សាលាដំបូងរាជធានីភ្នំពេញ បើកសវនាការសំណុំរឿងឧកញ៉ា សង ថង និងអតីតអភិបាលរងខេត្តបាត់ដំបង លោក ស៊ូ អារ៉ាហ្វាត់ ដែលត្រូវ ACU ចាប់ខ្លួនពាក់ព័ន្ធរឿងដីធ្លី

ភ្នំពេញ៖ នៅព្រឹកថ្ងៃទី១៧ ខែឧសភា ឆ្នាំ២០២២នេះ សាលាដំបូងរាជធានីភ្នំពេញ បានលើកយកសំណុំរឿង ឧកញ៉ា សង ថន និងលោក ស៊ូ អារ៉ាហ្វាត់ អតីតអភិបាលរងខេត្តបាត់ដំបង មកធ្វើការជំនុំជម្រះ បន្ទាប់ពីជនត្រូវចោទទាំង២រូបនេះ ត្រូវបានតុលាការសម្រេចចោទប្រកាន់ និងបញ្ជូនទៅឃុំខ្លួន ក្នុងពន្ធនាគារកាលពីឆ្នាំ២០២០កន្លងទៅ ពាក់ព័ន្ធរឿងជម្លោះដីធ្លីមួយកន្លែង ស្ថិតនៅក្នុងស្រុកគាស់ក្រឡ ខេត្តបាត់ដំបង។

ក្នុងអង្គសវនាការនៅព្រឹកមិញនេះ រួមមាន លោក ពេជ្រ វិជ្ជាធរ ជាប្រធានក្រុមប្រឹក្សាជំនុំជម្រះ និងលោក សិត វណ្ណៈ ជាតំណាងអយ្យការ។

សូមបញ្ជាក់ថា លោកឧកញ៉ា សង ថន ត្រូវបានចាប់ខ្លួនដោយអង្គភាពប្រឆាំងអំពើពុករលួយ (ACU) កាលពីលា្ងចថ្ងៃទី២៧ ខែមិថុនា ឆ្នាំ២០២០ ពាក់ព័ន្ធការប្រព្រឹត្តអំពើពុករលួយ ក្នុងទំនាស់ដីធ្លីមួយ ក្នុងស្រុកគាស់ក្រឡ ខេត្តបាត់ដំបង។ មុនត្រូវចាប់ខ្លួនលោកឧកញ៉ារូបនេះ ត្រូវបានគេរាយការណ៍ថា លោកមានដីធ្លីប្រមាណជាង៥ពាន់ហិកតា ស្ថិតក្នុងស្រុកគាស់ក្រឡនេះផងដែរ។ អង្គភាពប្រឆាំងអំពើពុករលួយ បានលើកឡើងថា ការឃាត់ខ្លួនជនទាំងពីរនាក់នេះ គឺធ្វើឡើងបន្ទាប់ពីមានពាក្យបណ្តឹងរបស់ប្រជាពលរដ្ឋជាច្រើនគ្រួសារ។

លោកឧកញ៉ា សង ថន មានដីប្រមាណ៥ពាន់ហិកតាដែលដីនោះ គឺស្មើនឹង១ភាគ៤ នៃផ្ទៃដីទាំងមូលរបស់ស្រុកគាស់ក្រឡ ខេត្តបាត់ដំបង។ ជនជាប់ចោទដែលមានអាយុ៧០ឆ្នាំរូបនេះ ត្រូវបានចៅក្រមស៊ើបសួរសាលាដំបូងរាជធានីភ្នំពេញ បានសម្រេចឃុំខ្លួនក្រោមបទចោទប្រកាន់ចំនួន៤បទល្មើសរួមមាន៖ ១) បទប្រើប្រាស់ឯកសារសាធារណៈក្លែង ២) បទផ្តើមគំនិតក្នុងបទបំផ្លិចបំផ្លាញដោយចេតនា ៣) បទគៃបំបាត់ដោយទុច្ចរិត ៤) បទសូកប៉ាន់តាមក្រមព្រហ្មទណ្ឌ នៃព្រះរាជាណាចក្រកម្ពុជា។

ចំណែកអតីតអភិបាលរងខេត្តបាត់ដំបង លោក ស៊ូ អារ៉ាហ្វាត់ ត្រូវបានចោទប្រកាន់ពីបទបំផ្លាញដោយចេតនា និងបទកេងបំបាត់ដោយទុច្ចរិត និងបទស៊ីសំណូក។ ក្រោយសវនាការអស់ពេញមួយព្រឹកបានបញ្ចប់ តុលាការបានសម្រេចលើកយកសំណុំរឿងនេះ ទៅប្រកាសសាលក្រមនៅព្រឹកថ្ងៃទី១០ ខែមិថុនា ឆ្នាំ២០២២៕