មហាជនស្វាគមន៍ជនជាតិចិន បែកមុខហូរឈាម ក្រោយពេលកាប់នគរបាលម្នាក់របួសដៃ
ភ្នំពេញ ៖ បុរសជនជាតិចិនទំនើងម្នាក់ បានបង្កអំពើហិង្សាអុកឡុកក្នុងក្រុងភ្នំពេញ ដោយដែលបានយកកាំបិតប៉័ងតោ កាប់លើមន្រ្តីនគរបាលម្នាក់ ចំដៃខាងស្តាំ បណ្តាលឲ្យរងរបួសធ្ងន់ បញ្ជូនទៅមន្ទីរពេទ្យភ្លាមៗ ។ ជនជាតិចិនរូបនោះ ត្រូវបានគេ ដាក់ការសង្ស័យថា បែកថ្នាំញៀន ។
ហេតុការណ៍នេះ កើតឡើងកាលពីម៉ោង២រសៀលថ្ងៃទី១ ខែធ្នូ ឆ្នាំ២០១៨ ស្ថិតនៅតាម បណ្ដោយផ្លូវលេខ៤៣២ ក្នុងសង្កាត់បឹងត្របែក ខណ្ឌចំការមន រាជធានីភ្នំពេញ ។
មហាជនបាននិយាយថា មិនមែនថតកុនទេ កណ្តាលទីក្រុងភ្នំពេញ មានករណីជនជាតិចិនម្នាក់ បែកថ្នាំ បានកាន់កាំបិតប៉័ងតោដេញកាប់សមត្ថកិច្ច និងស្ត្រីចំណាស់ម្នាក់ បណ្ដាលឱ្យរងរបួសជាទម្ងន់។ ក្រោយមក សមត្ថកិច្ច និងប្រជាពលរដ្ឋ បានយកដំបង វាយទម្លាក់កាំបិតពីជនជាតិចិននោះ ទើបចូលទៅក្រៀកចាប់បាន។
ក្រោយកើតហេតុ ជនសង្ស័យ ត្រូវបានប្រជាពលរដ្ឋ ដែលរស់នៅម្ដុំនោះ បាននាំគ្នាវាយ បណ្ដោយឲ្យបែកមុខបែកមាត់ ហូរឈាមស្រោចខ្លួន រងរបួសធ្ងន់ ហើយត្រូវបានសមត្ថកិច្ចឃាត់បញ្ជូនទៅសង្រ្គោះនៅ មន្ទីរពេទ្យរុស្ស៊ី ៕
