តួលេខអ្នកស្លាប់ ក្នុងគ្រោះរញ្ជួយដីនៅមីយ៉ាន់ម៉ា កើនដល់ ៣ ៣៥៤នាក់

បាងកក៖ប្រព័ន្ធផ្សព្វផ្សាយរដ្ឋមីយ៉ាន់ម៉ា បានរាយការណ៍នៅថ្ងៃសៅរ៍ ទី៥ ខែមេសា ថាចំនួនអ្នកស្លាប់ដោយសារគ្រោះរញ្ជួយដីដ៏ប្រល័យបំផុតមួយនៅក្នុងប្រទេសមីយ៉ាន់ម៉ា បានកើនឡើងដល់ ៣ ៣៥៤នាក់ ខណៈ៤៨៥០នាក់ រងរបួស និង២២០នាក់ទៀតកំពុងបាត់ខ្លួននៅឡើយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
មេដឹកនាំរបបយោធា លោក Min Aung Hlaing ក៏បានត្រឡប់ទៅដល់រដ្ឋធានី Naypyitaw វិញហើយដែរ បន្ទាប់ពីរូបលោកបានធ្វើដំណើរទស្សនកិច្ចដ៏កម្រមួយទៅក្រៅប្រទេស ដើម្បីចូលរួមកិច្ចប្រជុំកំពូល ថ្នាក់តំបន់មួយ ក្នុងទីក្រុងបាងកក ជាទីដែលរូបលោកបានជួបពិភាក្សាការងារដាច់ដោយឡែក ជាមួយមេដឹកនាំមកពីប្រទេសថៃ នេប៉ាល់ ប៊ូតង់ ស្រីលង្កា និងឥណ្ឌា។ តាមប្រព័ន្ធផ្សព្វផ្សាយរដ្ឋមីយ៉ាន់ម៉ា លោក Min Aung Hlaing បានបញ្ជាក់ឡើងវិញប្រាប់នាយករដ្ឋមន្ត្រីឥណ្ឌា លោក Narendra Modi អំពីផែនការរបស់របបសឹកក្នុងការរៀបចំការបោះឆ្នោតសកលដោយសេរី និងយុត្តិធម៌ នៅខែធ្នូខាងមុខ។
ដោយឡែក កាលពីថ្ងៃសុក្រសប្ដាហ៍នេះ អ្នកនាំពាក្យម្នាក់នៃក្រសួងការបរទេសឥណ្ឌា បាននិយាយថាលោក Modi បានអំពាវនាវឱ្យបទឈប់បាញ់ក្រោយកើតមានគ្រោះរញ្ជួយដី នៅក្នុងសង្រ្គាមស៊ីវិលនៅ មីយ៉ាន់ម៉ាក្លាយទៅជាបទឈប់បាញ់អចិន្ត្រៃយ៍ ហើយថាការបោះឆ្នោតចាំបាច់ត្រូវតែធ្វើឡើងប្រកបដោយបរិយាប្ន័ន និងគួរឱ្យទុកចិត្តបាន។ ក៏ប៉ុន្តែ ក្រុមអ្នករិះគន់បានថ្កោលទោស និងចាត់ទុកផែនការ រៀបចំការបោះឆ្នោតរបស់របបសឹក ជារឿងគួរឱ្យអាម៉ាស៕