តុលាការខេត្តព្រះសីហនុ ផ្ដន្ទាទោស ចិន៦នាក់ និងខ្មែរម្នាក់ ដាក់គុកម្នាក់ៗ២០ឆ្នាំ ករណីដឹកជញ្ជូនគ្រឿងញៀនជិត៩០០គីឡូក្រាម
ខេត្តព្រះសីហនុ ៖ សាលាដំបូងខេត្តព្រះសីហនុ បានសម្រេចដាក់ពន្ធនាគារ ជនជាតិចិន ៦នាក់ និងខ្មែរ ១នាក់ ក្នុងបទល្មើសគ្រឿងញៀន ដោយក្នុងម្នាក់ៗកំណត់រយៈពេល២០ឆ្នាំ និងពិន័យជាប្រាក់ក្នុងម្នាក់ៗចំនួន ៤០លានរៀល ។
យោងតាមសេចក្តីប្រកាសព័ត៌មានរបស់អ្នកនាំពាក្យសាលាដំបូងខេត្តព្រះសីហនុ នៅថ្ងៃទី៣១ ខែមករា ឆ្នាំ២០២៤ ស្តីពីការផ្តន្ទាទោសជនជាប់ចោទ ពាក់ព័ន្ធនឹងករណីគ្រឿងញៀន បានលើកឡើងថា កាលពីថ្ងៃទី០៩ ខែមករា ឆ្នាំ២០២៤ ក្រុមប្រឹក្សាជំនុំជម្រះ នៃសាលាដំបូងខេត្តព្រះសីហនុ បានបើកសវនាការជាសាធារណៈ ដើម្បីជំនុំជម្រះលើសំណុំរឿងព្រហ្មទណ្ឌលេខ៨១៦ ចុះថ្ងៃទី២០ ខែសីហា ឆ្នាំ២០២២ ពាក់ព័ន្ធនឹងបទល្មើស រក្សាទុក និងដឹកជញ្ជូនដោយខុសច្បាប់នូវសារធាតុញៀន (ទម្ងន់៨៧១គីឡូ២០០ក្រាម ប្រភេទកេតាមីន) និងបទល្មើស សម្អាតប្រាក់ ទៅតាមនីតិវិធីច្បាប់ និងបានកំណត់ពេលប្រកាសសាលក្រមនៅថ្ងៃទី៣១ ខែមករា ឆ្នាំ២០២៤ ។
អ្នកនាំពាក្យ បានលើកឡើងទៀតថា ក្រុមប្រឹក្សាជំនុំជម្រះសាលាដំបូងខេត្តព្រះសីហនុ បានប្រកាសសាលក្រមលេខ ២៧/០២ ក្រ១ “ក”ចុះថ្ងៃទី៣១ ខែមករា ឆ្នាំ២០២៤ ដោយសម្រេចផ្តន្ទាទោសដូចខាងក្រោម ៖
១-ឈ្មោះ កូណា (PHOU NA) ហៅ XIAO FU ឬ ម៉ាប់ ភេទប្រុស អាយុ៣៣ឆ្នាំ ជនជាតិខ្មែរ។
២-ឈ្មោះ តុង ពូជីន (DONG BU JUN) IN DONG XIAO CHUN ហៅ JUN GE ឬហៅ LAO DONG ភេទប្រុស អាយុ៤៧ឆ្នាំ ជនជាតិ ចិន។
៣-ឈ្មោះ យ៉ាង ស៊ីថុន (YAN XI TONG) ហៅ ឡាវ យៀន (LAO YAN) ភេទប្រុស អាយុ៥១ឆ្នាំជនជាតិចិន។
៤-ឈ្មោះ តុង ជាំងស៊ីន (DONG JIAN XIN) Ỉ AH SHU ភេទប្រុស អាយុ៧០ឆ្នាំ ជនជាតិចិន។
៥-ឈ្មោះ កូវ ជីពឹង (GAO ZHI BIN) ភេទប្រុស អាយុ៤៩ឆ្នាំ ជនជាតិចិន។
៦-ឈ្មោះ លី យ៉ុងស៊ីន (LI YONG XIN) ភេទប្រុស អាយុ៤៨ឆ្នាំ ជនជាតិចិន។
៧-ឈ្មោះ ចុង ជៀនលីន (ZHONG JIAN LIN) ភេទប្រុស អាយុ៣៧ឆ្នាំ ជនជាតិចិន។
អ្នកនាំពាក្យ បានបញ្ជាក់ថា ៖ “ដាក់ពន្ធនាគារ ក្នុងម្នាក់ៗកំណត់រយៈពេល ២០ឆ្នាំ និងពិន័យជាប្រាក់ក្នុងម្នាក់ៗចំនួន ៤០លានរៀល ពីបទ រក្សាទុក និងដឹកជញ្ជូនដោយខុសច្បាប់នូវសារធាតុញៀន និងបទ សម្អាតប្រាក់ ប្រព្រឹត្តនៅភូមិ៣ សង្កាត់លេខ១ ក្រុងព្រះសីហនុ ខេត្តព្រះសីហនុ កាលពីអំឡុងឆ្នាំ២០២១ រហូតដល់ថ្ងៃទី១៦ ខែសីហា ឆ្នាំ២០២២ បទល្មើសព្រហ្មទណ្ឌ ដែលមានចែងឲ្យផ្ដន្ទាទោសតាមមាត្រា៤៨ កថាខណ្ឌទី៦ ចំណុចទី១ នៃច្បាប់ស្តីពីការត្រួតពិនិត្យគ្រឿងញៀន និងមាត្រា៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទាន ភេរវកម្ម” ។
