ឪពុកដែលចាប់កូនប្រុសបោកស្លាប់ ត្រូវនគរបាលចាប់ខ្លួន
ខេត្តសៀមរាប ៖ ជនសង្ស័យដែលជាឪពុកបង្កើតចាប់កូនប្រុសបោកនៅលើផ្ទះបណ្តាលឲ្យស្លាប់នោះ ត្រូវបានកម្លាំងនគរបាលព្រហ្មទណ្ឌកំរិតធ្ងន់ខេត្តសៀមរាប សហការជាមួយកម្លាំងអធិការស្រុកប្រាសាទបាគង និងប៉ុស្តិ៍នគរបាលរដ្ឋបាលមានជ័យ ឃាត់ខ្លួន កាលពីម៉ោង៨និង៤០នាទីព្រឹក ថ្ងៃទី៤ ខែកក្កដា ឆ្នាំ២០១៩ ស្ថិតនៅភូមិសាស្ត្រស្រុកប្រាសាទបាគង ខេត្តសៀមរាប។ បច្ចុប្បន្នជនសង្ស័យត្រូវកម្លាំងជំនាញ រៀបចំកសាងសំណុំរឿងបញ្ជូនជនសង្ស័យ ទៅតុលាការខេត្តសៀមរាប ដើម្បីចាត់ការបន្តតាមនីតិវិធីច្បាប់។
ជនសង្ស័យឈ្មោះ ផ្លាយ វិភ័ត អាយុ៣១ឆ្នាំ រស់នៅភូមិតាប្រាក់ ឃុំមានជ័យ ស្រុកប្រាសាទបាគង ខេត្តសៀមរាប មានប្រពន្ធឈ្មោះ សោម សុខុម អាយុ២៨ឆ្នាំ មុខរបរលក់បន្លែនៅផ្សារលើធំថ្មី ចំណែកកូនរងគ្រោះឈ្មោះ ផាង ផល្លា ភេទប្រុស អាយុ១ឆ្នាំ២ខែ។
លោកវរសេនីយ៍ឯក មិន ចន្ថា អធិការនគរបាលស្រុកប្រាសាទបាគង បានប្រាប់ថា មុនឈានដល់ឃាត់ខ្លួនជនសង្ស័យ គឺដោយមានការចូលរួមពីកម្លាំងនគរបាលព្រហ្មទណ្ឌកំរិតធ្ងន់ខេត្ត និងប៉ុស្តិ៍នគរបាលរដ្ឋបាលមានជ័យ តាមស្រាវជ្រាវរកជនសង្ស័យដែលរត់គេចខ្លួនបាត់ពីស្រុកកំណើត ទៅរស់នៅកន្លែងផ្សេង។ លុះដល់ម៉ោង៧និង២០នាទីយប់ថ្ងៃទី៣ កក្កដា កម្លាំងទទួលព័ត៌មានថា ជនសង្ស័យធ្វើដំណើរតាមឡានក្រុងចូលមកខេត្តសៀមរាប ហើយកម្លាំងចាំឃ្លាំមើលក្នុងមូលដ្ឋាន ដែលជនសង្ស័យឧស្សាហ៍ចេញចូល គឺក្នុងភូមិឃុំកើតហេតុខាងលើ រហូតដល់ម៉ោង៨និង៤០នាទីព្រឹក ថ្ងៃទី៤ កក្កដា ទើបសមត្ថកិច្ចធ្វើការឃាត់ខ្លួនជនសង្ស័យបានភ្លាមៗ រួចយកមកសួរនាំ។
ក្នុងដំណាក់កាលសមត្ថកិច្ច ជនសង្ស័យសារភាពថា ពិតជាបានចាប់កូនប្រុសបង្កើតរបស់ខ្លួន បោកទៅនឹងសសរផ្ទះពិតមែន ព្រោះមានទំនាស់ពាក្យសម្តីជាមួយប្រពន្ធ ហើយប្រពន្ធបណ្តេញខ្ញុំចេញពីផ្ទះ ដោយទប់កំហឹងមិនបាន ក៏ចាប់កូនបោកតែម្តង។
ក្រោយពីធ្វើសកម្មភាពរួចមក ខ្ញុំក៏គេចទៅនៅភ្នំពេញមួយរយៈ ហើយនៅមិនសុខក៏ត្រឡប់ចូលមកទឹកដីខេត្តសៀមរាបវិញ ស្រាប់តែត្រូវសមត្ថកិច្ចឃាត់ខ្លួនបានតែម្តង។
គួររំលឹកថា កាលពីម៉ោង៧និង៣០នាទីយប់ ថ្ងៃទី២៧ មិថុនា ជនសង្ស័យដែលជាឪពុក បានឈ្លោះប្រកែកគ្នាជាមួយប្រពន្ធ រឿងដែលម៉ូយយកសណ្តែកកួរមិនល្អមកឱ្យលក់ ហើយប្រពន្ធ ប្រើប្តីឱ្យយកទៅដូរ ប៉ុន្តែប្តីមិនទៅ ។ ក្រោយមកប្រពន្ធក៏ខ្ចីទូរស័ព្ទប្តី ដើម្បីទូរស័ព្ទទៅប្រាប់ម៉ូយ ក៏មិនឱ្យទូរស័ព្ទទៅប្រពន្ធទៀត រួចក៏មានការឈ្លោះប្រកែកគ្នា ភ្លាមៗនោះប្រពន្ធក៏ដើរទៅយកទឹក ខណៈពេលនោះស្រាប់តែជនសង្ស័យ ជាប្តីទៅចាប់លើកកូនប្រុសបង្កើត ដែលកំពុងដេកយកទៅបោកនឹងសសរផ្ទះបាយ បណ្តាលឱ្យសស្លាប់៕
