តៃកុងជំនាញបើកឡានហោះបុកគងលើទ្រូងផ្លូវ ដូចក្នុងរឿង
ភ្នំពេញ៖ បុរសម្នាក់សង្ស័យស្រវឹងស្រាដាបខ្លួនរួចបើកឡានលឿនដូចហោះដោយមិនប្រយ័ត្ន ជ្រុលចង្កូតទៅបុករបាំងថ្មចែកផ្លូវគងជាប់ទៅមុខលែងរួច ដោយនៅច្រងាងៗនាកណ្ដាលផ្លូវ។
ករណីគ្រោះថ្នាក់ចរាចរនេះ កើតឡើងកាលពីវេលាម៉ោងជិត១១យប់ថ្ងៃទី២៤ ខែសីហា ឆ្នាំ២០១៩នេះ នៅលើកំណាត់មហាវិថីម៉ៅសេទុង កែងនឹងផ្លូវ១៩៣ សង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ។
ប្រភពព័ត៌មាននៅកើតហេតុនិយាយថា នាមុនពេលកើតហេតុខាងលើនេះ គេឃើញបុរសម្នាក់រួមដំណើរនិងបុរសម្នាក់ទៀត បានបើកឡាន ព្រូស ពណ៌ស មួយគ្រឿងពាក់ផ្លាកលេខភ្នំពេញ2AL-4935 ធ្វើដំណើរតាមបណ្ដោយមហាវិថីម៉ៅសេទុងក្នុងទិសដៅពីកើតទៅលិច ខណៈមកដល់ចំណុចកើតហេតុស្រាប់តែរេចង្កូតមកខាងឆ្វេងជ្រុលទៅបុករបាំងថ្មចែកទ្រូវផ្លូវពេញទំហឹង បណ្តាលឲ្យបាក់របាំងថ្មហើយឡានគងនៅលើរបាំងថ្មជាប់ដោយបើកទៅមុខមិនរួច ភ្លាមៗអ្នកបើកបរនិងអ្នករួមដំណើរបានចុះពីលើឡានរួចគេចខ្លួនបាត់ស្រមោលតែម្ដង។
ក្រោយកើតហេតុ សមត្ថកិច្ចជំនាញចុះមកធ្វើការវាស់វែងយក រថយន្តបង្កទៅរក្សាទុកនៅការិយាល័យចរាចរពណ៍ផ្លូវគោករាជធានីភ្នំពេញ រង់ចាំដោះស្រាយសងថ្លៃខូចខាត ជាមួយសាលារាជធានីភ្នំពេញផងដែរ៕
