងអ្នកគ្រប់គ្រងរោងចក្រ បាននាំគ្នារត់ចោលរោងចក្រ។
កម្មកររោងចក្រ ជូលី ទទូចឲ្យមន្ត្រីក្រសួងការងារពន្លឿន ការរកដំណោះស្រាយឲ្យកម្មករឲ្យបានលឿន ព្រោះកាលពីថ្ងៃទី១០ សីហា ដល់ថ្ងៃកម្មករ ត្រូវបើកប្រាក់ខែ និងដល់ថ្ងៃបង់ថ្លៃបន្ទប់ជួល បង់លុយការជំពាក់ធនាគារ និងថ្លៃកូនសិក្សា។
កម្មករបន្ដថា ប្រាក់ឈ្នួលខែកក្កដា ដែលរោងចក្រជូលី នៅជំពាក់កម្មករ គឺចន្លោះពី ២៥០ដុល្លារ ទៅ៣០០ដុល្លារ ក្នុងម្នាក់ៗ និង មិនទាន់មានប័ណ្ណបេឡារបបសន្តិសុខសង្គម (ប.ស.ស) សម្រាប់កម្មករនៅឡើយទេ។ កម្មកររោងចក្រនេះ បានផ្ទុះការតវ៉ា ក្រោយពេលដឹងថា ថៅកែជនជាតិកូរ៉េខាងត្បូង បានចងកសម្លាប់ខ្លួន នៅក្នុងផ្ទះជួល ជិតរោងចក្រ នៅកំឡុងថ្ងៃបោះឆ្នោត កាលពីចុងខែកក្កដា កន្លងទៅនេះ៕