នគរបាលខណ្ឌឬស្សីកែវ ស្រាវជ្រាវឃាត់ខ្លួនជនសង្ស័យ ម្នាក់ជាប់ចោទលួច កាច់កញ្ចក់រថយន្ត

ភ្នំពេញ ៖ កម្លាំងនគរបាលខណ្ឌឬស្សីកែវ ស្រាវជ្រាវឃាត់ខ្លួនជនសង្ស័យម្នាក់ ដែលកាច់កញ្ចក់រថយន្ត កាលពីថ្ងៃទី១៨ ខែតុលា ឆ្នាំ២០២៤ វេលាម៉ោង ០៣ និង២២នាទី នៅចំណុចផ្ទះលេខ១៨O ផ្លូវបេតុង ក្រុមទី១ ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ។
លោកវរសេនីយ៍ឯក ហ៊ាង ថារ៉េត អធិការខណ្ឌប្ញស្សីកែវ បានអោយដឹងថា ជនរងគ្រោះ ឈ្មោះ ម៉ម មុនីរតនា ភេទប្រុស អាយុ ៣៥ឆ្នាំ មុខរបរលក់ដូរ មានទីលំនៅកន្លែងកើតហេតុខាងលើ ។
ចំណែកជនសង្ស័យចំនួន០២នាក់ ៖
១-ឈ្មោះ សេង សង្ហា ភេទប្រុស អាយុ ១៩ឆ្នាំ មុខរបរគ្មាន មានទីលំនៅផ្ទះជួល ភូមិ៩ សង្កាត់ផ្សារចាស់ ខណ្ឌដូនពេញ រាជធានីភ្នំពេញ (ឃាត់ខ្លួន មានសារធាតុញៀន)
២-ឈ្មោះ ភ័ក្ត្រ ភេទប្រុស អាយុប្រហែល ២៧ឆ្នាំ (គេចខ្លួន)។
សម្ភារៈបាត់បង់៖ កញ្ចក់រថយន្តមើលចំហៀង ០១គូរ របស់រថយន្តម៉ាក Lexus NX200T ។
សមត្ថកិច្ចថាដំណើររឿងហេតុ ៖ នៅថ្ងៃទី១៨ ខែតុលា ឆ្នាំ២០២៤ វេលាម៉ោង ០៣និង២២នាទី មុនពេលកើតហេតុ ជនរងគ្រោះបានចតរថយន្តនៅមុខផ្ទះ ស្រាប់តែមានជនសង្ស័យ ចំនួន ០២នាក់ ជិះ កង់បីឥណ្ឌាមួយគ្រឿង ពណ៌ស មកធ្វើសកម្មភាពលួចកាច់កញ្ចក់រថយន្តរបស់ជនរងគ្រោះបានសម្រេច រួចគេចខ្លួនបាត់ ។ ក្រោយកើតហេតុជនរងគ្រោះ បានមកដាក់ពាក្យបណ្តឹងនៅប៉ុស្តិ៍ឫស្សីកែវ ភ្លាមៗនោះ សមត្ថកិច្ចយើងបានចុះដល់កន្លែងកើតហេតុ បើកការស្រាវជ្រាវកំណត់អត្តសញ្ញាណជនសង្ស័យ លុះដល់ថ្ងៃទី០៩ ខែវិច្ឆិកា ឆ្នាំ២០២៤ វេលាម៉ោង ១៧និង០០នាទី នៅចំណុចភូមិផ្សារតូច សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ សមត្ថកិច្ចឃាត់បានជនសង្ស័យម្នាក់ ឈ្មោះ សេង សង្ហា នាំមកកាន់ប៉ុស្តិ៍ឫស្សីកែវ ដើម្បីធ្វើការសាកសួរតែម្តង។
ចំពោះមុខផ្នែកជំនាញខណ្ឌ-ប៉ុស្តិ៍ សាកសួរយកចម្លើយ និងស្រាវជ្រាវតាមចាប់បក្ខពួក ដែលនៅសេសសល់យកមកចាត់ការតាមនិតិវិធី៕