ព្រឹកថ្ងៃនេះសម្តេចធិបតី ហ៊ុន ម៉ាណែត អញ្ជើញសម្ពោធដាក់ឱ្យប្រើប្រាស់ អគារស្នាក់នៅរបស់គ្រូ និងប្រគល់សញ្ញាបត្រជូនគរុសិស្ស-និស្សិត នៅវិទ្យាស្ថានគរុកោសល្យរាជធានីភ្នំពេញ

ភ្នំពេញ៖នៅព្រឹកថ្ងៃព្រហស្បតិ៍ ១៣រោច ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៤ ខែកក្កដា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋ មន្ត្រីកម្ពុជា អញ្ជើញជាអធិបតីសម្ពោធដាក់ឱ្យប្រើប្រាស់អគារ ស្នាក់នៅរបស់គ្រូ ព្រមទាំងប្រគល់សញ្ញបត្រជូនគរុសិស្ស-និស្សិត នៅវិទ្យាស្ថានគរុកោសល្យរាជធានីភ្នំពេញ។

របាយការណ៍របស់ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រីរដ្ឋមន្ត្រីក្រសួងអប់រំ យុវជន និងកីឡា បានឱ្យដឹងថា អគារស្នាក់នៅរបស់គ្រូ (អន្តេវាសិកដ្ឋានគ្រូ) មានចំនួន ១ខ្នង កម្ពស់ ៤ជាន់ ស្មើនឹង ៧០បន្ទប់ ជាអំណោយរបស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា។

ដោយឡែកគរុនិស្សិត គរុសិស្សជ័យលាភី ដែលទទួលសញ្ញាបត្រវិជ្ជាជីវៈគ្រូបង្រៀននៅ ថ្ងៃនេះ មានចំនួនសរុប ២៦៦នាក់ ស្រី ១៨១នាក់។ ក្នុងនោះគរុនិស្សិតថ្នាក់បរិញ្ញា បត្រ (១២+៤) ចំនួន ២៤៣នាក់ ស្រី ១៧២នាក់ និងគរុសិស្ស (១២+២) ចំនួន ២៣នាក់ ស្រី៩នាក់។ គរុសិស្ស-និស្សិតនេះ បានបញ្ចប់ការសិក្សាដោយជោគជ័យ កាល ពីឆ្នាំសិក្សា២០២២-២០២៣កន្លងទៅ។

សូមបញ្ជាក់ថា វិទ្យាស្ថានគរុកោសល្យរាជធានីភ្នំពេញ ត្រូវបានបង្កើតឡើងនៅថ្ងៃទី២២ ខែឧសភា ឆ្នាំ២០១៧ ដែលដើមឡើយជាអតីតមជ្ឈមណ្ឌលគរុកោសល្យ ភូមិភាគរាជ ធានី ភ្នំពេញ និងសាលាគរុកោសល្យនិងវិក្រឹតការរាជធានីភ្នំពេញ។

វិទ្យាស្ថានមានភារ កិច្ចបណ្ដុះ បណ្ដាលគ្រូបង្រៀនថ្នាក់បរិញ្ញាបត្រអប់រំ តាមប្រព័ន្ធ ១២+៤ និងធ្វើវិក្រឹតការគ្រូបង្រៀនសម្រាប់កម្រិតបឋមសិក្សា និងកម្រិតមូលដ្ឋាន បង្រៀន នៅអនុវិទ្យាល័យ។ នៅឆ្នាំ ២០២២ វិទ្យាស្ថានគរុកោសល្យរាជធានីភ្នំពេញ បានទទួលស្គាល់ជាគ្រឹះស្ថានឧត្តមសិក្សា ដែលមានឋានៈស្មើ អគ្គនាយកដ្ឋាន។

