នារីម្នាក់បើករថយន្តឡង់គ្រីស័រ បុករះដើមឈើ នឹងកន្លែងលក់បន្លែ លក់គុយទាវ បណ្ដាលឲ្យក្មេងប្រុសម្នាក់រងរបួស

ភ្នំពេញ ៖ រថយន្តស៊េរីទំនើបម៉ាកឡង់គ្រីស័រ មួយគ្រឿង បើកបរដោយនារីម្នាក់ បានរេចង្កូតទៅបុករះដើមឈើមួយដើមបាក់រាបដល់ដី នឹងបន្តបុកកន្លែងលក់បន្លែ កន្លែងលក់គុយទាវ បណ្តាលឲ្យក្មេងប្រុសម្នាក់រងរបួសដោយរលាកទឹកស៊ុប កាលពីវេលាម៉ោង ១ និង៣០នាទីរំលងអធ្រាត្រឈានចូលថ្ងៃទី ១១ ខែឧសភា ឆ្នាំ២០២២ នៅខាងត្បូងស្តុបអាងទឹកប្រហែល៥០ម៉ែត្រ តាមបណ្ដោយផ្លូវព្រះមុនីរ៉េត ស្ថិតក្នុងសង្កាត់ផ្សារដើមគរ ខណ្ឌទួលគោក រាជធានីភ្នំពេញ។

តាមប្រភពព័ត៌មានពីកន្លែងកើតហេតុ បានឲ្យដឹងថា នៅពេលកើតហេតុគេឃើញនារីម្នាក់រួមដំណើរនិងនារីម្នាក់ទៀតបើករថយន្តស៊េរីទំនើបម៉ាក ឡង់គ្រីស័រ មួយគ្រឿងពណ៌ខ្មៅ ពាក់ផ្លាកលេខភ្នំពេញ2V-6686 ធ្វើដំណើរទិសដៅពីជើងមកត្បូងក្នុងល្បឿនលឿន លុះមកដល់ចំណុចកើតហេតុខាងលើបានរេចង្កូតមកខាងស្ដាំដៃជ្រុលទៅបុកដើមឈើមួយដើមបណ្ដាលឲ្យបាក់រាបដល់ដី រួចបន្តទៅបុកកន្លែងលក់បន្លែនិងកន្លែងលក់គុយទាវ បណ្តាលឲ្យរងខូចខាតសម្ភារៈលក់ដូរ រាយប៉ាយពេញផ្លូវ នឹងបណ្ដាលឲ្យក្មេងប្រុសម្នាក់រងរបួសដោយសាររលាកទឹកស៊ុប។

ក្រោយកើតហេតុ សមត្ថកិច្ចមូលដ្ឋានបានចុះមកដល់ទីតាំងខាងលើ ដោយភាគីបង្កធ្វើការសម្រុះសម្រួលគ្នាជាមួយខាងភាគីលក់បន្លែនិងកន្លែងលក់គុយទាវ ព្រមទាំងតំណាងក្មេងរងគ្រោះដើម្បីបញ្ចប់រឿងនៅកន្លែងកើតហេតុ ។ ប៉ុន្តែនៅឡើយដើមឈើដែលជាសម្បត្តិរដ្ឋ ទើបសមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញចរាចរណ៍ចុះមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយបន្តតាមច្បាប់៕