អញ្ជើញ តំណាងអង្គការលីកាដូ និងសមាគមធាងត្នោត ដើម្បីចូលរួមក្នុងកិច្ចពិភាក្សាចង្អៀត លើរបាយការណ៍ ការបាត់បង់ដីធ្លី និងការរំលោភបំពាន ក្នុងវិស័យមីក្រូហិរញ្ញវត្ថុ
េ
ភ្នំពេញ៖ អង្គភាពអ្នកនាំពាក្យរាជរដ្ឋាភិបាល បានចេញលិខិតអញ្ជើញ តំណាងអង្គការលីកាដូ និងសមាគមធាងត្នោត ជាមួយនឹងស្ថាប័នជំនាញ ដើម្បីចូលរួមក្នុងកិច្ចពិភាក្សាចង្អៀត ដើម្បីបំភ្លឺពាក់ព័ន្ធនឹងរបាយការណ៍ដែលអង្គការទាំងពីរនេះចេញផ្សាយសេចក្តីថ្លែងការណ៍ស្ដីពី ការធ្វើឱ្យខូចខាតទ្រព្យដាក់បញ្ចាំ៖ ការបាត់បង់ដីធ្លី និងការរំលោភបំពាន ក្នុងវិស័យមីក្រូហិរញ្ញវត្ថុ នៅកម្ពុជា។
លោកផៃ ស៊ីផាន អ្នកនាំពាក្យរាជរដ្ឋាភិបាល នៅរសៀលថ្ងៃទី 30 ខែសីហាឆ្នាំ ២០១៩នេះ បានសរសេរសារ លើផេកហ្វេសប៊ុកផ្លូវការរបស់លោកថា ” អង្គភាពអ្នកនាំពាក្យរាជរដ្ឋាភិបាល(អអរ) មានកិត្តិយសជម្រាបជូនសាធារណជន ឱ្យបានជ្រាបថា អង្គភាព បានចេញលិខិតអញ្ជើញ តំណាងអង្គការលីកាដូ និងសមាគមធាងត្នោត ជាមួយនឹងស្ថាប័នជំនាញ ដើម្បីចូលរួមក្នុងកិច្ចពិភាក្សាចង្អៀត (Closed Door Meeting) ដែលនឹងប្រព្រឹត្តទៅនៅថ្ងៃពុធ ៦កើត ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៤ ខែកញ្ញា ឆ្នាំ២០១៩ វេលាម៉ោង ២:៣០ នាទីរសៀល នៅទីស្ដីការគណៈរដ្ឋមន្ត្រី”។
សូមបញ្ជាក់ថា លោក ផៃ ស៊ីផាន បានថ្លែងអរគុណដល់អង្គការលីកាដូ និងសមាគមធាងត្នោត ដែលបានលើកឡើងរបាយការណ៍ របស់ខ្លួនកន្លងមក ហើយលោកបន្តថា ខាងរាជរដ្ឋាភិបាល មិនទាន់ជឿជាក់របាយការណ៍ របស់អង្គការសង្គមស៊ីវិលទាំងពីរនោះទេ។ លោក ផៃ ស៊ីផាន អ្នកនាំពាក្យរាជរដ្ឋាភិបាល និងជារដ្ឋមន្ត្រីប្រតិភូអមនាយករដ្ឋមន្ត្រី បានប្រកាសនៅថ្ងៃទី២៩ ខែសីហា ឆ្នាំ២០១៩នេះ ក្នុងសន្និសីទសារព័ត៌មានស្តីពី មីក្រូហិរញ្ញវត្ថុ និងផលប៉ះពាល់។
លោកបានថ្លែងថា រាជរដ្ឋាភិបាល មានបំណងចង់ទប់ស្កាត់របាយការណ៍ណាដែលមាននិន្នាការនយោបាយ ដែលត្រូវបានបង្កើតឡើងមក មានតម្លៃអាក្រក់មកលើកម្ពុជា។
លោក ផៃ ស៊ីផាន បានមានប្រសាសន៍ថា រាជរដ្ឋាភិបាល នឹងហៅភាគីខាងអង្គការសិទ្ធិមនុស្សលីកាដូ និងសមាគមធាងត្នោត ដោយមានការចូលរួមពីអ្នកស្រាវជ្រាវ នៃរាជបណ្ឌិត្យសភាកម្ពុជា ខាងធនាគារជាតិកម្ពុជា និងសមាគមគ្រឹះស្ថានមីក្រូហិរញ្ញវត្ថុកម្ពុជា ទៅជជែកគ្នាស្វែងរកការពិត បន្ទាប់ពីអង្គការមិនមែនរដ្ឋាភិបាលទាំងពីរនេះ បានផ្សព្វផ្សាយរបាយការណ៍មួយ ស្តីពីបំណុលប្រជាពលរដ្ឋ ធ្វើឱ្យមានការយល់ច្រឡំ និងមានលក្ខណៈនយោបាយ។
