ឧត្តមសេនីយ៍ទោ ឈឿន សុចិត្ត ជំរុញអោយមន្ត្រីនគរបាលប៉ុស្តិ៍ ត្រូវតែចុះតាមខ្នងផ្ទះប្រជាពលរដ្ឋ ដើម្បីយកស្នាមញញឹមពីគាត់

កណ្តាល៖ កងកម្លាំនគរបាលប៉ុស្តិ៍នគរបាលរដ្ឋបាលទាំងអស់ត្រូវចុះតាមខ្នងផ្ទះប្រជាពលរដ្ឋក្នុងដែនសមត្ថកិច្ចរបស់ខ្លួនពីដើមភូមិ ដល់ចុងភូមិ ដើម្បីសាកសួរសុខទុក ពុក ម៉ែ បង ប្អូន ទាំងអស់មានកង្វល់ ឬទុកលំបាកអ្វី ត្រូវដោះស្រាយជូនគាត់ និងផ្តល់សេវាសាធារណៈជូនប្រជាពលរដ្ឋទាំងអស់តាមខ្នងផ្ទះនិមួយៗសំដៅធ្វើយ៉ាងណាទាក់យកបេះដូងនិងស្នាមញញឹមពីពួកគាត់។ នេះជាការក្រឺនរំលឹកនិងជំរុញដល់មន្ត្រីនគរបាលប៉ុស្តិ៍ពីលោកឧត្តមសេនីយ៍ទោ ឈឿន សុចិត្ត ស្នងការនៃស្នងការដ្ឋាននគរបាល ខេត្តកណ្តាលនៅគ្រាដែលលោកអមដំណើរ ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្ត  អញ្ជើញ ចូលរួមជាអធិបតីក្នុងកម្មវិធីសម្ភោធដាក់អោយប្រើប្រាស់ជាផ្លូវការ ប៉ុស្តិ៍រដ្ឋបាលកំពង់ស្វាយ ដែលមានទំហំ ទទឹង៧ម៉ែត្រ បណ្តោយ១១មែត្រធ្វើពីថ្ម ប្រក់គ្រឿង នាព្រឹកថ្ងៃទី០២ ខែឧសភា ឆ្នាំ២០២២ ស្ថិតក្នុងភូមិកំពង់ស្វាយ ឃុំកំពង់ស្វាយ ស្រុកកៀនស្វាយ ខេត្តកណ្តាល។

លោកឧត្តមសេនីយ៍ទោ ឈឿន សុចិត្ត បានសំណូមពរដល់ពុក ម៉ែ បង ប្អូនទាំងអស់មេត្តាជួយសហការជាមួយ កងកម្លាំងនគរបាលប៉ុស្តិ៍រាល់ហេតុការណ៍កើតឡើងដើម្បីកងកម្លាំងនគរបាលយើងខ្ញុំជួយអន្តរាគមន៍បានទាន់ពេលនៅពេល។បើមិនរាយការណ៍ទៅប៉ុស្តិ៍ទេ សូមបងប្អូន ពុកម៉ែ តេមកខ្ញុំបាទ017787666(លេខទូរស័ព្ទលោកឈឿន សុចិត្ត)ឬឆាតចូលហ្វេសបុកខ្ញុំបាទ Chhoeun sochett និងឆាតចូលហ្វេសបុកស្នងការដ្ឋាននគរបាលខេត្តកណ្តាល ដែលមានផេកឈ្មោះ(ស្នងការដ្ឋាននគរបាលខេត្តកណ្តាល)។នៅពេលដែលបងប្អូនតេឬឆាតមក គឺមានក្រុមការងារប្រតិកម្មរហ័ស របស់យើងខ្ញុំបំរើពុក ម៉ែ បង ប្អូន បានទាន់ពេលវេលាសំដៅធ្វើយ៉ាងស្វែងរកសុខជូនបងប្អូន ពុកម៉ែនិងទាក់យកស្នាមញញឹម ពីប្រជាពលរដ្ឋទូទាំងខេត្តកណ្តាល៕