តុលាការបានសម្រេចរឹបអូសវត្ថុតាងចាប់យកមាន ៖ កប៉ាល់ ១គ្រឿង, អូប័រ ៥គ្រឿង, ទូកឈើ ១គ្រឿង, រថយន្ត ១គ្រឿង, ម៉ូតូ ៣គ្រឿង, ប្រាក់ដុល្លា ៩៥,៦៤៤.៨៦ USD (ប្រាំបួនម៉ឺនប្រាំពាន់ប្រាំមួយរយសែសិបបួន ក្បៀសប៉ែតសិបប្រាំមួយ ដុល្លារសហរដ្ឋអាមេរិក) និងគ្រឿងញៀនទាំងអស់ សម្រេចរឹបអូសបំផ្លាញចោល។ ចំពោះជនជាប់ចោទជាជនជាតិចិន ទាំង០៦នាក់ខាងលើ នឹងត្រូវបណ្តេញចេញពីព្រះរាជាណាចក្រកម្ពុជា បន្ទាប់ពីអនុវត្តទោសចប់ ។
សូមរម្លឹកថា អាជ្ញាធរខេត្តព្រះសីហនុ បានបើកប្រតិបត្តិការស្រាវជ្រាវបង្ក្រាបបទល្មើសគ្រឿងញៀនក្នុងលក្ខណៈទ្រង់ទ្រាយធំ ដោយឃាត់ខ្លួនជនសង្ស័យបានចំនួន៥នាក់ ដែលសុទ្ធសឹងតែជាជនជាតិចិន រួមទាំងរឹបអូសបានសារធាតុញៀនចំនួន ៨៨០កញ្ចប់ ឬស្មើនឹង៨៧១គីឡូនិង២០០ក្រាម។ ប្រតិបត្តិការនេះ ធ្វើឡើងនៅថ្ងៃទី១៦ ខែសីហា ឆ្នាំ២០២២ លើទីតាំងចំនួន៣កន្លែង ។
មុនឈានដល់ការបង្ក្រាបបានបទល្មើសគ្រឿងញៀននេះ អាជ្ញាធរពាក់ព័ន្ធបានស្រាវជ្រាវ និងស៊ើបអង្កេតអស់រយៈពេលជាង៣ខែមកហើយ លុះដល់ថ្ងៃទី១៦ ខែសីហា ឆ្នាំ២០២២ អាជ្ញាធរបានកំណត់ច្បាស់នៅពេលវេលាមុខសញ្ញាធ្វើសកម្មភាពប្រព្រឹត្តបទល្មើស។ ទើបកម្លាំងជំនាញ នៃមន្ទីរប្រឆាំងបទល្មើសគ្រឿងញៀន បើកកិច្ចប្រតិបត្តិការបង្ក្រាប ដោយបានស្នើសុំអន្តរាគមន៍ពីកម្លាំងស្នងការដ្ឋាននគរបាលខេត្តព្រះសីហនុ និងកម្លាំងនាយកដ្ឋាននគរបាលព្រំដែនទឹក
(កោះព្រាប) ចូលរួមសហការបង្ក្រាប ដោយមានការសម្របសម្រួលពីលោក ហួត វិចិត្រ ព្រះរាជអាជ្ញារង នៃអយ្យការអមសាលាដំបូងខេត្តព្រះសីហនុ ដោយបើកប្រតិបត្តិការបង្ក្រាប៣គោលដៅផ្សេងៗគ្នា ។
- គោលដៅទី១៖ ស្ថិតនៅចំណុច ក្រុម១១ ភូមិ៣ សង្កាត់១ ក្រុងព្រះសីហនុ ឃាត់ខ្លួនជនសង្ស័យបានចំនួនម្នាក់ ដកហូតអូប័រ១គ្រឿង ទូកយន្ត១គ្រឿង និងសារធាតុញៀនប្រភេទកេតាមីនចំនួន៤៤ការ៉ុង ។
- គោលដៅទី២៖ នៅចំណុច ក្រុម២ ភូមិ៣ សង្កាត់៣ ក្រុងព្រះសីហនុ ឃាត់ខ្លួនជនសង្ស័យ០៣នាក់ និងរឹបអូសបានម៉ូតូចំនួន២គ្រឿង។
- គោលដៅទី៣៖ ស្ថិតនៅចំណុចភូមិគគី សង្កាត់បិតត្រាង ស្រុកព្រៃនប់ ឃាត់ខ្លួនជនសង្ស័យម្នាក់ និងរឹបអូសរថយន្ត១គ្រឿង ៕
