ចាប់បុរសម្នាក់ ប្រើស្នគំរាមថាសម្លាប់ ជនរងគ្រោះ២នាក់

កណ្តាល៖ នគរបាលស្រុកពញាឮ បានចាប់ខ្លួនបុរសម្នាក់ ករណីគំរាមថាសម្លាប់ ជនរងគ្រោះ ដោយប្រើប្រាស់ឧបករណ៍ស្នដែលកើតហេតុ៖ថ្ងៃទី២០ ខែសីហា ឆ្នាំ២០១៩វេលាម៉ោង ២២.៣០នាទី ចំណុច ភូមិដងគោម ឃុំកំពង់អុស ស្រុកពញាឮ ខេត្តកណ្តាល ។

ជនរងគ្រោះ ០២នាក់ ១.ឈ្មោះសំ សុគន្ធ ភេទប្រុស អាយុ៣៥ ឆ្នាំ ជនជាតិខ្មែរមុខរបរកម្មករសំណង់ មានទីលំនៅសព្វថ្ងៃភូមិ-ឃុំកើតហេតុ ។ ២.ឈ្មោះឈួយ សើយ ភេទប្រុសអាយុ២៧ឆ្នាំ ជនជាតិខែ្មរ មុខរបរ កម្មករសំណង់ មានទីលំនៅភូមិស្ដៅ ឃុំស្ដៅ ស្រុកព្រៃកណ្ដៀង ខេត្ដព្រៃវែង ។
ចំណែកជនសង្ស័យ០១នាក់(ឃាត់ខ្លួន) ឈ្មោះ កែវ ស ភេទប្រុស អាយុ២៩ ឆ្នាំ ជនជាតិខ្មែរ មុខរបរកម្មកសំណង់ មានទីលំនៅភូមិ-ឃុំកើតហេតុ ។ វត្ថុតាងចាប់យក ស្ន ០១ប្រវែង៤.៥០ម៉ែត្រ ដងធ្វើអំពីដើមឬស្សីផ្លែដែកមូលចុងស្រួច ។

នគរបាលបានប្រាប់ពីរឿងហេតុនេះថា នៅថ្ងៃ ខែ ឆ្នាំ វេលាម៉ោងកើតហេតុខាងលើជនរងគ្រោះឈ្មោះសំ សុគន្ធ និងជនរងគ្រោះឈ្មោះឈួយ សើយ ភេទ ប្រុសអាយុ ២៧ឆ្នាំ បានត្រឡប់មកពីធ្វើការសំណង់វិញ ហើយក៏បាននាំគ្នាហូបបាយនៅលើផ្ទះមេជាងរបស់ខ្លួនឈ្មោះសុខ ប៊ុនសឿន ភេទប្រុសអាយុ៤៨ឆ្នាំប្រពន្ធឈ្មោះកែវ ឡង់ឌី ភេទស្រី អាយុ ៣៥ឆ្នាំ នៅភូមិ ឃុំកើតហេតុខាងលើ នៅពេលដែលជនរងគ្រោះកំពុងតែអង្គុយហូបបាយជាមួយមេជាងនោះ ស្រាប់តែជនសង្ស័យឈ្មោះ កែវ ស ភេទប្រុស អាយុ២៩ឆ្នាំ ដែលជាប្អូនបង្កើតរបស់ឈ្មោះ កែវ ឡង់ឌី បានដើរត្រឡប់មកពីស៊ីផឹកវិញ រួចហើយបានជេរ ប្រមាថហៅឈ្មោះសំ សុគន្ធ ឲ្យចុះពីលើផ្ទះមកវាយគ្នាព្រមទាំងដៃកាន់ដងស្នផ្លែដែកមូលចុងស្រួចគំរាមថា៖បើខ្លាំងពួកអាឯងចុះដីមកអញចាក់ឲ្យងាប់ បើមិនចុះមកទេគង់ថ្ងៃណាមួយអញសម្លាប់ពួកឯងចោលទាល់តែបាន ឭដូច្នេះឈ្មោះឈួយ សើយបានងើបដើរអើតតាមបង្អួចនិយាយថាកុំប្រមាថអញ្ចឹង គ្នាឯងទេ ទន្ទឹមពេលនោះជនសង្ស័យដែលកំពុងកាន់ស្នរនោះលើកដងស្ន បំរុងចាក់ឈ្មោះឈួយ សើយ ភ្លាមនោះអ្នកនៅជិតខាងបានចាប់ឃាត់និងដកស្ន ទុក បន្ទាប់មកឈ្មោះកែវ ឡង់ឌីបានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលកំពង់អុស កម្លាំងប៉ុស្តិ៍កំពង់អុសបានឃាត់ខ្លួនជនសង្ស័យខាងលើបញ្ជូនមកអធិការដ្ឋាននគរបាលស្រុកពញាឮដើម្បីសាកសួរកសាងសំណុំរឿងបន្តចាត់ការតាមនីតិវិធី ៕