ក្រុមមុខសញ្ញាជួញដូរ-រក្សាទុកគ្រឿងញៀន៥នាក់ត្រូវបានកំលាំងនគរបាលស្រុកសំរោងទងធ្វើការបង្រ្កាប បញ្ជូនទៅតុលាការចាត់ការ
*” ត្រូវឆ្លេីយថាទេ ចំពោះគ្រឿងញៀន ទោះបីយ៉ាងណា កុំចាញ់ការឃោសនាពីជនអគតិ ”
កំពង់ស្ពឺ ÷ នៅថ្ងៃទី៣០ សីហា ២០១៩ វេលាម៉ោង ១៥:៣០នាទី កំលាំងនគរបាលប៉ុស្តិ៍ខ្ទុំក្រាំងបានធ្វើការល្បាតនៅព្រៃខាងជើងភូមិសង្កែជ្រុំ ឃុំខ្ទុំក្រាំង ឃាត់ខ្លួនបានមុខសញ្ញាប្រើប្រាស់គ្រឿងញៀនចំនួន ០៣នាក់ ឈ្មោះ ផាន សំណាង ហៅ មីត ប្រុស អាយុ២១ឆ្នាំ ឈ្មោះ ពូន កក្កដា ប្រុស អាយុ ១៩ឆ្នាំ ឈ្មោះ ឆុន ទិត្យ ប្រុស អាយុ២០ឆ្នាំ នៅភូមិស្រីសំពោង ឃុំខ្ទុំក្រាំង ស្រុកសំរោងទង ខេត្តកំពង់ស្ពឺ ។
ក្នុងប្រតិបត្តិការ សមត្ថកិច្ចដកហូតវត្ថុតាងរួមមានគ្រឿងញៀនចំនួន ១កញ្ចប់ ឧបករណ៍ប្រើប្រាស់មួយចំនួន ,ម៉ូតូ ២គ្រឿង និងទូរសព្ទ័២គ្រឿង។ ក្រោយការសាកសួរឈ្មោះ ផាន សំណាង(មីត)បានឆ្លើយថាគ្រឿងញៀនខ្លួនទិញពីឈ្មោះ មុត ផាន់ណា (ក្លែប) ភេទប្រុស អាយុ២១ឆ្នាំ នៅភូមិពេជ្រចង្វា ឃុំខ្ទុំក្រាំង ស្រុកសំរោងទង ខេត្តកំពង់ស្ពឺ ។ ដោយបានការឯកភាពពីព្រះរាជអាជ្ញា នគរបាលជំនាញបន្ដចុះស្រាវជ្រាវឃាត់ខ្លួនឈ្មោះ កង ថុង ប្រុស អាយុ៣៥ឆ្នាំ នៅភូមិពេជ្រចង្វា ឃុំ ខ្ទុំក្រាំង ស្រុកសំរោងទង និងឈ្មោះ មុត ផាន់ណា (ក្លែប) ព្រមទាំងដកហូតគ្រឿងញៀនចំនួន ១កញ្ចប់ និងទូរស័ព្ទដៃ ១គ្រឿងបន្ថែម។
សរុបមុខសញ្ញាពាក់ព័ន្ធ ៥នាក់ប្រុស គ្រឿងញៀន ២កញ្ចប់ ទូរស័ព្ទដៃ ៣គ្រឿង ម៉ូតូ ២គ្រឿង និងឧបករណ៍ប្រើ ប្រាស់គ្រឿងញៀនមួយចំនួន ។
បច្ចុប្បន្ន មុខសញ្ញាសង្ស័យខាងលើ ស្រុកបានកសាងសំណុំរឿង ទៅឲ្យការិយាល័យប្រឆាំងគ្រឿងញៀនខេត្ដ ដេីម្បីបញ្ជូនទៅតុលាការចាត់ការតាមនីតិវិធីច្បាប់៕