តុលាការខេត្តមណ្ឌលគិរី កោះហៅ លោក ចាន់ សាវុឌ្ឍរដ្ឋលេខាធិការក្រសួងកសិកម្ម ចូលបំភ្លឺករណីផ្តល់ដីរដ្ឋជិត១ម៉ឺនហិកតា ឲ្យក្រុមហ៊ុនឯកជន

(មណ្ឌលគិរី)៖ លោក ចាន់ សាវុឌ្ឍ រដ្ឋលេខាធិការក្រសួងកសិកម្ម រុក្ខាប្រមាញ់ និង នេសាទ និង ជាប្រធានលេខាធិការដ្ឋានសម្បទានដីសេដ្ឋកិច្ច ត្រូវបានព្រះរាជអាជ្ញា នៃអយ្យការអមសាលាដំបូងខេត្តមណ្ឌលគិរី ចេញដីកាកោះអញ្ជើញឲ្យចូលបំភ្លឺនៅព្រឹកថ្ងៃទី២២ ខែកញ្ញា ឆ្នាំ២០១៩ ខាងមុខ។

បើយោងតាមដីកា កោះអញ្ជើញមួយរបស់ អយ្យការអមសាលាដំបូងខេត្តមណ្ឌលគិរី លោក ចាន់ សាវុឌ្ឍ ឱ្យចូលបំភ្លឺនៅ​ខែកញ្ញាខាងមុខនេះ ពាក់ព័ន្ធការផ្ដល់ដីជិត១ម៉ឺនហិកតាឱ្យក្រុមហ៊ុនមួយ។

ក្នុងលិខិតអញ្ជើញចុះថ្ងៃទី២៧ ខែសីហា ឆ្នាំ២០១៩ ព្រះរាជអាជ្ញានៃអយ្យអមសាលាដំបូងខេត្តមណ្ឌលគិរីលោក ហៀង សុភក្រ្ត ឱ្យដឹងថា អញ្ជើញ លោក ចាន់ សាវុឌ្ឍ ឱ្យចូលបំភ្លឺនៅតុលាការ វេលាម៉ោង៩ ព្រឹកនៅថ្ងៃទី១២ ខែកញ្ញា ពាក់ព័ន្ធនឹងការ​ផ្ដល់ដីសម្បទាន​សេដ្ឋកិច្ចជំហាន​ទី១ ​ទៅឱ្យក្រុមហ៊ុនផេស៊ីហ្វិកហ្រ្គេន យ៉ញស្តុក ខមភេនីលីមីធីត ស្ថិតនៅខេត្តមណ្ឌលគិរី។ តាម​លិខិត​ដដែល ដី​ទាំងនោះស្ថិតនៅក្នុងអនុតំបន់ចំនួន​៥ ហើយ​ជាសរុប មានទំហំ៩៧៤១ហិកតា៕