អគ្គីភ័យឆាបឆេះលំនៅឋាន អស់៥ខ្នងនៅក្បែររោងចក្រអគ្គិសនីកម្ពុជា ផ្សារតូច
ភ្នំពេញ ៖ ផ្ទះប្រជាពលរដ្ឋចំនួន៥ខ្នង ស្ថិតនៅក្រោយរោងចក្រអគ្គិសនីនៅកម្ពុជា (ផ្សារតូច) ត្រូវបានអគ្គិភ័យឆាបឆេះយ៉ាងសន្ធោសន្ធៅរងការខូចខាតទាំងស្រុង ហើយរថយន្តពន្លត់អគ្គិភ័យជាច្រើនគ្រឿងបានទៅអន្តរាគមន៍បាញ់ពន្លត់ កាលពីវេលាម៉ោងប្រមាណ១និង៣០នាទីរសៀល ថ្ងៃទី១៤ ខែកុម្ភៈ ឆ្នាំ២០២៤នេះនៅក្នុងភូមិដើមខ្វិត សង្កាត់ទួលសង្កែទី១ ខណ្ឌឬស្សីកែវ រាជធានីភ្នំពេញ ។
តាមសាក្សីបានអោយដឹងថា នៅមុនពេលកើតហេតុ គេឃើញភ្លើង បានឆាបឆេះចេញពីផ្ទះ១ខ្នងធ្វើពីថ្មក្រោមឈើលើប្រក់ស័ង្កសី យ៉ាងសន្ធោសន្ធៅហើយបានឆេះរាលដាលទៅដល់លំនៅឋានជាច្រើនខ្នងទៀត ដែលធ្វើអំពីឈើនៅជាប់ៗនោះ ។
តាមនគរបាលបានអោយដឹងជាជំហានដំបូងថា លំនៅឋានធ្វើពីឈើប្រក់សង្ក័សី ដែលសង់ជាប់ៗគ្នា ចំនួន៥ខ្នង ត្រូវភ្លើងឆេះរងការខូចខាតទាំងស្រុង រួមជាមួយសម្ភារៈមួយចំនួនទៀត ។ នៅក្នុងហេតុការណ៍ រថយន្តពន្លត់អគ្គិភ័យជាច្រើនគ្រឿងបានទៅអន្តរាគមន៍ ។
ចំពោះមូលហេតុពុំទាន់ដឹងនោះទេ ខណៈសមត្ថកិច្ចជំនាញកំពុងធ្វើការស្រាវជ្រាវ ៕
