រថយន្តបំផ្ទុះគ្រាប់បែក និងការបាញ់ប្រហារលើសណ្ឋាគារមួយនៅទីក្រុង Kismayu ប្រទេសសូម៉ាលី ដែលបណ្តាលឲ្យមនុស្សចំនួន ០៩នាក់បានស្លាប់
បរទេស ៖ កាលពីថ្ងៃអាទិត្យ មន្ត្រីក្នុងតំបន់បាននិយាយថា មានការប្រើរថយន្តបំផ្ទុះគ្រាប់បែក និងការបាញ់ប្រហារលើសណ្ឋាគារមួយក្នុងទីក្រុង Kismayu ប្រទេសសូម៉ាលី ដោយបានសម្លាប់មនុស្សចំនួន ០៩នាក់ មុនពេលកងកម្លាំងសន្តិសុខបញ្ចប់ការវាយប្រហារនៅសណ្ឋាគារ និងបានសម្លាប់ក្រុមអ្នកវាយប្រហារ ។
ការបាញ់កាំភ្លើងបានកើតឡើងបន្ទាប់ពីរថយន្តផ្ទុកគ្រឿងផ្ទុះមួយគ្រឿងបានបើកបុកចូលទៅក្នុងច្រកទ្វារសណ្ឋាគារ Tawakal នៃទីក្រុងជាប់កំពង់ផែ។ ក្រុមសកម្មប្រយុទ្ធ al Shabaab ដែលមានទំនាក់ទំនងនឹងក្រុមអាល់កៃដាបាននិយាយថា ខ្លួនបានធ្វើការវាយប្រហារនេះ។
លោក Yussuf Hussein Dhumal រដ្ឋមន្ត្រីសន្តិសុខប្រចាំតំបន់ Jubbaland បានប្រាប់សារព័ត៌មានរ៉យទ័រថា “នៅក្នុងការបំផ្ទុះនេះ សិស្ស និងជនស៊ីវិលចំនួន ០៩នាក់ ត្រូវបានសម្លាប់ និងចំនួន ៤៧នាក់ផ្សេងទៀតបានរងរបួស ដែលមួយចំនួនបានរងរបួសធ្ងន់ធ្ងរ”។
លោក Dhumal បាននិយាយថា “សណ្ឋាគារដែលបានបំផ្ទុះនោះស្ថិតនៅក្បែរសាលារៀន ដែលបណ្តាលឲ្យសិស្សជាច្រើននាក់បានរងរបួស” ហើយកងកម្លាំងសន្តិសុខបានសម្លាប់ក្រុមអ្នកវាយប្រហារចំនួន ០៣នាក់ ហើយអ្នកវាយប្រហារទី០៤ បានស្លាប់នៅក្នុងការបំផ្ទុះគ្រាប់បែក ៕
