គណបក្សកុំម្មុយនីស្តវៀតណាមដកហូតតំណែងឧបនាយករដ្ឋមន្ត្រីម្នាក់ទៀតពីបទពុករលួយ, តែងតាំងឧបនាយករដ្ឋមន្ត្រីថ្មី៣រូប
ទីក្រុងហាណូយ៖ គណបក្សកុំម្មុយនីស្តវៀតណាមថ្មីៗទើបតែដកតំណែងឧបនាយករដ្ឋមន្ត្រីរបស់ខ្លួនម្នាក់ពីបទធ្វើខុសនឹងវិធានការប្រឆាំងអំពើពុករលួយ។ ការដកតំណែងនេះធ្វើឡើងតាមយន្តការរបស់រដ្ឋសភាដែលបោះឆ្នោតដកសេចក្ដីទុកចិត្ត។ នេះជាការបង្ហាញថាទោះបីលោកង្វៀនហ៊្វូជុង ដែលជាអតីតអគ្គលេខាធិការបក្សកុម្មុយនិស្តវៀតណាម បានទទួលអនិច្ចកម្មហើយ ហើយលោកតូ ឡឹមស្នងតំណែងបន្ត។ ប៉ុន្តែយុទ្ធនាការប្រឆាំងអំពើពុករលួយត្រូវតែបន្តធ្វើឡើងដូចភ្លៀងរលឹមរដូវវស្សា។ នេះជាការបញ្ជាក់ថាលោកតូ ឡឹមនឹងស្នងមរតកនយោបាយបន្តពីលោកង្វៀនហ៊្វូជុង។
នេះជាការបញ្ជាក់ថាលោកតូ ឡឹមនឹងស្នងមរតកនយោបាយបន្តពីលោកង្វៀនហ៊្វូជុង។ នៅក្នុងករណីដកតំណែងលើកនេះគេនៅរក្សាកិត្តិយស និងទុកមុខទុកមាត់ឱ្យឧបនាយករដ្ឋមន្ត្រីឈ្មោះឡេមិញខាយ (Le Minh Khai)។ ដូច្នេះ គេសុខចិត្តដកចេញក្រោមរូបភាពជាការដាក់ពាក្យសូមលាឈប់ពីតំណែង។ ប៉ុន្តែមិនយកទោសពៃរ៍ដល់ថ្នាក់ចាប់ដាក់ពន្ធនាគារនោះទេ។
លោកឡេមិញខាយ (Le Minh Khai) ដែលត្រូវបានដកតំណែងរដ្ឋសភាបានទទួលយកសំណើលាឈប់នេះរួចហើយ បន្ទាប់ពីគណៈមជ្ឈិមបក្សកុម្មុយនិស្តវៀតណាមបានទទួលយកពាក្យលាឈប់តាំងពីដើមខែសីហា។ លោកឡេមិញខាយជាអ្នករ៉ាប់រងខាងសេដ្ឋកិច្ច។ កាលពីខែមិថុនា គាត់បានស្នើសុំឱ្យប្រទេសអាមេរិកទទួលស្គាល់វៀតណាមជាប្រទេសសេដ្ឋកិច្ចទីផ្សារ។ លោកខាយត្រូវទទួលរងពិន័យនេះក្រោយការស៊ើបអង្កេតទៅលើគម្រោងអភិវឌ្ឍរមណីយដ្ឋានដាយនិញនៅខេត្តឡាំដុង។ នេះបើតាមព័ត៌មានបង្ហោះនៅលើគេហទំព័ររបស់រដ្ឋាភិបាល។
