ស្លាប់៣នាក់ របួស២នាក់ក្នុងគ្រោះថ្នាក់ចរាចរ រថយន្ត២គ្រឿងបុកគ្នា
ខេត្តស្វាយរៀងៈ មនុស្ស៣នាក់ បានស្លាប់ និង២នាក់ផ្សេងទៀត បានរងរបួស នៅក្នុងករណីគ្រោះថ្នាក់ចរាចរមួយ រវាងរថយន្តម៉ាកព្រូស និងរថយន្តមិនស្គាល់ម៉ាក កាលពីម៉ោង ២៣និង៣០នាទីយប់ ថ្ងៃទី៣ ខែកក្កដា ឆ្នាំ២០១៩នេះ។
សមត្ថកិច្ចបានឱ្យដឹងថា មានគ្រោះថ្នាក់ចរាចរ រវាងរថយន្តម៉ាកព្រួស និងរថយន្តមិនស្គាល់អត្តសញ្ញាណ បើកបរក្នុងទិសដៅស្របគ្នា ពីលិចទៅកើត លើផ្លូវជាតិលេខ១ ចន្លោះគីឡូម៉ែត្រ លេខ១៥៩-១៦០ ស្ថិតក្នុងភូមិត្រពាំងផ្លុង សង្កាត់បាទី ក្រុងបាវិត បណ្តាលឲ្យស្លាប់នៅនឹងកន្លែងកើតហេតុ ចំនួន ៣ នាក់ គឺអ្នកបើកបររថយន្តម្នាក់ ជាជនជាតិខ្មែរ និងជនជាតិចិន ២ នាក់ ជាស្ត្រី និងរបួសធ្ងន់ ២ នាក់ ជាប្រុស ជនជាតិចិន ។ រថយន្តម៉ាកព្រួស ពាក់ផ្លាកលេខ ភ្នំពេញ 2AX 5643 ពណ៌ប្រផេះ បានរងការខូតខាតស្ទើរតែទាំងស្រុង ផ្នែកខាងមុខ។
ប្រភពខាងលើ បានបន្តថា រីឯរថយន្តម្ខាងទៀត ក្រោយពេលកើតហេតុ បានបើករត់គេចខ្លួនបាត់។ មូលហេតុ អ្នកបើកបររថយន្តម៉ាកព្រួស ប្រើប្រាស់ល្បឿនលឿន។ បច្ចុប្បន្ន អ្នករបួសធ្ងន់ទាំង ២នាក់ បានបញ្ជូនទៅព្យាបាល នៅមន្ទីរពេទ្យបង្អែកខេត្តស្វាយរៀង និងសាកសព៣នាក់ បានយកទៅតម្កល់ទុក នៅវត្តពោធិថ្មី (ហៅវត្តបាវិត) ដើម្បីរង់ចាំប្រគល់ឲ្យក្រុមគ្រួសារ យកទៅធ្វើបុណ្យតាមប្រពៃណី។ មធ្យោបាយ សមត្ថកិច្ចបានយកមករក្សាទុក នៅអធិការដ្ឋាន នគរបាលក្រុងបាវិត ដើម្បីបង្កសំណុំរឿង ចាត់ការតាមនីតិវិធី៕
