ចាប់ខ្លួនជនសង្ស័យម្នាក់ ជាមួយនឹងថ្នាំញៀនមួយចំនួនធំ
ភ្នំពេញ៖អធិការដ្ឋាននគរបាលខណ្ឌមានជ័យ បានឲ្យដឹងថា ករណីជួញដូរដោយខុសច្បាប់នូវសាធាតុញៀននគរបាលចាប់ខ្លួនជនសង្ស័យម្នាក់ ជាមួយនឹងថ្នាំញៀនមួយចំនួនធំ នៅថ្ងៃ ចន្ទ ទី២ ខែកញ្ញា ឆ្នាំ២០១៩ វេលាម៉ោង២២។
កម្លាំងនគរបាលខណ្ឌមានជ័យ និង កម្លាំងនគរបាលប៉ុស្តិ៍ចាក់អង្រែលើ បានសហការជាមួយកម្លាំងសាលាខណ្ឌមានជ័យ ត្រួតពិនិត្យអាវុធជាតិផ្ទុះ និង អនុវត្តច្បាប់ចរាចរណ៍ផ្លូវគោក នៅចំណុចមុខឃ្លាំងដែក ផ្លូវ២៧១ ភូមិ៧ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ក៏បានឃាត់ខ្លួនជនសង្ស័យម្នាក់ ពីបទ ជួញដូរដោយខុសច្បាប់នូវសារធាតុញៀន ដែលមានឈ្មោះ ប៊ូ ងួន ភេទប្រុស អាយុ ២៧ ឆ្នាំ មុខរបរ មិនពិតប្រាកដ ទីលំនៅផ្ទះគ្មានលេខ ផ្លូវលំ ភូមិទួលត្នោត ឃុំគគីរ ស្រុកកៀនស្វាយ ខេត្តកណ្តាល ។ ក្នុងពេលឃាត់ខ្លួនជនរូបនោះ សមត្ថកិច្ចបានដកហូតវត្ថុតាង ក្រាមពណ៌សថ្លា (សង្ស័យជាគ្រឿងញៀន) ចំនួន ៣ កញ្ចប់ថង់ធំ និង ម៉ូតូ១គ្រឿងម៉ាកកាវ៉ាសាគី ពណ៌ត្រួយចេក ពាក់ផ្លាកលេខ ភ្នំពេញ 1GF 4848 ។
បច្ចុប្បន្នជនសង្ស័យឈ្មោះ ប៊ូ ងួន ឃាត់ខ្លួននៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់តាមនីតិវិធី ៕
