លះបង់ដី សាងសង់ក្លិបកីឡាប្រយុទ្ធសម្រាប់ប្រើប្រាស់ ជាសាធារណៈ
ភ្នំពេញ:ក្លឹបហ្វឹកហាត់និងប្រកួតប្រភេទកីឡាប្រយុទ្ធមួយដែលផ្តើមគំនិតឡើងដោយលោកឧត្តមសេនីយ៍ម៉ក់សំអុល ដែលមានទីតាំងលើផ្ទៃដីជិតពីរហិកតា ក្នុងភូមិជើងព្រៃឃុំអំពៅព្រៃស្រុកកណ្ដាលស្ទឹង ខេត្តកណ្ដាលត្រូវបានសាងសង់ហើយដើម្បីតម្រូវការហ្វឹកហាត់ និងប្រកួតប្រភេទកីឡាប្រយុទ្ធមុននឹងព្រឹត្តិការណ៍កីឡាស៊ីហ្គេមលើកទី៣២ឆ្នាំ២០២៣ ដែលព្រះរាជាណាចក្រកម្ពុជាធ្វើម្ចាស់ផ្ទះ។ទោះជាទីតាំងជាកម្មសិទ្ធឯកជន របស់លោកម៉ក់សំអុលហើយការសាងសង់ចំណាយថវិកាពីសុប្បរសជន ប៉ុន្តែនឹកដាក់ឲ្យប្រើប្រាស់ជាសាធារណៈមិនគិតកម្រៃនិងនិងជាមរតកស្នាដៃ របស់លោកទុកសម្រាប់ជាតិដោយគ្មានលក់ដូអ្វីឡើយ។
លោកម៉ក់សំអុល ដែលបច្ចុបប្បន្នជាប្រធានសមាគមកីឡាប្រយុទ្ធក្រសួងមហាផ្ទៃ និងជាអ្នកស្រឡាញ់ការហាត់គុនបានប្រាប់ឲ្យដឹងថា ក្លឹបគុនចម្រុះឬប្រភេទកីឡាប្រយុទ្ធនេះទទួលបានការអនុញាតដាក់ឈ្មោះថា’ក្លិបសម្ដេចតេជោហ៊ុនសែនជើងព្រៃ’’ហើយគ្រប់ប្រភេទកីឡាប្រយុទ្ធអាចទៅហ្វឹកហាត់នៅក្លឹបគុនចម្រុះសម្ដេចតេជោហ៊ុនសែនជើងព្រៃ បានដោយគ្មានបង់ប្រាក់។
ការសាងសង់ចាប់ផ្តើមបាន២០ភាគរយ ហើយគ្រោងបញ្ចប់នៅចុងឆ្នាំ២០១៩នេះយ៉ាងយូរបំផុតដើម្បីឲ្យកីឡាប្រយុទ្ធផ្សេងៗ បានចូលហ្វឹកហាត់ទាំងអស់គ្នា។ប្រធានសមាគមន៍កីឡាប្រដាល់ក្រសួងមហាផ្ទៃ និងជាប្រធានក្លឹបគុនចម្រុះសម្ដេចតេជោហ៊ុនសែនជើងព្រៃ បានថ្លែងថាក្លឹបរបស់លោកដែលមានទីតាំងក្នុងភូមិជើងព្រៃ ឃុំអំពៅព្រៃស្រុកកណ្ដាល ស្ទឹងខេត្តកណ្ដាលបើគិតពីភ្នំពេញតាមផ្លូវជាតិលេខ២តែ២២គីឡូម៉ែត្រប៉ុណ្ណោះ ហើយអនាគតនឹងក្លាយជាមជ្ឈមណ្ឌលហ្វឹកហាត់កីឡាប្រយុទ្ធទាំងអស់នៅកម្ពុជា។
ជាមួយនឹងការសាងសង់ក្លិបនេះលោកវ៉ាត់ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានចុះទៅពិនិត្យមើលសក្ដានុពលនៃទីតាំងនេះក្រោយពេលសាងសង់រួច។ លោកអគ្គលេខាធិការបានចាត់ទុកថានេះចាការលះបង់មួយរបស់លោកឧត្តមសេនីយ៍រូបនេះ សម្រាប់សកម្មភាពកីឡា ។
លោកឧត្តមសេនីយ៍ម៉ក់សំអុលបន្ថែមថា ដោយសារខ្ញុំស្រឡាញ់និងចូលចិត្តក្បាច់គុនហើយពេលនេះលោក មានវ័យកាន់តែច្រើនហេតុនេះលោកចង់បន្សល់ស្នាដៃខ្លះៗគឺធ្វើក្មគឺធ្វើក្លឹបនេះឡើង ជាមរតកដើម្បីអ្នកជំនាន់ក្រោយបានហ្វឹកហាត់ក្បាច់គុនចម្រុះមានដូចជាកីឡាប្រដាល់គុនខ្មែរ , តេក្វាន់ដូ ,ការ៉ាតេដូ ,យូដូ ,ហាប់គីដូ , ស៊ូរីនជីកាំប៉ូ , វូវីណាម ឬ គុនខ្មែរអន្តរជាតិ ជាដើម ដើម្បីរួមចំណែកស្វែងរកអ្នកមានសក្តានុពលសម្រាប់ត្រៀមស៊ីហ្គេមឆ្នាំ២០២៣។ ប្រធានក្លឹបរូបនេះបញ្ជាក់ថា«ខ្ញុំមិនមែនអ្នកមានទេប៉ុន្តែខ្ញុំមានដីប៉ុណ្ណឹងគឺចូលរួមក្នុងវិស័យកីឡា ខណៈដែលថវិកាសាងសង់បានពីសុប្បរសជននិងមិត្តភត្ភិនិងថ្នាក់ដឹកនាំមួយចំនួនប៉ុន្តែ សម្រាប់ក្លិបទី២នេះទទួលបានថវិកាពីក្មួយហ៊ុនម៉ានិតចំនួន១០ម៉ឺនដុល្លារ។ ក្រៅពីសាងសង់អគារហ្វឹកហាត់លោកនឹងស្វែងរកជំនួយ សម្រាប់សាងសង់អន្តេវាសឹកដ្ឋានមួយអគារទៀតសម្រាប់កីឡាករ-ការិនីដែលមកពីឆ្ងាយស្នាក់នៅ ។
លោកវ៉ាត់ចំរើនដែលបានចុះទៅពិនិត្យផ្ទាល់មានប្រសាសន៍ថា ៖នេះជាកាយវិការនិងទឹកចិត្តដ៍ល្អក្នុងការចូលរួមក្នុង សកម្មភាពកីឡាដោយលោកហ៊ានលះបង់ទីតាំងផ្ទាល់ខ្លួនជាកម្មសិទ្ធឯកជនដើម្បី សកម្មភាពកីឡាជាសាធារណៈពិសេសអ្នកនិយមហាត់គុន និងស្រឡាញ់វិស័យកីឡាប្រយុទ្ធនេះតែម្តង។លោកវ៉ាត់ចំរើនបន្ថែមថាទីតាំងនេះគឺល្អណាស់ សម្រាប់ការហ្វឹកហាត់ដោយស្ងាត់ស្ងៀមដែលយើងអាចប្រើប្រាស់តាំងនេះ មុននឹងយើងឈានចូលដល់ស៊ីហ្គេមឆ្នាំ២០២៣ដែលកម្ពុជាធ្វើម្ចាស់ផ្ទះ ហើយក៍ជាទីតាំងមួយដែលមិនឆ្ងាយពីទីក្រុងដែរគឺអាចប្រើប្រាស់បានល្អ៕