ការស៊ើបអង្កេតនេះនាំទៅដល់ការចាប់ខ្លួនលោកម៉ៃធានឌុង (Mai Tien Dung) ជាអតីតប្រធានខុទ្ទកាល័យរដ្ឋាភិបាលកាលពីខែឧសភា។ បក្សកុម្មុយនិស្តវៀតណាមរកឃើញថាខុទ្ទកាល័យនេះបានប្រព្រឹត្តខុសនឹងបទបញ្ជារបស់បក្សដោយហ៊ានអនុញ្ញាតឱ្យពង្រីកគម្រោងអភិវឌ្ឍតំបន់លំហែកាយនោះ។ នេះបើយោងតាមសេចក្ដីថ្លែងការណ៍ចុះថ្ងៃទី១៣ ខែសីហាដែលគេបង្ហោះនៅលើគេហទំព័ររបស់រដ្ឋាភិបាល។ លោកខាយធ្លាប់ធ្វើជាប្រធានខុទ្ទកាល័យនោះចាប់ពីឆ្នាំ២០១៨ដល់ឆ្នាំ២០២១។
លោកម៉ៃធានឌុង (Mai Tien Dung) ជាអតីតប្រធានខុទ្ទកាល័យរដ្ឋាភិបាលដែលត្រូវចាប់ខ្លួនកាលពីខែឧសភាក្រៅពីបោះឆ្នោតដកតំណែងលោកឡេមិញខាយរួចហើយ សភាវៀតណាមក៏បោះឆ្នោតដកតំណែងឧបនាយករដ្ឋមន្ត្រីម្នាក់ទៀតឈ្មោះតាន់លូកួង។ គាត់ជាប្រធានគណៈកម្មការសេដ្ឋកិច្ចរបស់បក្សកុម្មុយនិស្តវៀតណាម។ ជាមួយគ្នានេះ សភាបានបោះឆ្នោតតែងតាំងឧបនាយករដ្ឋមន្ត្រីបីរូបជំនួសអ្នកខាងលើនេះ។ ទី១-រដ្ឋមន្ត្រីការបរទេស លោកបួយថាញ់សឺន (Bui Thanh Son), ទី២-រដ្ឋមន្ត្រីហិរញ្ញវត្ថុ លោកហូឌុកហ្វុក (Ho Duc Phoc) និងទី៣-អតីតប្រធានតុលាការកំពូល លោកង្វៀនហូប៊ិញ (Nguyen Hoa Binh)។
ឧបនាយករដ្ឋមន្ត្រីបីរូបរបស់វៀតណាមដែលត្រូវបានតែងតាំងថ្មី។ ពីឆ្វេងមកស្ដាំលោកបួយថាញ់សឺន (Bui Thanh Son), លោកហូឌុកហ្វុក (Ho Duc Phoc) និងលោកង្វៀនហូប៊ិញ (Nguyen Hoa Binh)
គួរកត់សម្គាល់ថាយុទ្ធនាការបោសសម្អាតអំពើពុករលួយដែលផ្ដួចផ្ដើមតាំងពីជំនាន់លោកង្វៀនហ៊្វូជុង ហើយបន្តធ្វើនៅជំនាន់លោកតូ ឡឹមទៀតនោះបានដកតំណែង ឬចាប់ឃុំនូវមន្ត្រីជាន់ខ្ពស់ជាច្រើនរូបនៅក្នុងជួរបក្ស, ជួររដ្ឋាភិបាល និងវិស័យឯកជន។
អតីតរដ្ឋមន្ត្រីសុខាភិបាលវៀតណាមដែលត្រូវបានចាប់ខ្លួន និងផ្ដន្ទាទោសឱ្យជាប់ពន្ធនាគាររាប់សិបឆ្នាំពីបទពុករលួយកាលពីអំឡុងកូវីដ១៩
អ្នកមានបុណ្យស័ក្ដិ និងទ្រព្យសម្បត្តិល្បីៗត្រូវអស់តំណែង, ជាប់ពន្ធនាគារ ឬត្រូវប្រហារជីវិត។ ក្នុងនាមជាប្រធានាធិបតីផង និងជាអគ្គលេខាបក្សកុម្មុយនិស្តវៀតណាមផង លោកតូ ឡឹមប្ដេជ្ញាថាត្រូវតែបន្តបោសសម្អាតអំពើពុករលួយ និងរបបការិយាល័យនិយមដើម្បីស្ដារសេដ្ឋកិច្ចជាតិឡើងវិញ៕