សាខាកាកបាទក្រហមកម្ពុជារាជធានី ទទួលទេយ្យទានសប្បុរសធម៌ពីសម្តេចព្រះឧត្តមចរិយា បណ្ឌិតឈឹង ប៊ុនឈា ដែលគិតជាទឹកប្រាក់ចំនួនជាង២៤លានរៀល
ភ្នំពេញ៖ លោក ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណៈកម្មាធិការសាខា កាកបាទក្រហមកម្ពុជា រាជធានីភ្នំពេញ កាលពីល្ងាចថ្ងៃសុក្រ ៦កេីត ខែអស្សុជ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី ០៤ ខែ តុលា ឆ្នាំ ២០១៩នេះបានអញ្ជើញទៅទទួលទេយ្យទានសប្បុរសធម៌ពីសម្តេចព្រះឧត្តមចរិយា បណ្ឌិតឈឹង ប៊ុនឈា សមាជិកថេរសភា នៃព្រះរាជាណាចក្រកម្ពុជា និងជាព្រះចៅអធិការវត្តវិមានតេជះ ហៅវត្តស្រះចក ដែលគិតជាទឹកប្រាក់ចំនួនជាង២៤លានរៀល ដើម្បីបន្តនាំទៅចែកជូនដល់ប្រជាពលរដ្ឋដែលរងគ្រោះនិងងាយរងគ្រោះ។ សម្តេចព្រះឧត្តមចរិយា ក្នុងឱកាសនោះ បានមានព្រះថេរដីកាកោតសរសើរ គាំទ្រ និងមានទឹកព្រះទ័យសោមនស្សរីករាយ ក្នុងការចូលរួមចំណែកលើកកម្ពស់កម្លាំងមនុស្សធម៌របស់កាកបាទក្រហមកម្ពុជា ។
សម្តេចព្រះឧត្តមចរិយា មានសង្ឃដីកាថា សម្រាប់
វត្តស្រះចក ព្រះអង្គតែងតែចែករំលែកទេយ្យទាននិងបច្ច័យផ្តល់ទៅសាខាកាកបាទក្រហមកម្ពុជា រាជធានីភ្នំពេញ ក្នុងមួយឆ្នាំ២ដង ដើម្បីអោយសាខាកាកបាទក្រហមកម្ពុជា រាជធានីភ្នំពេញ បន្តនាំទៅចែកជូនដល់ប្រជាពលរដ្ឋដែលរងគ្រោះនិងងាយរងគ្រោះ។ ទេយ្យទាននិងបច្ច័យផ្តល់ទៅសាខាកាកបាទក្រហមកម្ពុជា នេះដោយសារតែព្រះអង្គមើលឃើញពីសកម្មភាពមនុស្សធម៌ដ៏ល្អរបស់ សាខាកាកបាទក្រហមកម្ពុជា រាជធានីភ្នំពេញ ដោយបានផ្តល់ជូនជនរងគ្រោះនិងអ្នករងគ្រោះដោយមិនប្រកាន់ពូជសាសន៍ និន្នាការនយោបាយនិងបានយកទៅប្រើប្រាស់ចំគោលដៅ។
ក្នុងឱកាសនោះដែរ លោកឃួង ស្រេង បានមានប្រសាសន៍ ថ្លែងអំណរព្រះគុណ អំណរគុណចំពោះសម្តេចព្រះឧត្តមចរិយា បណ្ឌិត ឈឹង ប៊ុនឈា ព្រះសង្ឃ គណៈកម្មការ អាចារ្យ វត្តទាំងអស់ ដែលតែងតែបានបរិច្ចាគទេយ្យទានជូនដល់សាខាកាកបាទក្រហមកម្ពុជា រាជធានីភ្នំពេញ ក្នុងការចូលរួមជាមួយសកម្មភាពមនុស្សធម៌ ដែលនេះជាការចូលរួមចំណែកលើវិស័យមនុស្សធម៌ដល់ប្រពៃរវាងពុទ្ធចក្រនិងអាណាចក្រ។
លោកប្រធានគណៈកម្មាធិការសាខា បានសន្យាថានឹងចាត់ចែងប្រើប្រាស់នូវទេយ្យទានទាំងនេះជួយឲ្យចំគោលដៅដល់ដៃជនរងគ្រោះគ្រប់ប្រភេទ ឲ្យស្របតាមគោលការណ៍គ្រឹះទាំង៧ប្រការរបស់ចលនាកាកបាទក្រហម ។
គួរបញ្ជាក់ថា ទេយ្យទានដែលសាខាកាកបាទក្រហមកម្ពុជា រាជធានីភ្ររាជធានីភ្នំពេញ ទទួលបានរួមមាន៖គ្រឿងឧបភោគបរិភោគចំនួន៨មុខ សម្ភារៈប្រើប្រាស់ចំនួន២១សម្រាប់ និងថវិកាចំនួន៤លានរៀល ដែលគិតសរុបជាទឹកប្រាក់ទាំងអស់ចំនួន២៤.២៥៤.៩០០រៀលឬស្មើនឹងជាង៦០០០ដុល្លារ ៕