លោក បានបញ្ជាក់ថា “ឆ្លើយតងនឹងសំណួរ វីអូអេ តើយើងធ្វើយ៉ាងម៉េចចំពោះរបាយការណ៍ អង្គការមិនមែនរដ្ឋាភិបាលទាំងពីរនោះ ចំពោះខ្ញុំយើងមានវិធានការ ក៏ប៉ុន្តែវិធានការយ៉ាងណា យើងផ្តល់ព័ត៌មាននៅក្នុងសេរីភាព នៅក្នុងការបញ្ចេញយោបល់។ ខ្ញុំចាត់ទុកថា អ្វីដែលជា Report របស់អង្គការមិនមែនរដ្ឋាភិបាលទាំងពីរហ្នឹង ថាជាការបញ្ចេញយោបល់តែប៉ុណ្ណឹង ហើយទាំងអស់គ្នា ទាំងអ្នកស្រាវជ្រាវមិនអាចទទួលយកបាន ខាងធនាគារក៏មិនអាចទទួលយកបាន។ ខ្ញុំនឹងត្រៀមលក្ខណៈ អញ្ជើញគាត់មកចូលរួមដើម្បីជជែកគ្នា តើការលើកឡើងរបស់គាត់ត្រឹមត្រូវដែរឬទេ គាត់លើកឡើងមក មានទឡ្ហីករណ៍អ្វីខ្លះ ខ្ញុំនឹងរៀបចំវេទិកាមួយបិទទ្វារ អញ្ជើញខាងធនាគារ អញ្ជើញផ្នែកស្រាវជ្រាវទាំងអស់គ្នា សមភាពទាំងអស់គ្នា មកអង្គុយជជែកគ្នា។ យើងអត់ឈរលើស្ថានភាព ឬជំហរ ច្រានចោលថ្កោលទោសនោះទេ យើងមកស្រាវជ្រាវ។ យើងខ្ញុំផ្ទាល់នឹងអញ្ជើញអង្គការទាំងពីរនោះមកជជែកគ្នា ពីព្រោះវាជា Fake News ។ យើងអញ្ជើញមកផ្ទាល់ដើម្បីជជែកគ្នា ហើយសង្ឃឹមថា អង្គការទាំងពីរនោះនឹងមានសេចក្តីក្លាហានមកពន្យល់ ពីព្រោះនេះជាព័ត៌មានសម្រាប់មហាជនរបស់យើង។ យើងខ្ញុំការពារ ការដឹង ការយល់របស់មហាជនយើង ទោះជាព័ត៌មានហ្នឹងអាក្រក់យ៉ាងម៉េច យើងធ្វើអាហ្នឹងឲ្យដឹងទាំងអស់គ្នា”។
បើយោងតាមការផ្សាយរបស់ផេកហ្វេសប៊ុករបស់អង្គការសម្ព័ន្ធខ្មែរជំរឿន និងការពារសិទិ្ធមនុស្ស (លីកាដូ) កាលពីថ្ងៃទី៧ខែសីហាឆ្នាំ២០១៩ បានចេញផ្សាយសេចក្តីថ្លែងការណ៍ស្ដីពី ការធ្វើឱ្យខូចខាតទ្រព្យដាក់បញ្ចាំ៖ ការបាត់បង់ដីធ្លី និងការរំលោភបំពានក្នុងវិស័យមីក្រូហិរញ្ញវត្ថុនៅកម្ពុជា។ អង្គការសម្ព័ន្ធខ្មែរជំរឿន និងការពារសិទិ្ធមនុស្ស (លីកាដូ) និងសមាគមធាងត្នោត ធ្វើការសិក្សាស្រាវជ្រាវលើការរំលោភបំពានសិទ្ធិមនុស្សក្នុងវិស័យមីក្រូហិរញ្ញវត្ថុនៅកម្ពុជា។
បច្ចុប្បន្ននេះ ប្រជាពលរដ្ឋកម្ពុជាជាង ២លាននាក់បានខ្ចីប្រាក់ពីគ្រឹះស្ថានមីក្រូហិរញ្ញវត្ថុ។ ដោយយោងតាមរបាយការណ៍រួមរបស់អង្គការ លីកាដូ និងសមាគមធាងត្នោត បានរកឃើញថា ប៉ុន្មានឆ្នាំចុងក្រោយនេះ កម្រិតនៃបំណុលរបស់ប្រជាពលរដ្ឋបានកើនឡើងកាន់តែខ្លាំងឡើងៗ ដែលនេះបណ្តាលឱ្យអាចកើតមានការរំលោភបំពានសិទ្ធិមនុស្សជាច្រើន រួមមានការបង្ខំឱ្យលក់ដី ការកេងប្រវ័ញ្ចកម្លាំងពលកម្មកុមារ ការធ្វើចំណាកស្រុកដោយសារបំណុល និងការបញ្ចាំខ្លួនដើម្បីដោះបំណុល។
ការធ្វើឱ្យខូចខាតទ្រព្យដាក់បញ្ចាំ៖ ការបាត់បង់ដីធ្លី និងការរំលោភបំពានក្នុងវិស័យមីក្រូហិរញ្ញវត្ថុ នៅកម្ពុជា ផ្តល់ព័ត៌មានលម្អិតអំពីទំហំនិងវិសាលភាពនៃវិស័យមីក្រូហិរញ្ញវត្ថុនៅកម្ពុជា និងបង្ហាញពីការរំលោភបំពានសិទ្ធិមនុស្សដែលអ្នកស្រាវជ្រាវបានរកឃើញ។ ការសិក្សាស្រាវជ្រាវនេះធ្វើឡើងក្នុងឃុំចំនួន១០ ក្នុងខេត្តចំនួន ៤ រួមទាំងរាជធានីភ្នំពេញ ហើយការសិក្សាស្រាវជ្រាវនេះរួមបញ្ចូលទាំង ករណីសិក្សាលម្អិតចំនួន៧ នៃការរំលោភបំពានសិទ្ធិមនុស្ស បន្ទាប់ពីអ្នកស្រាវជ្រាវបានសម្ភាសន៍ជាមួយនឹងអតិថិជនចំនួន២៨នាក់របស់គ្រឹះស្ថានមីក្រូហិរញ្ញវត្ថុ៕