នាយកប្រត្តិបត្តិសាខាកាកបាទក្រហមកម្ពុជារាជធានីភ្នំពេញ ចុះបើកវគ្គបណ្ដុះបណ្ដាលដល់អ្នកស្ម័គ្រ្គចិត្ត កាកបាទក្រហមនៅខណ្ឌសែនសុខ
ភ្នំពេញ៖ កាលពីព្រឹកថ្ងៃទី ០២ ខែ កញ្ញា ឆ្នាំ ២០១៩នេះ នៅសាលាខណ្ឌសែនសុខ សាខាកាកបាទក្រហមកម្ពុជា រាជធានីភ្នំពេញ បានបើកវគ្គបណ្តុះបណ្តាលជាមូលដ្ឋាន រយៈពេល១ថ្ងៃ ជូនដល់អ្នកស្ម័គ្រចិត្តកាកបាទក្រហមកម្ពុជា ដែលបានជ្រើសរើសមកពីតាមបណ្តាសង្កាត់ចំនួន៦ ក្នុងខណ្ឌសែនសុខ សរុបចំនួន១៤០នាក់ (ស្រី៣៧នាក់) ក្រោមអធិបតីភាព លោក ជិន ប៊ុនធឿន នាយកប្រតិបត្តិសាខា កាកបាទក្រហមកម្ពុជារាជធានីភ្នំពេញ និង ជានាយករងរដ្ឋបាលសាលារាជធានីភ្នំពេញ។
មានប្រសាសន៍នាឱកាសនោះ ក្នុងនាមឯកឧត្តម ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ លោកនាយកប្រតិបត្តិសាខា បានពាំនាំមកនូវការផ្តាំផ្ញើសាកសួរសុខទុក្ខពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់បងប្អូនអ្នកស្ម័គ្រចិត្តទាំងអស់ប្រកបដោយក្តីនឹករលឹក ។ លោកនាយកសាខាបានគូសបញ្ជាក់ថា ចាប់តាំងពីមុនរហូតមកដល់បច្ចុប្បន្ននេះ អ្នកស្ម័គ្រចិត្តយើងពិតជាបានដើរតួនាទីយ៉ាងសំខាន់ណាស់ ក្នុងការចូលរួមការងារមនុស្សធម៌ដោយមិនចង់បានអ្វីតបស្នងមកវិញ គឺចូលរួមដោយស្មោះស្ម័គ្រគ្មានប្រាក់បៀវត្សន៍ ឬប្រាក់ឧបត្ថម្ភ និងបានបូជាកម្លាំងកាយចិត្ត លះបង់ពេលវេលា ជាអ្នកអប់រំផ្សព្វផ្សាយចលនា ជាអ្នកជួយសង្គ្រោះ និងជាអ្នកផ្តល់ព័ត៌មានអំពីគ្រោះមហន្តរាយផ្សេងៗបានទាន់ពេលវេលា នៅក្នុងមូលដ្ឋានរបស់ខ្លួន។ មុននឹងប្រកាសបេីកវគ្គបណ្តុះបណ្តាល លោកនាយកប្រតិបត្តិសាខា ក៏សូមឲ្យបងប្អូនជាសិក្ខាកាមទាំងអស់ ខិតខំយកចិត្តទុកដាក់ក្រេបជញ្ជក់ចំណេះដឹងពីវគ្គនេះដេីម្បីបង្កេីនសមត្ថភាព ក្នុងការបំពេញការងារមនុស្សធម៌របស់យេីងនៅតាមមូលដ្ឋានឲ្យកាន់តែមានប្រសិទ្ធភាព និងទទួលបានជោគជ័យថែមទៀត ។
សូមបញ្ជាក់ថា ក្នុងវគ្គបណ្តុះបណ្តាលជាមូលដ្ឋាននេះ បានលេីកយកមេរៀនសំខាន់ៗចំនួន៥ មកបង្ហាត់បង្ហាញរួមមាន៖
១- ប្រវត្តិចលនាកាកបាទក្រហម អឌ្ឍចន្ទក្រហម
២- គោលនយោបាយ តួនាទីរបស់អ្នកស្ម័គ្រចិត្តកាកបាទក្រហមកម្ពុជា
៣- សុវត្ថិភាពចរាចរណ៍ផ្លូវគោក
៤- ការគ្រប់គ្រងគ្រោះមហន្តរាយ និងការគ្រប់គ្រងអគ្គិភ័យ
៥- វិជ្ជាសង្គ្រោះបឋម ៕