គម្រោងកែលម្អការអប់រំឧត្តមសិក្សា ផ្តោតជាចម្បង លើការលើកកម្ពស់គុណភាព នៃការបង្រៀន ការរៀន និងការស្រាវជ្រាវ
រាជធានីភ្នំពេញ៖ អគ្គនាយកដ្ឋានឧត្តមសិក្សា បានរៀបចំសិក្ខាសាលា ផ្សព្វផ្សាយគម្រោងកែលម្អការអប់រំឧត្តមសិក្សា ក្នុងគោលបំណងផ្សព្វផ្សាយគម្រោងឱ្យបានទូលំទូលាយដល់ស្ថាប័ន និងអង្គភាពពាក់ព័ន្ធនានាបានជ្រាប និងចូលរួមសហការ ដើម្បីធានាឱ្យបាននូវនិរន្តភាពនៃការអភិវឌ្ឍស្ថាប័ន និងអង្គភាពនាពេលអនាគត។
សិក្ខាសាលានេះត្រូវបានរៀបចំឡើង ក្រោមអធិបតីភាពលោកបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នាព្រឹកថ្ងៃចន្ទ ទី៣ខែធ្នូឆ្នាំ២០១៨ នៅសណ្ឋាគារកាំបូឌីយ៉ាណា។ ក្នុងឱកាសនោះលោកបណ្ឌិត បានមានប្រសាសន៍ថា គម្រោងកែលម្អការអប់រំឧត្តមសិក្សា ផ្តោតជាចម្បង លើការលើកកម្ពស់គុណភាព នៃការបង្រៀន ការរៀន និងការស្រាវជ្រាវ ការបង្កើនកាលានុវត្តភាព និងសមធម៌ នៃការចូលរៀនរបស់និស្សិត ការពង្រឹងប្រព័ន្ធធានា គុណភាពអប់រំ និងការពង្រឹងអភិបាលកិច្ច ព្រមទាំងការគ្រប់គ្រងនៅឧត្តមសិក្សា។
លោក ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា បានថ្លែងថា គម្រោងកែលម្អការអប់រំឧត្តមសិក្សា បានគំាទ្រដោយធនាគាពិភពលោក ក្នុងមូលនិធិ សរុបចំនួន៩០លានដុល្លារ និងថវិការបស់រាជរដ្ឋាភិបាលកម្ពុជាចំនួន២,៥លានដល្លារ។ ភាគីទាំងពីរបានចុះហត្ថលេខាលើ កិច្ចព្រមព្រៀងហិរញ្ញប្បទាន សម្រាប់គម្រោង កែលម្អការអប់រំឧត្តមសិក្សាកាលពីថ្ងៃទី១២ ខែកក្កដា ឆ្នាំ២០១៨ កន្លងរួចមកហើយ។
លោករដ្ឋមន្ត្រីបានឲ្យដឹងទៀតថា គម្រោងនេះមានវិសាលភាពលើការកែលម្អគុណភាពអប់រំ នៅគ្រឹះស្ថានឧត្តមសិក្សាគោលដៅចំនួន៥ រួមមាន៖ សាកលវិទ្យាល័យភូមិន្ទភ្នំពេញ សាកលវិទ្យាល័យភូមិន្ទកសិកម្ម វិទ្យាស្ថានបច្ចេកវិទ្យាកម្ពុជា សាកលវិទ្យាល័យស្វាយរៀង និងសាកលវិទ្យាល័យបាត់ដំបង់។ គម្រោងនេះក៏ពង្រឹងគ្រឹះស្ថានឧត្តមសិក្សាឯកជន និងពង្រឹងប្រព័ន្ធឧត្តមសិក្សារដ្ឋផងដែរ។
លោករដ្ឋមន្ត្រីបន្ថែមថា ជាងនេះ កែលម្អការស្រាវជ្រាវផ្នែក STEM និងផ្នែកកសិកម្ម ផ្តោតលើការលើកកម្ពស់គុណភាព និងភាពឆ្លើយតបនៃការស្រាវជ្រាវ តាមរយៈការផ្តល់ហិរញ្ញប្បទានដល់គ្រឹះស្ថានឧត្តមសិក្សា ដែលកំណត់ក្នុងគម្រោង និងការសាង សង់បន្ទប់ពិសោធន៍ និងការបំបំពាក់សម្ភារបរិក្ខារ។ ការពង្រឹងផ្នែកអភិបាលកិច្ច និងការគ្រប់គ្រងគម្រោង ផ្តោតលើកការពង្រឹងប្រព័ន្ធអនុវិស័យឧត្តមសិក្សា និងការគ្រប់គ្រង និងសម្របសម្រួលគម្រោង។
លោកបញ្ជាក់ថា គម្រោងកែលម្អការអប់រំឧត្តសិក្សា ដែលបង្កើតឡើងនេះពិតជា ស្របតាមកំណែងទម្រង់អាទិភាពអនុវិស័យឧត្តមសិក្សា ដែលបានចែងនៅក្នុងយុទ្ធសាស្ត្រចតុកោណ របស់រាជរដ្ឋាភិបាលដំណាក់កាលទី៤ រដ្ឋាភិបាលក្នុងរយៈពេល៥ឆ្នាំ (២០១៩ – ២០២៣) ផ្តោតជាចម្បងលើការលើកកម្អស់ គុណភាព នៃការបង្រៀន ការរៀននិងការស្រាវជ្រាវ ការបង្កើនការលានុវត្តភាព និងសមធ៌នៃការចូលរៀនរបស់និស្សិត ការពង្រឹងប្រព័ន្ធធានាគុណភាពអប់រំ និងការពង្រឹងអភិបាលកិច្ច និងការគ្រប់គ្រងនៅឧត្តមសិក្សា។
លោករដ្ឋមន្ត្រី បានឲ្យដឹងថា និស្សិតកំពុងសិក្សានៅឧត្តមសិក្សា មានចំនួន ២០៧.៤៣៤នាក់ ស្រី៤៨,៣៧ភាគរយ ក្នុងនោះនិស្សិតថ្នាក់បរិញ្ញាបត្ររងមាន ២០.៥៧០នាក់ ស្រី៥១,០៦ភាគរយ និស្សិតថ្នាក់បរិញ្ញាបត្រមាន១៦៥.៣៥៩នាក់ ស្រី ៤៧,៨៧ភាគរយ និស្សិតថ្នាក់បរិញ្ញាបត្រជាន់ខ្ពស់មានចំនួន២១.៤៩៤នាក់ ស្រី២១,២៤ភាគរយ និងនិស្សិតថ្នាក់បណ្ឌិតមាន១.២២២នាក់ ស្រី៥,១៦ភាគរយ និងនិស្សិតអាហាររូបករណ៍ មាន២៦.១៩២នាក់ ស្រី៤៩,៥០ភាគរយ ក្នុងឆ្នាំសិក្សា ២០១៦ – ២០១៧។
គ្រឹះស្ថានឧត្តមសិក្សាទូទាំងប្រទេស សរុបចំនួន១២១គ្រឹះស្ថាន ដែលមានទីតាំងនៅ២០ខេត្ត រាជធានី ក្នុងនោះ គ្រឹះស្ថានឧត្តមសិក្សា ដែលស្ថិតក្រោមការគ្រប់គ្រងរបស់ក្រសួងអប់រំ យុវជននិងកីឡា ចំនួន៧៣ ក្នុងនោះគ្រឹះស្ថានឧត្តមសិក្សាសាធារណៈ មាន១៣គ្រឹះស្ថាន និងឯកជនមាន៦០ ៕
