រថយន្តពីរគ្រឿងបុកគ្នា របួសជនជាតិចិន ៣នាក់
កំពង់ស្ពឺ៖ នគរបាលមូលដ្ឋាន បានឲ្យដឹងថា មានករណីគ្រោះថ្នាក់ចរាចររថយន្ដបុករថយន្ដ នៅលើផ្លូវជាតិលេខ ៤ នៅគីឡូម៉ែត្រ ៤៧-៤៨ រវាងរថយន្ត ម៉ាក Highlander ជាមួយ រថយន្តសណ្តោងកុងតឺន័រ បណ្តាលឲ្យរបួសមនុស្ស ៣ នាក់ ជនជាតិចិន បញ្ជូនទៅព្យាបាលនៅមន្ទីរពេទ្យខេត្តកំពង់ស្ពឺ។
នៅយប់ថ្ងៃព្រហស្បតិ៍ ទី២៣ ខែសីហា ឆ្នាំ២០១៨ វេលាម៉ោង២២:១០នាទី នៅលើផ្លូវជាតិលេខ ៤ ចន្លោះគីឡូម៉ែត្រលេខ៤៧-៤៨ ត្រង់ចំណុចលើស្ពាន ភូមិពាណិជ្ជកម្ម សង្កាត់រកាធំ ក្រុងច្បារមន ខេត្តកំពង់ស្ពឺ រថយន្ដ១គ្រឿង ម៉ាកហាយឡែនឌ័រ ពណ៌ប្រផេះ ពាក់ស្លាកលេខភ្នំពេញ 2AS-2280 អ្នកបើកបរឈ្មោះ វង់ ថៃ ភេទប្រុស អាយុ ២២ឆ្នាំ រស់នៅភូមិបត់គគីរ ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ និងមានអ្នករួមដំណើរក្នុងរថយន្ដចំនួន ៣នាក់ ភេទស្រី ជាជនជាតិចិន បានទៅបុករថយន្ដ ១គ្រឿង ម៉ាកBREIGHLINER ពាក់ផ្លាកលេខភ្នំពេញ3E-1936 មានសណ្តោងរ៉ឺម៉កកុងតឺន័រ ពាក់ស្លាកលេខព្រះសីហនុ 4A-0151 មិនទាន់ស្គាល់ឈ្មោះ និងអាសយដ្ឋានអ្នកបើកបរទេ ដែលកំពុងតែបើកបរបញ្ច្រាសទិសគ្នាបណ្តាល ឲ្យគ្រោះថ្នាក់មនុស្ស និង ខូចខាតសម្ភារ គឺរបួសមនុស្ស ៣នាក់ស្រី (ជនជាតិចិន) ខូចខាតរថយន្ដ ២ គ្រឿង។
ក្រោយពេលគ្រោះថ្នាក់ អ្នកបើកបររថយន្ដ BREIGHLINER បានចុះរត់គេចខ្លួនបាត់។
នគរបាលខេត្តកំពង់ស្ពឺ បានបញ្ជាក់ថាំ ករណីខាងលើ អាចបណ្ដាលមកពីអ្នកបើកបរបាត់ម្ចាស់ការ ហើយរេចង្អូតចូលឆ្លងគំនូសទ្រូងផ្លូវ។
វត្ថុតាងទាំងពីរ បានយកមករក្សាទុកនៅ ការិយាល័យចរាចរណ៍ខេត្ត ដើម្បីស្រាវជ្រាវ និងចាត់ការតាមនីតិវិធី៕