តាមរយៈការអនុវត្តកំណែទម្រង់គ្រឹះស្ថានបណ្តុះបណ្តាលគ្រូបង្រៀន វិទ្យាស្ថានគរុ កោ សល្យ រាជធានីភ្នំពេញ បានខិតខំធ្វើការអភិវឌ្ឍលើគ្រប់រូបភាពទាំងខាងផ្នែករឹង និង ផ្នែកទន់ ដោយមានការគាំទ្រពីជំនួយហិរញ្ញប្បទានឥតសំណងរបស់ រាជរដ្ឋាភិបាល និង ប្រជាជនជប៉ុន តាមរយៈស្ថានទូតជប៉ុនប្រចាំកម្ពុជា និងទីភ្នាក់ងារ JICA រួមជាមួយក្រសួងអប់រំ យុវជន និងកីឡា និងអង្គការដៃគូអភិវឌ្ឍនានាផ្សេងទៀត។

ក្នុងនោះវិទ្យាស្ថានគរុកោសល្យរាជធានីភ្នំពេញ ទទួលបានការសាងសង់អគារថ្មីចំនួន៤ ដែលបំពាក់ដោយសម្ភារបរិក្ខារទំនើបសម្រាប់បម្រើដល់ការបង្រៀន និងរៀនរបស់ គ្រូឧទ្ទេស គរុនិស្សិត និងបុគ្គលិកអប់រំទាំងអស់ក្នុងវិទ្យាស្ថាន។ អគារទាំងនោះរួមមាន៖
១) អគាររដ្ឋបាលកម្ពស់ ៣ជាន់ ចែកចេញជា ១៧បន្ទប់, ២) អគារកម្ពស់ ២ជាន់ ចែកចេញជា ៧បន្ទប់ ប្រើប្រាស់ជាបន្ទប់ពិសោធន៍ផ្នែកវិទ្យាសាស្រ្ត, បន្ទប់ប្រតិបត្តិគេហកិច្ច និងសិល្បៈ, ៣) អគារកម្ពស់២ជាន់ ប្រើប្រាស់ជាបណ្ណាល័យ និងបន្ទប់សិក្សាផ្នែកបច្ចេកវិទ្យាព័ត៌មាននិងទូរគមនាគមន៍, ៤) សាលពហុបំណងកម្ពស់ ១ជាន់ ប្រើប្រាស់ជាសាលសម្រាប់រៀបចំកិច្ចប្រជុំ, សន្និសីទ, ការតាំងពិពណ៌ស្នាដៃប្រចាំឆ្នាំរបស់គរុនិស្សិត, ការសម្ដែងសិល្បៈ, ឬអាចប្រើជាសាលកីឡា រួមមានបាល់ទះ, បាល់បោះ, និងវាយសីជាដើម។

ទន្ទឹមគ្នាការអភិវឌ្ឍផ្នែករឹង វិទ្យាស្ថានគរុកោសល្យរាជធានីភ្នំពេញ បានសហការជាមួយអង្គភាពពាក់ព័ន្ធ និងដៃគូអភិវឌ្ឍនានា អភិវឌ្ឍលើផ្នែកទន់ផងដែរ ដើម្បីពង្រឹងគុណភាពបង្រៀន និងរៀន។

គិតមកត្រឹមឆ្នាំសិក្សា២០២២-២០២៣ នេះ វិទ្យាស្ថានគរុកោសល្យរាជធានីភ្នំពេញ បាន បញ្ចប់ការបណ្ដុះបណ្ដាលគ្រូបង្រៀនសម្រាប់កម្រិតបឋមសិក្សាសរុប ៤១៨នាក់ ស្រី ៣៤៤នាក់ និងគ្រូបង្រៀនកម្រិតមូលដ្ឋានសរុប ៤៧២នាក់ ស្រី ២៧៤នាក់ និងបានផ្ដល់កម្មវិធីលើកកម្ពស់គុណវុឌ្ឍិដល់គ្រូឧទ្ទេសមកពីសាលាគរុកោសល្យចំនួន ៦៧នាក់ ស្រី ៣២នាក់។

បច្ចុប្បន្នគរុនិស្សិតកំពុងបន្តការសិក្សាឆ្នាំទី៣ សរុប ២៤៩នាក់ ស្រី១៨៤នាក់៕