បុគ្គលិកធនាគារម្នាក់ ស្រវឹងស្រាបើកបររថយន្តរេចង្កូត បុករទេះជនពិការ បណ្តាលឲ្យរងរបួសធ្ងន់
កោះកុង ៖ បុរសម្នាក់ស្រវឹងស្រា បានបើករថយន្តរេចង្កូតបុករទេះជនពិការ ខណៈកំពុងធ្វើដំណើរបញ្ច្រាសទិសគ្នា បណ្តាលឲ្យរងរបួសធ្ងន់ម្នាក់ នៅវេលាម៉ោង២០និង២០នាទី ថ្ងៃទី២២ ខែឧសភា ឆ្នាំ២០២១ នៅចំណុចលើស្ពាន ក្នុងភូមិ២ សង្កាត់ដងទង់ ក្រុងខេមរភូមិន្ទ ។
ជនបង្កឈ្មោះ លឹម ចាន់រិទ្ធី អាយុ៤៣ឆ្នាំ ជនជាតិខ្មែរ មុខរបរបុគ្គលិកអេស៊ីលីដា ទីលំនៅភូមិ១ សង្កាត់ស្មាច់មានជ័យ ក្រុងខេមរភូមិន្ទ បើកបររថយន្តម៉ាកហាឡែនឌ័រ ពណ៌ក្រហម ពាក់ផ្លាកលេខភ្នំពេញ 2AR-7754 ធ្វើដំណើរពីជើងទៅត្បូង លុះមកដល់ចំណុចខាងលើ ក៏បុកជាមួយរទេះជនពិការតែម្តង បណ្តាលឲ្យរងរបួសធ្ងន់ ចំណែកអ្នកបើកបររថយន្តមិនមានរងរបួស ។
ជនរងគ្រោះឈ្មោះ មើត ម៉ាស្សី ភេទប្រុស អាយុ២៣ឆ្នាំ ជនជាតិខ្មែរអ៊ីស្លាម ជាជនពិការមានទីលំនៅ ភូមិ៤ សង្កាត់ដងទង់ ក្រុងខេមរភូមិន្ទ រងរបួសបែកក្បាលខាងក្រោយ ។ មូលហេតុនៃគ្រោះថ្នាក់ខាងលើ បណ្តាលមកពីអ្នកបើកបររថយន្ត បើកបរក្នុងស្ថានភាពស្រវឹង មិនប្រកាន់ស្តាំ។
បច្ចុប្បន្ន រថយន្តនិងរទេះ កម្លាំងសមត្ថកិច្ចជំនាញ បានយកមករក្សាទុក នៅអធិការដ្ឋាននគរបាលក្រុង រង់ចាំធ្វើការដោះស្រាយតាមនីតិវិធី ៕
