ក្រសួងមុខងារសាធារណៈ បញ្ចប់ដំណើរការប្រឡងប្រជែងជ្រើសរើសគ្រូបងៀនឯកទេសអប់រំកាយ និងកីឡា

ភ្នំពេញ ៖ ក្រសួងមុខងារសាធារណៈនៅថ្ងៃអង្គារ ទី៦ ខែកុម្ភៈ ឆ្នាំ២០២៤ បានចេញសេចក្តីប្រកាសព័ត៌មានស្ដីពី ការបញ្ចប់ដំណើរការប្រឡងប្រជែងជ្រើសរើសគ្រូបងៀនឯកទេសអប់រំកាយ និងកីឡា ។

គណៈកម្មការរៀបចំការប្រឡងប្រជែងជ្រើសរើសមន្ត្រីរាជការជាគ្រូបង្រៀនឱ្យបម្រើការក្នុងក្របខណ្ឌ ក្រសួងអប់រំ យុវជន និងកីឡា សូមជម្រាបជូនសាធារណជនជ្រាបថា ដំណើរការនៃការប្រឡងប្រជែង ជ្រើសរើស គ្រូបង្រៀនឯកទេសអប់រំកាយ និងកីឡា បានបញ្ចប់ដោយជោគជ័យ នារសៀលថ្ងៃចន្ទ ទី៥ ខែកុម្ភៈ ឆ្នាំ២០២៤ ប្រកបដោយវិន័យ សណ្តាប់ធ្នាប់ និងសុក្រឹតភាព ស្ថិតក្រោមការតាមដានមើលរបស់អ្នកសង្កេតការណ៍ និងអ្នកសារព័ត៌មាន ដោយឈរលើគោលការណ៍ គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព ។

ដំណើរការប្រឡងវិញ្ញាសាសំណេរ បានប្រព្រឹត្តទៅនាសម័យប្រឡងថ្ងៃទី២៨ ខែមករា ឆ្នាំ២០២៤ នៅ សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ដោយមានបេក្ខជនប្រឡងចំនួន ១៧៤៦ នាក់ និង បេក្ខជនអវត្តមាន ១៤៦ នាក់ (ស្រី៤៦ នាក់) ហើយដំណើរការកែសន្លឹកកិច្ចការ បានប្រព្រឹត្តទៅនៅមណ្ឌល កំណែសាលាភូមិន្ទរដ្ឋបាល ចាប់ពីព្រឹកថ្ងៃទី២៩ ខែមករា ឆ្នាំ២០២៤។
សម្រាប់ការប្រឡងវិញ្ញាសាអនុវត្តន៍កីឡា បានចាប់ផ្តើមពីរសៀលថ្ងៃទី២៩ ខែមករា ឆ្នាំ២០២៤ នៅវិទ្យាស្ថានជាតិអប់រំកាយ និងកីឡា ដោយមានបេក្ខជន ប្រឡងចំនួន ១៧២៤ នាក់ និងបេក្ខជនអវត្តមាន១៦៨ នាក់ (ស្រី ៥៣ នាក់) ។

គណៈកម្មការ បានបូកស្រង់ពិន្ទុដោយធ្វើការរៀបលំដាប់ពិន្ទុពីធំទៅតូច និងតាមទីកន្លែងបំពេញការងារ ដែលបេក្ខជនបានជ្រើសរើសនៅពេលដាក់ពាក្យប្រឡងប្រជែង។ លទ្ធផលបេក្ខជនជាប់ជាស្ថាពរ ១០០ នាក់ ដោយក្នុងចំណោមនោះ៖ កម្រិតបណ្តុះបណ្តាល ១២+២ ចំនួន ៧៥ នាក់ (ស្រ្តី ០៧ នាក់) បែងចែកក្នុងខេត្ត ចំនួន២០ ក្នុងនោះ ទៅវិទ្យាល័យចំនួន២១ និងអនុវិទ្យាល័យ ៥៤ ទីតាំង និងកម្រិតបណ្តុះបណ្ដាល ១២+៤ ចំនួន ២៥ នាក់ ( ស្ត្រី ០១ នាក់) បែងចែកក្នុងខេត្តចំនួន១៣ ក្នុងនោះ ទៅវិទ្យាល័យចំនួន១៥ និងអនុវិទ្យាល័យ ១០ ទីតាំង ។ បេក្ខជន ១០០ នាក់ដែលបានជ្រើសរើស គឺសម្រាប់ខេត្តគោលដៅចំនួន ២១ ។ គណៈកម្មការ ក៏ បានជ្រើសរើសបេក្ខជនជាប់បម្រុងចំនួន ១០ នាក់ ក្នុង០១ ខេត្ត លើកលែងខេត្តមណ្ឌលគិរី មានបេក្ខជនជាប់ បម្រុងចំនួន ០៦ នាក់ និងខេត្តស្ទឹងត្រែងចំនួន ០៨ នាក់។

