បុរសម្នាក់ ត្រូវក្របីដេញវ័ធធ្លាយពោះវៀនស្លាប់ ខណៈចូលដេញក្របី កំពុងស៊ីស្រូវ

ខេត្តព្រៃវែង ៖ បុរសម្នាក់ត្រូវបានក្របីមួយក្បាលដេញវ័ធ បណ្ដាលឱ្យធ្លាយពោះវៀនស្លាប់បាត់បង់ជីវិតយ៉ាងអាណោចអាធ័ម និងបុរសម្នាក់ទៀត រងរបួសស្រាល ខណៈចូលដេញក្របីកំពុងស៊ីស្រូវ ។

ហេតុការណ៍នេះ បានកើតឡើងនៅវេលាម៉ោង ១៣ និង ១០នាទី ថ្ងៃទី២ ខែកុម្ភៈ ឆ្នាំ២០២៤ ស្ថិតនៅចំណុចព្រែកបត់ ក្នុងភូមិដង្កៀបក្ដាម ឃុំពាមមន្ទារ ស្រុកកំពង់ត្របែក ខេត្តព្រៃវែង ។

ជនរងគ្រោះ ២នាក់ មានឈ្មោះ ហោ វណ្ណៈ ហៅចន្រ្ទា ភេទប្រុស អាយុ ៣៥ឆ្នាំ មានទីលំនៅភូមិដង្កៀបក្តាម ឃុំពាមមន្ទារ ស្រុកកំពង់ត្របែក ខេត្តព្រៃវែង រងរបួស ៣ កន្លែងត្រង់ចិញ្ចើមខាងស្ដាំ ទ្រូងខាងស្ដាំ និងធ្លាយពោះផ្នែកខាងស្ដាំ បណ្ដាលឱ្យស្លាប់បាត់បង់ជីវិត និងជនរងគ្រោះម្នាក់ទៀតមានឈ្មោះ បេង សុធម៌ ភេទប្រុស អាយុ ៤៤ឆ្នាំ រស់នៅភូមិដង្កៀបក្តាម ឃុំពាមពទ្វារ ស្រុកកំពង់ត្របែក ខេត្តព្រៃវែង រងរបួសស្រាល ។

គួរបញ្ជាក់ថា នៅមុនពេលកើតហេតុ ក្របីញីមួយក្បាលដាច់ខ្សែ បោលចេញពីចំណុចបេនលក់គោ-ក្របី ស្វាយអាង៉ោង ស្ថិតនៅភូមិរោង ឃុំចាម ស្រុកកំពង់ត្របែក ខេត្តព្រៃវែង ម្ចាស់ក្របីឈ្មោះ កុយ ណុច ភេទប្រុស អាយុ ៤៤ឆ្នាំ មានទីលំនៅភូមិជីពាយ ឃុំចាម ស្រុកកំពង់ត្របែក ខេត្តព្រៃវែង ។

ក្របីនេះបានបោលបាត់តាំងពីល្ងាចថ្ងៃទី១ ខែកុម្ភៈ ឆ្នាំ២០២៤ មកម្ល៉េះ ។ លុះមកដល់រសៀលថ្ងៃទី២ ខែកុម្ភៈ ឆ្នាំ២០២៤ បានចូលមកស៊ីស្រូវប្រាំងរបស់ប្រជាពលរដ្ឋ នៅចំណុចព្រែកបត់ ស្ថិតក្នុងភូមិដង្កៀបក្ដាម ឃុំពាមមន្ទារ ស្រុកកំពង់ត្របែក ខណៈនោះជនរងគ្រោះឈ្មោះ ហោ វណ្ណៈ ហៅ ចន្រ្ទា បានទៅដេញឱ្យចេញពីស្រែ តែចៃដន្យក្របីមិនចេញ ថែមទាំងដេញវ័ធរហូតដល់ស្លាប់ ចំណែកជនរងគ្រោះម្នាក់ទៀត ត្រូវក្របីដេញវ័ធដែរ តែរត់រួចរងរបួសស្រាល ។

ក្រោយទទួលបានព័ត៌មានខាងលើ កម្លាំងនគរបាលជំនាញ នៃអធិការដ្ឋាននគរបាលស្រុកកំពង់ត្របែក បានចុះដល់ទីតាំងកើតហេតុ ពិនិត្យ ធ្វើកោសល្យវិច័យយ៉ាងយកចិត្តទុកដាក់ ជាលទ្ធផល ជនរងគ្រោះពិតជាបានស្លាប់ដោយសារក្របីវ័ធពិតប្រាកដមែន ។
បច្ចុប្បន្ន សពជនរងគ្រោះ ត្រូវបានប្រគល់ជូនសាច់ញាតិយកទៅធ្វើបុណ្យតាមប្រពៃណី ៕