ខ្មាន់កាំភ្លើងបាន ជិះរថយន្តមកបាញ់រះ ជាង១០គ្រាប់ទៅ លើអគារខនដូSKY LINE ក្នុងខណ្ឌ ៧មករា រួចគេចខ្លួនបាត់

ភ្នំពេញ៖សមត្ថកិច្ចបានអោយដឹងថា ខ្មាន់មួយក្រុមជិះរថយន្តចំនួន០២គ្រឿងមកឈប់រួចដកកាំភ្លើងបាញ់រះជាង ១០គ្រាប់ទៅលើអគារខនដូSKY LINEបង្កឲ្យមានការភ្ញាក់ផ្អើលដល់កម្លាំងសមត្ថកិច្ចចុះអន្តរាគមន៍ កាលពីវេលាម៉ោង៣យប់រំលងអធ្រាត្រឈាន ចូលថ្ងៃព្រហស្បតិ៏ ទី២០ ខែតុលា ឆ្នាំ២០២២ នៅតាមបណ្ដោយផ្លូវ១៣៤ ស្ថិតក្នុងសង្កាត់វាលវង់ ខណ្ឌ ៧មករា រាជធានីភ្នំពេញ។ តាមប្រភពពីកន្លែងកើតហេតុបានឲ្យដឹងថា មុនកើតហេតុគេឃើញជនសង្ស័យមួយក្រុមជិះរថយន្តចំនួនពីរគ្រឿងម៉ាកហ្វត ពណ៌ស និងម៉ាកអាលផាត ពណ៌ខ្មៅដោយមិនចាំស្លាកលេខ ដោយធ្វើដំណើរតាមបណ្ដោយផ្លូវ១៣៤ ទិសដៅពីកើតទៅលិច លុះមកដល់ចំណុចកើតហេតុខាងលើបានឈប់រថយន្តហើយជនសង្ស័យដែលជិះក្នុងរថយន្តហ្វត បានដកកាំភ្លើងបាញ់រះជាង១០គ្រាប់សំដៅទៅលើអគារខនដូSKY LINE បណ្ដាលឲ្យធ្លុះធ្លាយជាច្រើនកន្លែង ប៉ុន្តែមិនបង្កឲ្យមានអ្នក រងរបួសទេ។
ប្រភពដដែលបានបន្តទៀតថាក្រោយពីជនសង្ស័យបានធ្វើសកម្មភាពបាញ់រះជាច្រើនគ្រាប់រួចមកក៏បានបាចខិតប័ណ្ណជាច្រើនសន្លឹកដែលមានរូបថតមនុស្សម្នាក់និងមានអក្សរ៣សាសន៏ អក្សរចិន អក្សរវៀតណាម និងអក្សរខ្មែរ នៅនឹងកន្លែងកើតហេតុ រួចក៏នាំគ្នាបើករថយន្តទៅទិសខាងកើតគេចខ្លួនបាត់ស្រមោល។
បច្ចុប្បន្ននេះ សមត្ថកិច្ចកំពុងពិនិត្យជាក់ស្ដែង នៅទីតាំងកន្លែងកើតហេតុរួចបានប្រមូលវត្ថុតាងមួយចំនួនទុកប្រគល់ជូនមន្ត្រីជំនាញដើម្បីធ្វើការសាវជ្រាវចាប់ជនសង្ស័យមកផ្ដន្ទាទោសទៅតាមច្បាប់៕