គ្រួសារនៃសពកុមារីពីរនាក់បងប្អូន ដែលត្រូវបានគេសង្ស័យថា ជាករណីរំលោភហើយសម្លាប់ ទទួលបានអំណោយ មនុស្សធម៌ពីកាកបាទក្រហមកម្ពុជា
នៅថ្ងៃសុក្រ ទី ១៩ ខែតុលា ឆ្នាំ២០១៨ នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យមន្ត្រីក្រោមឱវាទ ចូលរួមរំលែកទុក្ខយ៉ាងក្រៀមក្រំ ព្រមទាំងនាំយកគ្រឿងបរិភោគ និងបច្ច័យចំនួន ២០លានរៀល ចូលបុណ្យសពកុមារីអភ័ព្វពីរនាក់បងប្អូន ដែលត្រូវបានគេសង្ស័យថា ជាករណីរំលោភហើយសម្លាប់ យ៉ាងអាណោចអាធ័មក្នុងខ្ទម ស្ថិតនៅភូមិថ្មី ឃុំផ្សារ ស្រុកបរិបូណ៌ ខេត្តកំពង់ឆ្នាំង ខណៈដែល ឪពុកទៅធ្វើការនៅប្រទេសថៃ រីឯម្តាយទៅធ្វើការនៅភ្នំពេញ ទុកកូនផ្ញើសាច់ញាតិក្នុងភូមិ។
ស្ថិតក្នុងសមានទុក្ខដ៏ក្រៀមក្រំនេះ កាកបាទក្រហមកម្ពុជា ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន សូមសម្តែងនូវការ សោកស្តាយជាពន់ពេក និងសូមចូលរួមរំលែកទុក្ខយ៉ាងក្រៀមក្រំ និងសូមឧទ្ទិសបួងសួងដល់វិញ្ញាណក្ខន្ធសពកុមារី អ៊ុល លក្ខិណា អាយុ ១៤ឆ្នាំ និងសពកុមារី អ៊ុល ធីតា អាយុ ៧ឆ្នាំ បានទៅកាន់សុគតិភព កុំបីឃ្លៀងឃ្លាតឡើយ។ ជាមួយគ្នានេះ សម្តេចកិត្តិព្រឹទ្ធបណ្ឌិត សូមអំពាវនាវដល់សមត្ថកិច្ចឱ្យវែកមុខ ជនដៃដល់មកផ្តទ្ទាទោស តាមផ្លូវច្បាប់។
ក្នុងឱកាសនេះដែរ កាកបាទក្រហមកម្ពុជា ថ្នាក់កណ្តាល បានចូលបុណ្យសពនូវ អង្ករ ២០០គីឡូក្រាម ត្រីខ ៧០កំប៉ុង មី ៧កេស ទឹកក្រូច ៧កេស ទឹកបរិសុទ្ធ ៧កេស និងបច្ច័យចំនួន ២០.០០០.០០០រៀល។ ដោយឡែក អនុសាខាកាកបាទក្រហមកម្ពុជា ស្រុកបរិបូណ៌ និងសាខាកាកបាទក្រហមកម្ពុជា ខេត្តកំពង់ឆ្នាំង ក៏បានចូលរួមរំលែកទុក្ខ និងចូលបុណ្យសព កុមារីទាំងពីរនាក់នេះដែរ៕
