អ្នកនាំពាក្យគណបក្សប្រជាជនកម្ពុជា៖ សម្តេចតេជោ ហ៊ុន សែន មិនចូលដៃជាមួយជនណាម្នាក់ប្រព្រឹត្តអំពើទុច្ចរិត និងយកឥទ្ធិពលរបស់ថ្នាក់ដឹកនាំ បោកប្រាស់អ្នកដទៃដើម្បីផលប្រយោជន៍ផ្ទាល់ខ្លួនទេ

ភ្នំពេញ៖ឯកឧត្ដមសុខ ឥសាន អ្នកនាំពាក្យគណបក្សប្រជាជនកម្ពុជា បានចេញមកបញ្ជាក់ថា សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភា មិនដែលចូលដៃចូលជើងជាមួយជនណាម្នាក់នៅជិតសម្តេច ដែលបានប្រព្រឹត្តអំពើទុច្ចរិត យកឥទ្ធិពលថ្នាក់ដឹកនាំ ទៅបោកប្រាស់ប្រជាពលរដ្ឋ ដើម្បីផលប្រយោជន៍ផ្ទាល់ខ្លួននោះទេ។ ជាក់ស្តែង មានមន្ត្រីមួយចំនួនត្រូវទទួលការព្រមានយ៉ាងធ្ងន់ រហូតមានមន្ត្រីខ្លះត្រូវដកហូតមុខតំណែង និងប្រឈមមុខនឹងផ្លូវច្បាប់ជាដើម។
ការចេញមកបញ្ជាក់បែបនេះរបស់ ឯកឧត្ដមសុខ ឥសាន បានធ្វើឡើងបន្ទាប់ពីសម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភា នាថ្ងៃទី៧ ខែកញ្ញា ឆ្នាំ២០២៤ ម្សិលមិញ បានចេញមកទម្លាយពីករណីឆបោកជាច្រើនករណីរបស់ អ្នកឧកញ៉ា លី សាម៉េត ហៅគ្រូមា ព្រមទាំងស្នើទៅរដ្ឋមន្ត្រីក្រសួងយុត្តិធម៌ ធ្វើការជាមួយតុលាការ បង្កកទ្រព្យសម្បត្តិរបស់លោក លី សាម៉េត។ សម្តេចតេជោ ហ៊ុន សែន ក៏បានអំពាវនាវឱ្យអ្នករងការចាញ់បោក លោក លី សាម៉េត ទាំងអស់ដាក់ពាក្យបណ្តឹង ដោយក្រុមមេធាវីរបស់សម្តេចមានឯកឧត្ដម គី តិច ជាប្រធាន រង់ចាំពាក្យបណ្តឹងទាំងនោះ។
តាមរយៈសារសំឡេង នៅថ្ងៃទី០៨ ខែតុលា ឆ្នាំ២០២៤នេះ ឯកឧត្ដម សុខ ឥសាន បានបញ្ជាក់យ៉ាងដូច្នេះថា៖ «ថ្ងៃនេះខ្ញុំសូមនិយាយអំពីបញ្ហាពាក់ព័ន្ធអ្នកដែលនៅជិតដិតជាមួយថ្នាក់ដឹកនាំ ករណីដែលសម្តេចផ្សព្វផ្សាយជាសាធារណៈ សបញ្ជាក់ឱ្យឃើញថាថ្នាក់ដឹកនាំ មិនបានចូលដៃចូលជើងជាមួយជនដែលនៅអែបអប ជិតសម្តេច ហើយបានប្រព្រឹត្តអំពើទុច្ចរិតនានា ហើយមានយកឥទ្ធិពល និងអំណាចរបស់ថ្នាក់ដឹកនាំទៅអួតអាង កាងការងារ ហើយទៅបោកប្រាស់ បងប្អូនមួយចំនួនបានចេញជាលទ្ធផលហើយ ត្រូវទទួលបានការព្រមានយ៉ាងធ្ងន់ធ្ងររបស់ថ្នាក់ដឹកនាំ»។
ជាមួយគ្នានេះដែរឯកឧត្ដមសុខ ឥសាន បានគូសបញ្ជាក់ថា ការសម្រេចចិត្តដាក់ទណ្ឌកម្មចំពោះមន្ត្រីខិលខូច គឺជាមេរៀន ដើម្បីបញ្ជាក់ថា មន្ត្រីដែលនៅជិតដិតជាមួយថ្នាក់ដឹកនាំ មិនមែនចេះតែប្រព្រឹត្តទង្វើអ្វីបានតាមអំពើចិត្តនោះទេ។ ប៉ុន្តែ ផ្ទុយទៅវិញអ្នកដែលនៅជិតដិតជាមួយថ្នាក់ដឹកនាំ ត្រូវកាន់តែពង្រឹងគោលជំហរ ហើយត្រូវមានវិន័យតឹងរឹងជាងគេ ជាងឯងទៅទៀត ដើម្បីរក្សាកិត្តិយស សេចក្តីថ្លៃថ្នូរ ជូនថ្នាក់ដឹកនាំ។
«ប្រសិនបើយកឥទ្ធិពល យកអំណាចរបស់ថ្នាក់ដឹកនាំ ទៅបោកប្រាស់គេនៅបានវាគ្រាន់ ប៉ុន្តែ នៅពេលថ្នាក់ដឹកនាំទាន់វាគ្រែអីចឹង នេះគ្រាន់ជាបញ្ហាមួយបង្កក់ទ្រព្យសម្បត្តិ ហ្នឹងជាការយោគយល់របស់ថ្នាក់ដឹកនាំប្រកបដោយព្រហ្មវិហារធម៌ទៅហើយ»។ នេះជាការលើកឡើងបន្ថែមរបស់ឯកឧត្ដម សុខ ឥសាន។
ឯកឧត្ដមសុខ ឥសាន បានចាត់ទុកថា សារដែលសម្តេចតេជោ ហ៊ុន សែន បានបញ្ចេញជាសាធារណៈ បានសបញ្ជាក់ឱ្យឃើញយ៉ាងច្បាស់ហើយថា ថ្នាក់ដឹកនាំ មិនចូលដៃ ចូលជើង ហើយក៏មិនយោគយល់ដល់អ្នកដែលប្រើប្រាស់អំណាច ឥទ្ធិពល របស់ថ្នាក់ដឹកនាំ ទៅឆ្លៀតកេងប្រវ័ញ្ចរកផលប្រយោជន៍ពីអ្នកដទៃ ដើម្បីផលប្រយោជន៍ផ្ទាល់នោះទេ។
ឯកឧត្ដមសុខ ឥសាន បានបន្ថែមថា ចំពោះករណីនេះ ក៏ជាមេរៀនដល់អ្នកផ្សេងទៀត ដែលនៅជិតស្និទ្ធជាមួយថ្នាក់ដឹកនាំ ហើយត្រូវបានថ្នាក់ដឹកនាំប្រគល់សេចក្តីទុកចិត្ត ប៉ុន្តែ បែរជាយកការទុកចិត្តរបស់ថ្នាក់ដឹកនាំ ឆ្លៀតកេងប្រវ័ញ្ចដើម្បីផលប្រយោជន៍បុគ្គលផ្ទាល់ខ្លួននោះទេ៕