ឡានព្រលះម៉ូតូ ផ្លូវជាតិលេខ៣ កណ្ដាលស្ទឹង របួសធ្ងន់ម្នាក់

កណ្ដាល៖ សមត្ថកិច្ចបានអោយដឹងនៅព្រឹកថ្ងៃទី៣០ខែឧសភានេះថា កាលពីថ្ងៃទី ២៩ ខែឧសភាឆ្នាំ ២០២១ ករណីគ្រោះថ្នាក់ចរាចរណ៍ រវាងរថយន្តនិងម៉ូតូ (បណ្ដាលឲ្យរងរបួសធ្ងន់ម្នាក់ និងខូចខាតម៉ូតូ ១គ្រឿង) នៅលើកំណាត់ផ្លូវជាតិលេខ ៣ ចន្លោះគីឡូម៉ែត្រ ២៤- ២៥ ភូមិកំពង់ទួល ឃុំអន្លង់រមៀត ស្រុកកណ្ដាលស្ទឹង ខេត្តកណ្ដាល។

គ្រោះថ្នាក់នេះ បង្កឡើងដោយរថយន្តម៉ាក ហ៊ីយ៉ាន់ដាយ ប្រភេទបែន ពណ៌សពាក់ស្លាកលេខភ្នំពេញ៣A-៤៩៩១ បើកបរដោយឈ្មោះរឿន រួន ភេទប្រុស អាយុ២៧ឆ្នាំមានទីលំនៅ ក្រុមទី១៣ ភូមិមុខរាហ៍២ ឃុំមុខរាហ៍ស្រុករុក្ខគិរី ខេត្តបាត់ដំបង បើកបរក្នុងទិសដៅពីត្បូងមកជើង (តាកែវ-ភ្នំពេញ) ពេលមកដល់ត្រង់ចំណុចកើតហេតុខាងលើ បានគេចពីរថយន្ត ១គ្រឿងទៀត ដែលនៅខាងមុខ ស្របទិសគ្នា បានបត់ឆ្វេងត្រឡប់ក្រោយ ស្របពេលនោះ ក៏បានបុកនិងកិនម៉ូតូ ១គ្រឿងម៉ាកហុងដាឌ្រីមសង់សេ125 ពណ៌ខ្មៅ ពាក់ស្លាកលេខ ភ្នំពេញ១CU-4812 បើកបរដោយឈ្មោះនៅ ណាគ្រី ភេទស្រីអាយុ ៣៨ ឆ្នាំ មានទីលំនៅភូមិដើមឬស ឃុំដើមឬស ស្រុកកណ្ដាល ស្ទឹងខេត្តកណ្ដាល បើកបរក្នុងទិសដៅស្របគ្នា ពីត្បូងមកជើង (តាកែវ-ភ្នំពេញ) រងរបួសធ្ងន់ខ្ទេចជើងទាំងពីរ។
តាមការសន្និដ្ឋាន៖ ករណីគ្រោះថ្នាក់ចរាចរណ៍ខាងលើនេះ បណ្ដាលមកពីអ្នកបើកបររថយន្ត បើកបរធ្វេសប្រហែស ខ្វះការប្រុងប្រយ័ត្ន ទើបបណ្ដាលឱ្យគ្រោះថ្នាក់កើតឡើង។
ចំពោះអ្នកបើកបររថយន្ត បានឃាត់ខ្លួននៅអធិការដ្ឋាន។
ចំពោះវត្ថុតាងរថយន្តនិងម៉ូតូ កម្លាំងជំនាញបានយកមករក្សាទុកនៅ អធិការរដ្ឋានជាបណ្ដោះអាសន្ន៕