រដ្ឋមន្ត្រីពាណិជ្ជកម្ម ពន្យល់ពីអត្ថប្រយោជន៍ដែលកម្ពុជា ទទួលបានពីការចូលរួមពិព័រណ៍សាកវប្បកម្មអន្តរជាតិ
ប៉េកាំង, ចិន ៖ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានឱ្យដឹងថា ព្រឹត្តិការណ៍ពិព័រណ៍សាកវប្បកម្មអន្តរជាតិ មិនត្រឹមតែផ្ដល់ឱកាសសម្រាប់កម្ពុជា ក្នុងការពង្រឹងកិច្ចការពារបរិស្ថាន ការអភិរក្សធម្មជាតិ និងការលើកកម្ពស់ទេសចរណ៍ប៉ុណ្ណោះទេ ប៉ុន្តែក៏ជាវេទិកាថ្មីមួយ សម្រាប់ប្រទេសចូលរួមទាំងអស់ ធ្វើការបង្កើនកិច្ចសហប្រតិបត្តិការលើវិស័យពាណិជ្ជកម្ម និងវិនិយោគថែមទៀត។
ការលើកឡើងរបស់លោករដ្ឋមន្ត្រី បានធ្វើឡើងនាឱកាសដឹកនាំគណៈប្រតិភូ ចូលរួមពិធីអបអរសាទរ “ទិវាជាតិកម្ពុជា” នៅក្នុងពិព័រណ៍សាកវប្បកម្មអន្តរជាតិទីក្រុងប៉េកាំង កាលពីថ្ងៃសៅរ៍ ទី៣១ ខែសីហា ឆ្នាំ២០១៩ ក្រោមវត្តមានចូលរួមពីលោកស្រី ខែក កែមាលី ឯកអគ្គរាជទូតកម្ពុជា ប្រចាំសាធារណរដ្ឋប្រជាមានិតចិន, លោក ចាង អ៊ីងឆាវ អគ្គលេខាធិការរងនៃសមាគមផ្កាប្រទេសចិន និងជាអគ្គស្នងការរងនៃពិព័រណ៍សាកវប្បកម្មអន្តរជាតិ, លោក អ៊ូ កាំង អនុប្រធាននាយកដ្ឋាននៃការិយាល័យសម្របសម្រួលពិព័រណ៍សាកវប្បកម្មអន្តរជាតិ, លោកស្រី យ៉ាង យានយាន អគ្គលេខាធិការរងនៃលេខាធិការដ្ឋានពិព័រណ៍ចិន-អាស៊ាន ប្រចាំទីក្រុងណាននីង, មន្ត្រីជាន់ខ្ពស់នៃប្រទេសទាំងពីរ ភ្ញៀវកិត្តិយសមកពីប្រទេស និងអង្គការអន្តរជាតិនានាចំនួន ៥០ រួមជាមួយសិស្ស និងនិស្សិត សរុបប្រមាណជាង ៣០០នាក់។
នៅក្នុងឱកាសនោះ លោក ប៉ាន សូរស័ក្តិ បានគូសបញ្ជាក់ថា ឆ្នាំនេះកម្ពុជាបានជ្រើសរើសប្រធានបទ ”រស់នៅដោយភាពសុខដុមជាមួយនឹងធម្មជាតិ” ដោយសារពិភពលោក បានទទួលស្គាល់ពីសម្បូរបែបនៃវប្បធម៌ សិល្បៈ និងបរិស្ថានធម្មជាតិដ៏ស្រស់ត្រកាលរបស់កម្ពុជា ដែលមានសក្ដានុពលខ្ពស់ សម្រាប់ការអភិវឌ្ឍសេដ្ឋកិច្ចប្រកបដោយចីរភាព ចំណែកផលិតផលខ្មែរ ដែលដាក់តាំងនៅក្នុងពន្លាជាតិ គឺដើម្បីបង្ហាញពីវឌ្ឍនភាពនៃវិស័យពាណិជ្ជកម្មជាតិ និងដើម្បីទាក់ទាញការវិនិយោគបន្ថែម សំដៅពង្រីកការនាំចេញទៅកាន់ទីផ្សារពិភពលោក។
លោករដ្ឋមន្ត្រី បានបន្ថែមទៀតថា លោកប្រធានាធិបតី ស៊ី ជីនពីង តែងតែលើកឡើងពី ភ្នំបៃតង និងទឹកថ្លាយង់ គឺជាភ្នំមាស-ភ្នំប្រាក់ ចំណែកការលើកកម្ពស់បរិស្ថានធម្មជាតិ គឺជាការលើកកម្ពស់ផលិតភាព ហើយនេះជាមូលហេតុសំខាន់ ដែលប្រទេសកម្ពុជា បានគាំទ្រប្រទេសចិន ក្នុងការរៀបចំពិព័រណ៍សាកវប្បកម្មអន្តរជាតិ និងតែងចូលរួមឥតរុញរានៅក្នុងពិព័រណ៍ដ៏អស្ចារ្យនេះ ដើម្បីពង្រឹង និងពង្រីកកិច្ចសហប្រតិបត្តិការជាមួយប្រទេសចិន និងប្រទេសនានា ក្នុងកិច្ចការពារបរិស្ថានធម្មជាតិ។
បន្ថែមលើនោះ លោករដ្ឋមន្ត្រី ប៉ាន សូរស័ក្តិ ក៏បានថ្លែងអំណរគុណចំពោះរដ្ឋាភិបាលប្រទេសចិន ជាពិសេសគណៈកម្មការរៀបចំពិព័រណ៍ទីក្រុងប៉េកាំងឆ្នាំ២០១៩ ដែលបានជួយសម្របសម្រួលការចូលរួមរបស់កម្ពុជា នៅក្នុងព្រឹត្តិការណ៍ដ៏មានសារសំខាន់នេះ និងបានអញ្ជើញដឹកនាំគណៈប្រតិភូ ធ្វើការទស្សនាពន្លាជាតិ ព្រមទាំងពន្លារបស់ប្រទេសចិន និងសហភាពអារ៉ាប់រួម ដើម្បីស្វែងយល់អំពីសក្តានុពលធនធានធម្មជាតិ និងដកស្រង់បទពិសោធន៍ល្អៗ សម្រាប់ការចូលរួមរបស់កម្ពុជា នៅក្នុងឆ្នាំក្រោយ។
សូមជម្រាបថា ពិព័រណ៍សាកវប្បកម្មអន្តរជាតិទីក្រុងប៉េកាំង ឆ្នាំ២០១៩ មានរយៈពេល ៦ខែ ហើយត្រូវបានបើកដំណើរការចាប់ពីថ្ងៃទី២៩ ខែមេសា ឆ្នាំ២០១៩ រហូតដល់ថ្ងៃទី៧ ខែតុលា ឆ្នាំ២០១៩ ដោយមានការចូលរួមពីបណ្តាប្រទេស និងអង្គការអន្តរជាតិនានាក្នុងពិភពលោកប្រមាណ ១២០។ គិតចាប់ពីថ្ងៃដំបូង រហូតមកដល់ថ្ងៃទី៣១ ខែសីហា ឆ្នាំ២០១៩ ពន្លាជាតិរបស់កម្ពុជា បានទាក់ទាញភ្ញៀវកិត្តិយស និងភ្ញៀវទេសចរចម្រុះជាតិសាសន៍ ចូលមកទស្សនាសួនកម្ពុជា និងស្វែងយល់អំពីវប្បធម៌ ប្រពៃណី និងផលិតផលខ្មែរ សុរបប្រមាណជាង ៤០ម៉ឺននាក់៕