បុណ្យឆ្លងឆ្នាំសកល២ថ្ងៃ រាជធានីភ្នំពេញទទួលបានភ្ញៀវទេសចរជាង១លាន៥សែននាក់មកទស្សនា,សរុបទូទាំងប្រទេសមានជាង៣លាន៥សែននាក់

ភ្នំពេញ៖នាឱកាសបុណ្យឆ្លងឆ្នាំសកល រយៈពេល២ថ្ងៃ ត្រូវនឹងថ្ងៃទី៣០-៣១ ខែធ្នូ ឆ្នាំ២០២៤ ចូលឆ្នាំសកល២០២៥នៅរាជធានីភ្នំពេញនិយាយដោយឡែកមានភ្ញៀវទេសចរដើរលេងកម្សាន្តចំនួន១,៥៧៣,៤៧៩នាក់ភ្ញៀវទេសចរមកកំសាន្តនៅរាជធានីភ្នំពេញ។
លោកស្រីដោ សម្ផស្ស នាយិការរងរដ្ឋបាលនិងជាអ្នកនាំពាក្យរដ្ឋបាលរាជធានីភ្នំពេញបានឱ្យដឹងថាក្នុងពិធីបុណ្យឆ្លងឆ្នាំសកលឆ្នាំថ្មី២០២៤ចូលឆ្នាំ២០២៥នៅរាជធានីភ្នំពេញ មានរៀបចំប្រគុំតន្រ្តីខ្នាតធំចំនួន៤ទីតាំង ក្នុងនោះរួមមាន៖ ១. ក្រុមហ៊ុន Nago World រៀបចំឡើងនៅខាងមុខទីតាំងគាត់តែម្តង មានការប្រគុំតន្រ្តី និងបាញ់កំជ្រួញ។
២. សហភាពសហព័ន្ធយុវជនកម្ពុជា(សសយក) រៀបចំកម្មវិធី«សាទរកម្ពុជា»នៅបរិវេណមុខវាំង និងទីតាំងជិតនោះ ដោយមានបាញ់កាំជ្រួច។
៣. ក្រុមហ៊ុនហង្សមាស ប្រគុំតន្រ្តីនៅទីធ្លារសួនច្បារវត្តបុទុមវតី ផ្នែកខាងត្បូង។
៤.ទូរទស្សន៍បាយន្តមានកម្មវិធីប្រគុំតន្រ្តី នៅជាប់រង្វង់មូលនាងមច្ឆា ត្រើយម្ខាងក្នុងខណ្ឌជ្រោយចង្វាចាប់ពីថ្ងៃទី ២៩-៣០ និង៣១ ឆ្នូ ២០២៤។
លោកស្រីដោ សម្ផស្ស បានបញ្ជាក់ផងដែរថា៖ ចំពោះការរៀបចំសន្តិសុខ សណ្តាប់ធ្នាប់នានាវិញ ត្រូវបានរដ្ឋបាលរាជធានីភ្នំពេញ និងស្ថាប័នពាក់ព័ន្ធគិតគូរ និងពង្រឹងដូចកម្មវិធីធំៗរបស់ជាតិកន្លងមកដែរ គឺសំដៅធានាសុវត្ថិភាព និងសន្តិសុខជូនប្រជាពលដ្ឋមកលេងកម្សាន្ត មិនឱ្យមានការបារម្ភអ្វីឡើយ។ក្រៅពី ទីតាំង ខាងលេីនៅតាមសណ្ឋាគារនិងភោជនីយដ្ឋាន ឬ មជ្ឈមណ្ឌលកម្សាន្តឯកជននានាក៏គេមាន កម្មវិធី របស់ខ្លួនទៅតាមទំហំទីតាំងជាក់ស្តែងរបស់គេដែរ។
បើតាមរបាយការណ៍របស់ក្រសួងទេសចរណ៍បង្ហាញថា នាឱកាសបុណ្យឆ្លងឆ្នាំសកល រយៈពេល២ថ្ងៃ ត្រូវនឹងថ្ងៃទី៣០-៣១ ខែធ្នូ ឆ្នាំ២០២៤ មានភ្ញៀវទេសចរដើរលេងកម្សាន្តទូទាំងប្រទេសចំនួន៣,៥៣៥,៣២៥នាក់ ក្នុងនោះមានភ្ញៀវជាតិជិត៣.៤៩លាននាក់ និងភ្ញៀវអន្តរជាតិជិត៥ម៉ឺននាក់។
ក្នុងថ្ងៃទី១ ត្រូវនឹងថ្ងៃទី៣០ ខែធ្នូ ឆ្នាំ២០២៤ មានទេសចរជាតិនិងប្រជាពលរដ្ឋដើរលេងកម្សាន្តចំនួន២១៦,៣៣១នាក់ និងទេសចរបរទេសចំនួន១៨,២៤៩នាក់។
ក្នុងថ្ងៃទី២ ត្រូវនឹងថ្ងៃទី៣១ ខែធ្នូ ឆ្នាំ២០២៤ មានទេសចរជាតិនិងប្រជាពលរដ្ឋដើរលេងកម្សាន្តចំនួន៣,២៧១,៧៣៤នាក់ និងទេសចរបរទេសចំនួន២៩,០១១នាក់។
សរុបរយៈពេល២ថ្ងៃ គឺថ្ងៃទី៣០-៣១ ខែធ្នូ ឆ្នាំ២០២៤ មានភ្ញៀវទេសចរដើរលេងកម្សាន្តទូទាំងប្រទេសចំនួន៣,៥៣៥,៣២៥នាក់ ក្នុងនោះមានទេសចរជាតិនិងប្រជាពលរដ្ឋដើរលេងកម្សាន្តចំនួន៣,៤៨៨,០៦៥នាក់
និងទេសចរបរទេសចំនួន៤៧,២៦០នាក់។
ចំពោះរាជធានី-ខេត្តដែលទទួលបានភ្ញៀវទេសចរច្រើនជាងគេទាំង៥ រួមមាន៖
១. រាជធានីភ្នំពេញ ទទួលបានភ្ញៀវទេសចរសរុបចំនួន១,៥៧៣,៤៧៩នាក់។
២. ខេត្តព្រះសីហនុ ទទួលបានភ្ញៀវទេសចរសរុបចំនួន៤២២,៨២៩នាក់។
៣. ខេត្តសៀមរាប ទទួលបានភ្ញៀវទេសចរសរុបចំនួន៣៣៣,៦៦០នាក់។
៤. ខេត្តបាត់ដំបង ទទួលបានភ្ញៀវទេសចរសរុបចំនួន៣២៤,៧៦០នាក់។
៥. ខេត្តកំពត ទទួលបានភ្ញៀវទេសចរសរុបចំនួន ២២៧,៩៧៦នាក់៕