រយៈពេល២ថ្ងៃជាប់គ្នានេះ ក្រុមការងារត្រួតពិនិត្យយានយន្ត កែច្នៃខុសលក្ខណៈបច្ចេកទេស ខេត្តព្រះវិហារ ឃាត់រថយន្តបានជិត៦០គ្រឿង
ខេត្តព្រះវិហារ៖ ក្រុមការងារត្រួតពិនិត្យយានយន្ត កែច្នៃខុសលក្ខណៈបច្ចេកទេស ខេត្តព្រះវិហារ ក្នុងរយៈពេល២ថ្ងៃជាប់គ្នានេះ បានឃាត់រថយន្តដឹកទំនិញបានចំនួនជិត៦០ គ្រឿង និងបានរកឃើញរថយន្តល្មើសច្បាប់ជាច្រើនគ្រឿងផងដែរ ដើម្បីធ្វើការផាកពិន័យនិងកាត់ទ្រុងចេញ។
លោកសំ លាងទ្រី ប្រធានមន្ទីរសាធារណការនិងដឹកជញ្ជូនខេត្តព្រះវិហារបានអោយដឹងថា អ្នកបើកបរល្មើសច្បាប់ចរាចរណ៍ផ្លូវគោក នៅលើដងផ្លូវជាតិលេខ៦២ ខេត្តព្រះវិហារ នៅតែបន្តមានស្ទើរជារៀងរាល់ថ្ងៃ បើទោះបីជាក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេសខេត្ត សហការជាមួយអាជ្ញាធរស្រុក បានដាក់កម្លាំងប្រចាំការស្ទាក់ចាប់ ទាំងយប់ ទាំងថ្ងៃក្តី ជាក់ស្តែងនៅរយះពេល២ថ្ងៃកន្លងមកនេះ ថ្ងៃទី១៤-១៥ ខែកញ្ញា ឆ្នាំ២០១៨ ក្រុមការងារខេត្តចុះអនុវត្តន៍ច្បាប់ចរាចរណ៍គោក ដោយបានសហការជាមួយអាជ្ញាធរស្រុក បានឃាត់យានយន្តចំនួន ៥៧គ្រឿង ដើម្បីត្រួតពិនិត្យ និងធ្វើការផាកពិន័យតាមច្បាប់។
យោងតាមរបាយការណ៍ពី ក្រុមការងារទាំងពីរគោលដៅដែលបានឈរជើងលើដងផ្លូវជាតិលេខ៦២ បានឲ្យដឹងថា នៅថ្ងៃទី១៤-១៥ ខែកញ្ញា ឆ្នាំ២០១៨ ចំនួន២ថ្ងៃជាប់ៗគ្នាកន្លងមកនេះ ក្រុមការងារខេត្ត ឃាត់យានយន្តបានចំនួន ៥៧គ្រឿង ក្នុងនោះ ពិនិត្យឃើញថាត្រឹមត្រូវ ចំនួន ១៩គ្រឿង រក្សាទុកត្រៀមកាត់ចំនួន ០១ គ្រឿងដឹកសំពីងសំពោងចំនួន ០៣ គ្រឿង ខ្វះឯកសារ ចំនួន ២៤ គ្រឿងដោះរានខាងក្រោយចំនួន ០៣ គ្រឿង គ្មានបណ្ណបើកបរ ចំនួន ០៥ នាក់ គ្មានផ្លានផ្លាកលេខ ចំនួន ០២ គ្រឿង។
បច្ចុប្បន្នយានយន្តទាំងនោះ ក្រុមការងារបានធ្វើការផាកពិន័យ និងធ្វើការអប់រំណែនាំតាមនីតិវិធី។
គួររំលឹកថា កាលពីថ្ងៃសុក្រ ៩រោច ខែមាឃ ឆ្នាំរកា ព.ស២៥៦១ ត្រូវនឹងថ្ងៃទី០៩ ខែកុម្ភៈ ឆ្នាំ២០១៨កន្លងទៅ នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងឱកាសដែរអញ្ជើញជាអធិបតីភាពបើកការដ្ឋានសាងសង់ស្ពានឆ្លងកាត់ទន្លេមេគង្គថ្មីមួយទៀតតភ្ជាប់ទឹកដីនៃខេត្តកំពង់ចាម ទៅកាន់ទឹកដីនៃខេត្តត្បូងឃ្មុំ សម្តេចតេជោ ហ៊ុន សែនបានដាក់ឱសានវាទ ចាប់ពីម៉ោង០០យប់ថ្ងៃទី៩កុម្ភៈ តទៅ គ្មានវត្តមានឡាន តទ្រុង លើដងផ្លូវទៀតឡើយ។ បើមាននៅតំបន់ណា ភូមិសាស្ត្រណា ចៅហ្វាយខេត្ត និងក្រុងនោះ ជាអ្នកទទួលខុសត្រូវ។ បើនរណាមកតវ៉ាឬអ្នកកាង ទោះជាឋានៈណាក៏ដោយ ក៏ធ្លាក់បុណ្យស័ក្តិទាំងអស់ និងបញ្ចូលព្រៃសតែម្តង៕