គណៈកម្មការរៀបចំការប្រឡង បានប្រកាសបញ្ជីលទ្ធផលបេក្ខជនជាប់ជាស្ថាពរ សាធារណៈ តាមគេហទំព័រផ្លូវការរបស់ក្រសួងមុខងារសាធារណៈ ក្រសួងអប់រំ យុវជន និងកីឡា និងយន្តការផ្សព្វផ្សាយ នានាផងដែរ។ ទន្ទឹមនឹងនេះ គណៈកម្មការរៀបចំការប្រឡង ក៏បានគូសបញ្ជាក់សម្គាល់ជូនបេក្ខជនជាប់ ជាស្ថាពរ ចំពោះនីតិវិធីបន្តបន្ទាប់ពីការប្រកាសលទ្ធផល ដោយក្នុងរយៈពេល១ (មួយ) សប្ដាហ៍ ត្រឹមថ្ងៃទី ១២ ខែកុម្ភៈ ឆ្នាំ២០២៤ វេលាម៉ោង ១៧៖០០ ជាកំហិត បេក្ខជនដែលបានប្រឡងជាប់ជាស្ថាពរត្រូវផ្ដល់ការ បញ្ជាក់ទទួលយកក្របខណ្ឌនៅទីកន្លែងការងារដែលបានជ្រើសរើស មកអគ្គនាយកដ្ឋានគ្រប់គ្រងមុខងារ សាធារណៈ តាមរយៈទូរស័ព្ទ /តេឡេក្រាម ០៨៩ ៨៣៩ ១៣៨ ។ ជាមួយគ្នានេះ បេក្ខជនដែលមិនអស់ចិត្ត ចំពោះលទ្ធផល និងមានបំណងស្នើសុំការពិនិត្យសន្លឹកកិច្ចការរបស់ខ្លួន អាចដាក់ជាលាយលក្ខណ៍អក្សរមកអគ្គនាយកដ្ឋានគ្រប់គ្រងមុខងារសាធារណៈ នៃក្រសួងមុខងារសាធារណៈ។

ក្រសួងមុខងារសាធារណៈ នឹងចេញសេចក្តីសម្រេចទទួលស្គាល់បេក្ខជនជាផ្លូវការ ដើម្បីបន្តនីតិវិធី នៃការរៀបចំការបណ្តុះបណ្តាលនៅវិទ្យាស្ថានជាតិអប់រំកាយ និងកីឡា និងផ្ដល់ក្របខណ្ឌស្របតាមលិខិត បទដ្ឋានជាធរមាន។ សូមជម្រាបជូនផងដែរថា បន្ទាប់ពីក្រសួងអប់រំ យុវជន និងកីឡា បានចាប់ផ្តើមបណ្តុះបណ្តាល ហើយករណីមានបេក្ខជនជាប់ជាស្ថាពរបោះបង់ក្របខណ្ឌ ក្រសួងអាចជ្រើសរើសយកបេក្ខជន ជាប់បម្រុងដែលមានពិន្ទុខ្ពស់ជាងគេក្នុងខេត្ត ដើម្បីជំនួសបាន។ ការជ្រើសរើសជំនួសនេះ អាចអនុវត្ត បានតែក្នុងរយៈពេល (២) សប្តាហ៍ បន្ទាប់ពីការបណ្តុះបណ្តាលចាប់ផ្តើមតែប៉ុណ្ណោះ។

ការប្រឡងប្រជែងជ្រើសរើសគ្រូបង្រៀនឯកទេសអប់រំកាយ និងកីឡា ជាការប្រឡងប្រជែង
ជ្រើសរើសមន្ត្រីរាជការតាមប្រព័ន្ធប្រឡងប្រជែងថ្មីដែលជាវិធានគន្លឹះក្នុងការកែទម្រង់រដ្ឋបាលសាធារណៈ របស់រាជរដ្ឋាភិបាល អាណត្តិទី៧ នៃរដ្ឋសភា ក្រោមការដឹកនាំដ៏ខ្ពង់ខ្ពង់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីធានាបាននូវការផ្ដល់ឱកាស ស្មើៗគ្នា និងពង្រីកឱកាសបន្ថែម ជូនដល់យុវជន និងសាធារណជន ក្នុងការចូលរួមប្រឡងប្រជែងក្លាយ ខ្លួនជាមន្ត្រីរាជការបម្រើប្រទេសជាតិ និងប្រជាជន ប្រកបដោយសមត្ថភាព និងមានវិជ្ជាជីវៈពិតប្រាកដ។ ការប្រឡងប្រជែងនេះដែរ មានការចូលរួមពីថ្នាក់ដឹកនាំអន្តរក្រសួង-ស្ថាប័ន អនុគណៈកម្មការជំនាញ និង អ្នកសារព័ត៌មាន ដើម្បីធ្វើជាសាក្សីក្នុងដំណើរការប្រឡងតាំងពីថ្ងៃចាប់ផ្តើម រហូតដល់ថ្ងៃបញ្ចប់ប្រកាសលទ្ធផល។

គណៈកម្មការរៀបចំការប្រឡងប្រជែងជ្រើសរើសមន្ត្រីរាជការជាគ្រូបង្រៀនឱ្យបម្រើការក្នុងក្របខណ្ឌ ក្រសួងអប់រំ យុវជន និងកីឡា សូមថ្លែងអំណរគុណដល់ស្ថាប័ន អង្គភាពពាក់ព័ន្ធ និងក្រុមការងារទាំងអស់នៃ ក្រសួងមុខងារសាធារណៈ, ក្រសួងអប់រំ យុវជន និងកីឡា, ក្រសួងសេដ្ឋកិច្ច និងហិរញ្ញវត្ថុ, អង្គភាពប្រឆាំង អំពើពុករលួយ, សហភាពសហព័ន្ធយុវជនកម្ពុជា, តំណាងសាកលវិទ្យាល័យ, អ្នកសង្កេតការណ៍, សាកល វិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច, សាលាភូមិន្ទរដ្ឋបាល,អាជ្ញាធរមូលដ្ឋាន មន្ត្រីសុខាភិបាល និងអ្នកសារព័ត៌មាន ដែលបានចូលរួមជាចលករនាំឱ្យដំណើរការប្រឡងប្រជែងប្រព្រឹត្តទៅបានដោយជោគជ័យ គួរជាទីមោទនៈ ហើយឆ្លើយតបជាមួយគោលការណ៍កែទម្រង់រដ្ឋបាលសាធារណៈ ដែលមានចែងក្នុងយុទ្ធសាស្ត្រ បញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា៕