ឃាត់ខ្លួនជនសង្ស័យ ចំនួន ៣ នាក់ លួចបង្កប់ ដាំដំណាំកញ្ឆា ក្នុងចម្កាស្វាយ ដកហូតកញ្ឆាក្រៀមចំនួន ៣៦ គីឡូ កញ្ឆាស្រស់ចំនួន១២៥០០ដើម

ឧត្តរមានជ័យ ៖ កម្លាំងស្នងការនគរបាលខេត្តឧត្តរមានជ័យ បានចុះបង្ក្រាបទីតាំងចំការស្វាយ១កន្លែង នៅចំណុចពាង២ ស្ថិតក្នុងភូមិអូរតាមែង ឃុំ-ស្រុកអន្លង់វែង ដែលបានធ្វើសកម្មភាពលួចបង្កប់ដាំដំណាំកញ្ឆាខុសច្បាប់ មានទំហំ ៥,៥០០ ម៉ែត្រការ៉េ ។

នៅរសៀលថ្ងៃទី៤ ខែកក្កដា ឆ្នាំ២០២១ ដោយមានការសម្របសម្រួលនីតិវិធីដឹកនាំបញ្ជាផ្ទាល់ពី ឯកឧត្តម តូច សុភក្តី ព្រះរាជអាជ្ញា នៃអយ្យការអមសាលាដំបូងខេត្តឧត្តរមានជ័យ លោកឧត្តមសេនីយ៍ទោ ហួត សុធី ស្នងការនគរបាលខេត្ត បានដឹកនាំកម្លាំងកងអន្តរាគមន៍ពិសេសរបស់ស្នងការដ្ឋាន សហការជាមួយកម្លាំងអធិការដ្ឋានស្រុកអន្លង់វែង បានចុះធ្វើការបង្ក្រាបទីតាំងចំការស្វាយ ១កន្លែង នៅចំណុចពាង២ ស្ថិតក្នុងភូមិអូរតាមែង ឃុំ-ស្រុកអន្លង់វែង ដែលបានធ្វើសកម្មភាពលួចបង្កប់ដាំដំណាំកញ្ឆាខុសច្បាប់ មានទំហំ ៥,៥០០ ម៉ែត្រការ៉េ។

ឧត្តមសេនីយ៍ទោ ហួត សុធី បានថ្លែងថា ក្នុងកិច្ចប្រតិបត្តិការនេះ កម្លាំងយើងបានធ្វើការឃាត់ខ្លួនជនសង្ស័យចំនួន ០៣ នាក់/ស្រី ០២នាក់ ព្រមទាំងធ្វើការដកហូតបាននូវ៖ កញ្ឆាក្រៀមចំនួន ៣៦ គីឡូក្រាម, កញ្ឆាស្រស់ចំនួន១២៥០០ដើម, រថយន្ត ១ គ្រឿង, គោយន្តកន្ត្រៃ ១ គ្រឿង និងសម្ភារមួយចំនួនទៀត ។

បច្ចុប្បន្ន ជនសង្ស័យ និងវត្ថុតាងខាងសមត្ថកិច្ចជំនាញ កំពុងរៀបចំកសាងសំណុំរឿង បញ្ជូនទៅតុលាការចាត់ការបន្តតាមនីតិវីធី ៕