រថយន្តក្រឡុកសុីម៉ងត៍ របស់ក្រុមហ៊ុនជីបម៉ុង កិនម៉ូតូ បាក់ជើងស្រ្តីម្នាក់

ភ្នំពេញ ៖ ស្ត្រីម្នាក់បាក់ជេីងឆ្វេង ដោយសាត្រូវរថយន្តក្រឡុកស៊ីម៉ងត៍មួយគ្រឿង របស់ក្រុមហ៊ុនជីបម៉ុង បើកបុកនិងកិន ពីលេីម៉ូតូជនរងគ្រោះពីក្រោយ កាលពីវេលាម៉ោង១២និង២០នាទីថ្ងៃត្រង់ ថ្ងៃទី១១ ខែមិថុនា ឆ្នាំ២០២១ ស្ថិតនៅចំណុចច្រមុះជ្រូកក្បាលថ្នល់ តាមបណ្ដោយផ្លូវព្រះមុនីវង្ស កែងនឹងផ្លូវ២៧១ ក្នុងសង្កាត់ផ្សារដេីមថ្កូវ ខណ្ឌចំការមន រាជធានីភ្នំពេញ ។

តាមប្រភពព័ត៌មាន ពីមន្ត្រីនគរបាលចរាចរណ៍ ដែលឈរជើងនៅគោលដៅ កន្លែងកេីតហេតុ បានឱ្យដឹងថា នៅមុនពេលកើតហេតុ គេឃេីញស្ត្រីម្នាក់មានវ័យប្រហែលជាង៤០ឆ្នាំម្នាក់ ដែលគេស្គាល់ថាឈ្មោះ ចែឡុង លក់ដូរសាច់ជ្រូកក្នុងផ្សារទួលទំពូង ជិះម៉ូតូមួយគ្រឿងម៉ាក ហុងដាឌ្រីម ស៊េរី២០១៤ ពណ៌ខ្មៅ ពាក់ផ្លាកលេខភ្នំពេញ 1CB-5862 ធ្វេីដំណេីរតាមបណ្តោយផ្លូវព្រះមុនីវង្ស ទិសដៅពីលិចមកកើត ខណៈមកដល់ចំណុចកើតហេតុ ក៏បានឈប់ចាំស្តុក ខណៈពេលនោះ ក៏មានរថយន្តក្រឡុកស៊ីម៉ងត៍មួយគ្រឿង របស់ក្រុមហ៊ុនជីបម៉ុង ពណ៌ស លាយទឹកក្រូច ពាក់ផ្លាកលេខ ភ្នំពេញ 5A-3181 បេីកបរដោយបុរសម្នាក់ មានឈ្មោះយ៉ែម សារឿន ភេទប្រុស អាយុ៣៨ឆ្នាំ មុខរបរបេីកបររថយន្តក្រុមហ៊ុនជីបម៉ុង ស្នាក់នៅបុរីពិភពថ្មីគួរស្រូវ ខណ្ឌដង្កោ រាជធានីភ្នំពេញ ធ្វេីរដំណេីរមកពីក្រោយ ហេីយបុកពីក្រោយម៉ូតូជនរងគ្រោះ ព្រមទាំងកិនពីលេីជនរងគ្រោះ បណ្តាលឲ្យបាក់ជេីងឆ្វេង ម្ខាងរងរបួសយ៉ាងធ្ងន់ធ្ងរ ។ សមត្ថកិច្ចដែលឈរជេីង នៅគោលដៅកន្លែងកេីតហេតុ ក៏បានឃាត់ខ្លួនតៃកុងរថយន្តបង្ក បញ្ជូនទៅកាន់ អធិការដ្ឋាននគរបាលខណ្ឌចំការមន ព្រមទាំងទាក់ទងទៅ ខាងរថយន្តសាមុយ ឱ្យមកដឹកស្ត្រីរងគ្រោះ បញ្ជូនទៅសង្គ្រោះបន្ទាន់ផងដែរ ។

សមត្ថកិច្ចជំនាញការរិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះមកធ្វេីការវាស់វែង យករថយន្តបង្ក និងម៉ូតូរបស់ជនរងគ្រោះ យកទៅរក្សាទុក ដេីម្បីរង់ចាំដោះស្រាយនៅពេលក្រោយ ៕