រថយន្តធុនធំបើកក្រឡាប់ដោយខ្លួនឯង បណ្តាលឲ្យតៃកុងស្លាប់នៅកន្លែងកើតហេតុ

ខេត្តកំពង់ស្ពឺ ៖ នៅថ្ងៃព្រហស្បត្តិ៍ ទី២២ ខែកក្កដា ឆ្នាំ២០២១ វេលាម៉ោង២១ និង១៥នាទី មានករណីគ្រោះថ្នាក់ចរាចរណ៍ បង្កដោយខ្លួនឯង បណ្តាលឲ្យអ្នកបើកបររថយន្តម្នាក់ស្លាប់ នៅកន្លែងកើតហេតុ ស្ថិតនៅលើផ្លូវជាតិលេខ ១៤២ ស្ថិតក្នុងភូមិព្រៃមៀន ឃុំរស្មីសាមគ្គី ស្រុកឱរ៉ាល់ ខេត្តកំពង់ស្ពឺ ។

មន្រ្តីនគរបាលស្រុកឱរ៉ាល់ បានឲ្យដឹងថា ៖ មុនពេលកើតហេតុរថយន្តម៉ាកហ៊ីណូ ពណ៌ស ពាក់ផ្លាកលេខកំពង់ស្ពឺ 3A-1878 សណ្តោងរ៉ឺម៉ក ពាក់ផ្លាកលេខ 4A-0140 បើកបរដោយឈ្មោះ ទី សីហា ភេទប្រុស អាយុ៣០ឆ្នាំ រស់នៅភូមិត្រពាំងអត់ទឹក ឃុំគិរីវ័ន្ត ស្រុកភ្នំស្រួច ខេត្តកំពង់ស្ពឺ បើកបរក្នុងទិសដៅពីត្បូងទៅជើង លុះដល់ចំណុចកើតហេតុ ស្រាប់តែរេចង្កូតធ្លាក់ផ្លូវក្រឡាប់ រថយន្តផ្ងារកង់ឡើងលើ បណ្ដាលឲ្យអ្នកបើកបរស្លាប់ នៅនឹងកន្លែងកើតហេតុ និងរថយន្ត ខូចខាតទាំងស្រុង (ធ្ងន់) ៕