ទំនាស់ដីធ្លីដ៍រាំរ៉ៃនៅស្រុកជើងព្រៃ ត្រូវបានបញ្ចប់ ក្រោមការដោះស្រាយរបស់ អភិបាលខេត្តកំពង់ចាម
ខេត្តកំពង់ចាម៖ ទំនាស់ដីធ្លីដ៍រាំរ៉ៃនៅភូមិតាសែន ឃុំសូទិព្វ ស្រុកជើងព្រៃ ដែលឈានទៅដល់ការបិទផ្លូវមិនអោយធ្វើចរាចរណ៍ថែមទៀតនោះ ត្រូវបានបញ្ចប់ហើយ ក្រោមការដោះស្រាយរបស់ លោក គួច ចំរើនអភិបាលខេត្តកំពង់ចាម ក្រោយពីមានប្រជាពលរដ្ឋប្រមាណ៥០គ្រួសារ បានស្នើអោយជួយ។
មន្ត្រីរដ្ឋបាលខេត្តកំពង់ចាម បានអោយដឹងថា លោកគួច ចំរើន អភិបាលខេត្តកំពង់ចាម នៅថ្ងៃទី១៧ ខែតុលា ឆ្នាំ២០១៨បានអញ្ជើញមកចូលរួមដោះស្រាយទំនាស់ដីធ្លី ដ៍រាំរ៉ៃយូរមកហើយ ដែលមានប្រជាពលរដ្ឋប្រមាណ៥០គ្រួសារ បានស្នើដល់អាជ្ញាធរជាពិសេស អភិបាលខេត្តកំពង់ចាម ជួយរកដំណោះស្រាយ និងជួយដោះស្រាយបើកផ្លូវឡើងវិញ ខណ:ដែលផ្លូវមួយខ្សែនេះមានតាំងពីសម័យមុនមកម្ល៉េះ តែបច្ចប្បន្ន ឈ្មោះ កែម សុផាន់ ហៅគ្រូ ឡុង ដែលជាចុងចោទ បានទិញដីធ្លីជុំវិញហើយបានសុំទិញដី ឈ្មោះ ស្រៀង សៀងលី ដែលជាដើមបណ្ដឹង មិនព្រមលក់ ក៍កើតមានបញ្ហានេះតែម្តង ដោយមានការប្តឹងផ្តល់គ្នាមិនចេះចប់រហូតបច្ចុប្បន្ននេះ ព្រឹកថ្ងៃទី១៧ ខែតុលា ឆ្នាំ២០១៨ លោក អភិបាលខេត្ត អញ្ជើញចុះទៅពិនិត្យមើលស្ថានភាព ផ្លូវ និងទីតាំងដែលមានទំនាស់ដីធ្លីផ្ទាល់តែម្តង។
ជាចុងបញ្ចប់ លោក អភិបាលខេត្ត ឯកភាពបើកផ្លូវមួយខ្សែនេះជូនប្រជាពលរដ្ឋដូចដើមវិញ បងប្អូនប្រជាពលរដ្ឋមានការសប្បាយរីករាយ និងអបអរសាទរយ៉ាងខ្លាំងចំពោះការយកចិត្តទុកដាក់របស់លោក អភិបាលខេត្ត ដែលបានបើកផ្លូវឲ្យដំណើការជាធម្មតាឡើងវិញ ៕
