ស្រវឹងស្រាជោកជាំបេីករថយន្តលឿនទៅបុករ៉ឺម៉កកង់បីអូសជាង៥០ម៉ែត្របណ្ដាលឲ្យជនជាតិបរទេស២នាក់បានស្លាប់នៅនិងកន្លែង
ភ្នំពេញ៖ បុរសម្នាក់ស្រវឹងស្រាជោកជាំបេីករថយន្តក្នុងល្បឿនលឿនទៅបុករ៉ឺម៉កកង់បីអូសជាង៥០ម៉ែត្របណ្ដាលឲ្យជនជាតិបរទេស២នាក់បានស្លាប់នៅនិងកន្លែងចំណែកឯអ្នកបេីករ៉ឺម៉កស្លាប់ពេលបញ្ជូនទៅកាន់មន្ទីរពេទ្យកាល់ម៉ែត ។
ហេតុការណ៍នេះបានបង្កឲ្យមានការភ្ញាក់ផ្អើលយ៉ាងខ្លាំងកាលពីវេលាម៉ោងជាង២យប់ថ្ងៃទី០២ ខែមិនាឆ្នាំ២០១៩ដែលមានទីតាំងស្ថិតនៅតាមបណ្ដោយផ្លូវព្រះស៊ីសុវត្ថិកែងផ្លូវលេខ១៨៤ចំណុចមុខព្រះបរមរាជវាំងស្ថិតក្នុងសង្កាត់ជ័យជំនះខណ្ឌដូនពេញក្រុងភ្នំពេញ។
ប្រភពព័ត៌មានពីអ្នកដែលបានឃើញហេតុការណ៍បានប្រាប់ឲ្យដឹងថានៅមុនពេលកើតហេតុគេឃើញរថយន្តមួយគ្រឿងម៉ាក LEXUS RX330 ពណ៌ខ្មៅពាក់ស្លាកភ្នំពេញ2AX-5853 បេីកបរដោយបុរសម្នាក់ក្នុងល្បឿនលឿនតាមបណ្ដោយផ្លូវព្រះស៊ីសុវត្ថិក្នុងទិសដៅពីត្បូងទៅជើងលុះមកដល់ចំណុចមុខព្រះបរមរាជវាំងស្រាប់តែរថយន្តរេចង្កូតងាកមកខាងឆ្វេងជ្រុលទៅបុករ៉ឺម៉កកង់បីចំពេញមួយទំហឹងបណ្ដាលឲ្យអូសជាង៥០ម៉ែត្របណ្ដាលឲ្យជនជាតិបរទេស២នាក់ស្លាប់ភ្លាមៗនៅនឹងកន្លែងចំណែកឯអ្នកបេីករ៉ឺម៉កស្លាប់ពេលបញ្ជូនទៅកាន់មន្ទីរពេទ្យកាល់ម៉ែត្រ។
រីឯអ្នកបើកបររថយន្តបង្កវិញមិនចេញពីកន្លែងកើតហេតុទេ តែត្រូវបានសមត្ថកិច្ចឃាត់ខ្លួនយកទៅប៉ុស្តិ៍នគរបាលជ័យជំនះដេីម្បីធ្វើការសាកសួរនាំផងដែរ។
បច្ចុប្បន្នសពទាំង៣ត្រូវបានរថយន្តសាមុយដឹកយកទៅតម្កល់នៅឯវត្តស្ទឹងមានជ័យដេីម្បីរងចាំសាច់ញ្ញតិមកទទួលយក ដោយឡែកសពទាំង៣នៅមិនទាន់ស្គាល់អត្តសញ្ញាណពិតប្រាកដនោះទេ។
ក្រោយកើតហេតុសមត្ថកិច្ចមូលដ្ឋានបានចុះមកដល់រួចធ្វេីការទាក់ទងទៅសមត្ថកិច្ចជំនាញដេីម្បីឲ្យចុះមកធ្វើការវាស់វែងយករថយន្តបង្កនិងរ៉ឺម៉កកង់បីទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញដេីម្បីរងចាំក្រុមគ្រួសាររ៉ឺម៉កកង់បីមកដោះស្រាយគ្នាទៅតាមផ្លូវច្បាប់នៅពេលក្រោយ៕
