សម្តេចតេជោ ហ៊ុន សែន ៖ ជនទី៦លាន ដែលបានចាក់វ៉ាក់សាំង បានទៅលើលោកស្រី ផេង សឿន អាយុ៦៧ឆ្នាំ

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងថា ដល់ពេលនេះកម្ពុជា បានចាក់វ៉ាក់សាំង ការពារកូវីដ១៩ បានចំនួន៦លាននាក់ ស្មើនឹង៦០% នៃប្រជាជន១០លាននាក់ ដែលត្រូវចាក់វ៉ាក់សាំង។

ចំពោះជនទី៦លាន ដែលបានចាក់វ៉ាក់សាំង បានទៅលើលោកស្រី ផេង សឿន អាយុ៦៧ឆ្នាំ ជាកសិកររស់នៅភូមិតាអុង ឃុំអាអុង ស្រុកចំការលើ ខេត្តកំពង់ចាម។

តាមរយៈបណ្តាញសង្គមហ្វេសប៊ុក ផ្លូវការរបស់សម្តេចតេជោ ហ៊ុន សែន នៅព្រលប់ថ្ងៃទី១៩ ខែកក្កដា ឆ្នាំ២០២១នេះ បានរៀបរាប់ថា “មកដល់ថ្ងៃនេះ កម្ពុជាយើងបានចាក់វ៉ាក់សាំង ការពារកូវីដ-១៩ បាន៦លាននាក់ ស្មើនឹង៦០ភាគរយ នៃប្រជាជន១០លាននាក់ ដែលត្រូវចាក់។ លេខរៀងទី៦ លានបានទៅលើប្អូនស្រីផេង សឿន អាយុ៦៧ឆ្នាំជាកសិកររស់នៅភូមិតាអុង ឃុំតាអុង ស្រុកចំការលើ ខេត្តកំពង់ចាម ដែលខ្ញុំសូមចូលរួមអបអរសាទរ។ លោកជំទាវ ឱ វណ្ណឌីន នឹងយកជំនួយថវិកា១០លានរៀល និងសម្ភារៈផ្សេងទៀតដែលជាជំនួយរបស់ខ្ញុំទៅប្រគល់ជូនដោយផ្ទាល់”៕