កម្តៅសម្លភ្លេចបិទចង្ក្រានហ្គាស ដេកលក់មួយភាំង ផ្ទុះចង្ក្រានហ្គាសឆេះផ្ទះ
រាជធានីភ្នំពេញ៖ នៅវេលាម៉ោង ១០:១៥ នាទីព្រឹក ថ្ងៃច័ន្ទ ៣កើត ខែបឋមសាឍ ឆ្នាំ ឆ្លូវ ត្រីស័ក ព.ស ២៥៦៥ ត្រូវនឹង ថ្ងៃទី១២ ខែកក្ដដា ឆ្នាំ២០២១ មានករណីអគ្គីភ័យមួយកន្លែងកើតឡើងនៅផ្លូវលេខ១១៨ ផ្ទះលេខ១៩ ភូមិ ៥ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ ។
ម្ចាស់ឈ្មោះ: ឪ សំអាត ភេទ ស្រី អាយុ ៦៧ ឆ្នាំ មុខរបរ: មេផ្ទះជាម្ចាស់ផ្ទះជួល ។ មូលហេតុ: បណ្តាលមកពីផ្ទះកំប៉ុងហ្គាស់ ។ ប្រភេទសំណង់ៈ ផ្ទះល្វែង (ទំហំ ០៤ម៉ែត្រ× ០៦ម៉ែត្រ) ។ ខូចខាតសំភារះ: អស់ចំនួនពីរបន្ទប់នឹងពុំបណ្ដាលអោយឆេះរាលដាលដល់ផ្ទះអ្នកជិតខាងឡើយ ។
រថយន្តការិយាល័យអគ្គិភ័យ : ចំនួន ០៥ គ្រឿង ប្រេីប្រាស់ទឹកអស់ ០៣ រថយន្ត ស្មើនឹង ១២ ម៉ែត្រគូប ។ ពន្លត់ចប់ : នៅវេលាម៉ោង ១០:៤៥ នាទីព្រឹក នាថ្ងៃខែឆ្នាំដដែល ។
តាមការរៀបរាប់ពីស្ត្រី ដែលជាម្ចាស់ផ្ទះខាងលើនេះ បានឲ្យដឹងថា មុនពេលកើតហេតុ រូបគាត់បានកំដៅសម្ល នឹងចង្រ្កានហ្គាស រួចអស់កម្លាំងពេក ក៏សម្រាន្តលក់មួយភាំង បណ្តាលឲ្យឆាបឆេះក្រណាត់ ដែលនៅក្បែនឹងចង្ក្រាន បង្កឲ្យមានផ្សែងហុយចេញមកខាងក្រៅ ផ្អើលដល់អ្នកជិតខាងឡើង ទៅស្រែកប្រាប់ម្ចាស់ផ្ទះថា អ៊ុំៗផ្ទះអ៊ុំឆេះ ទើបម្ចាស់ភ្ញាក់ឡើងស្រឡាំងកាំង នាំចៅៗរត់ចុះមកខាងក្រោម៕
