សាខាកាកបាទក្រហម កម្ពុជារាជធានីភ្នំពេញ យកអំណោយ មកប្រគេនព្រះសង្ឃគង់នៅវត្តចាក់អង្រែលើ

ភ្នំពេញ៖នៅថ្ងៃទី ១៩ ខែ កក្កដា ឆ្នាំ ២០២១នេះ លោកឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ បានចាត់ឲ្យលោក ជិន ប៊ុនធឿន នាយកប្រតិបត្តិសាខា ជាតំណាង និងលោកឡុង ង៉ែត អភិបាលរងខណ្ឌមានជ័យ លោកកែវ សាវឿន ចៅសង្កាត់ចាក់អង្រែលើព្រមទាំងសហការីដោយបានចុះសាកសួរសុខទុក្ខ និងនាំយកអំណោយមនុស្សធម៌របស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា រួមមាន៖ អង្ករចំនួន១តោន មីចំនួន៤កេសធំ ទៅប្រគេនព្រះសង្ឃគង់នៅវត្តចាក់អង្រែលេី ដែលស្ថិតនៅតាមបណ្ដោយផ្លូវជាតិលេខ២ក្នុងមូលដ្ឋានសង្កាត់ចាក់អង្រែលេី ខណ្ឌមានជ័យ រាជធានីភ្នំពេញ ។
មានមតិនាឱកាសនោះ ក្នុងនាម លោកឃួង ស្រេង ប្រធានគណៈកម្មាធិការសាខា លោក ជិន ប៊ុនធឿន បានពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ប្រគេនចំពោះព្រះចៅអធិការ វត្តរួមទាំង ព្រះសង្ឃទាំងអស់ប្រកបដោយសេចក្តីនឹករលឹក ។ លោកបានលេីកឡេីងថា៖ ដោយមានការគិតគូរយកចិត្តទុកខ្ពស់ចំពោះសុខទុក្ខរបស់ព្រះសង្ឃដែលគង់នៅក្នុងវត្តចាក់អង្រែលេីនេះ ជាពិសេសក្នុងស្ថានភាពដែលប្រទេសយេីងកំពុងរងផលប៉ះពាល់ដោយសារជំងឺកូវីដ១៩ ដោយព្រះសង្ឃមិនអាចនិមន្តចេញបិណ្ឌបាត្របាន និងក៏ជារដូវភ្លៀ ងផងដែរនោះ សម្តេចកិត្តិព្រឹទ្ធបណ្ឌិត ប្រធាន ប៊ុន រ៉ានី ហ៊ុនសែន តាមរយៈលោកឃួង ស្រេង បានចាត់ឲ្យក្រុមការងារនាំយកអំណោយមនុស្សធម៌ទាំងនេះមកប្រគេនដេីម្បីចូលរួមជួយរំលែកនូវការលំបាកចំពោះមុខរបស់ព្រះសង្ឃ ។ លោកនាយកប្រតិបត្តិសាខា ក៏សូមឲ្យព្រះតេជគុណព្រះសង្ឃគ្រប់ព្រះអង្គបន្តអនុវត្តឲ្យបានខ្ជាប់ខ្ជួននូវវិធានការរបស់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី គឺ៖ ៣ការពារ និង ៣ កុំ ដេីម្បីចូលរួមទប់ស្កាត់ និងការពារការរីករាលដាលនៃជំងឺកូវីដ១៩ ទាំងអស់គ្នា ផងដែរ។
ឆ្លៀងក្នុងឱកាសនោះដែរលោក ជិន ប៊ុនធឿន បានមកសាកសួរសុខទុក្ខព្រះភិក្ខុ កែវ ប៊ុន មានព្រះជន្ម១០៨ព្រះវស្សា កំពុងជរាពាធមិនអាចនិមន្តទៅណាបាន និងបាននាំយកអំណោយមនុស្សធម៌របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តាមរយៈលោកឃួង ស្រេង មកប្រគេនរួមមាន៖ អង្ករ៤០០គីឡូក្រាម មី២កេសធំ និងជួយជួសជុលកុដិរបស់ព្រះអង្គគង់នៅដែលចាស់ទ្រុឌទ្រោមនេះឡេីងវិញ ។ ដោយឡែកចាស់ជរា២នាក់ ដែលរស់នៅក្នុងវត្តនេះដែរ ក៏បានទទួលអំណោយមនុស្សធម៌ពីសម្តេចកិត្តិព្រឹទ្ធបណ្ឌិត ប្រធាន ក្នុង១នាក់នូវ អង្ករ១បាវ មី២កេស និងថវិកាចំនួន១សែនរៀលផងដែរ ៕សុវណ្ណភូមិ