យកសម្បកគ្រាប់ដេកា ផ្សាកែច្នៃ ផ្ទុះមនុស្ស៤នាក់ បានរងរបួសធ្ងន់និងស្រាល
ភ្នំពេញ ៖ អាជ្ញាធរមីន បានផ្សាយថា មានករណីផ្ទុះគ្រាប់ដេកា បានបណ្តាលឲ្យមនុស្ស៤នាក់ បានរងរបួសធ្ងន់និងស្រាល ដោយសារតែមានបុរសម្នាក់ បានគ្រាប់នោះ មកផ្សាកែច្នៃធ្វើជាដុំដែកសម្រាប់ទម្លាក់ចុះក្នុងទឹក ដើម្បីរកត្រី នៅវេលាម៉ោង១រសៀលថ្ងៃទី២៤ តុលា នៅកន្លែងផ្សារដែកលើបែចិញ្ចឹមត្រី ក្នុងភូមិក សង្កាត់ច្រាំងចម្រេះទី២ ខណ្ឌឫស្សីកែវ រាជធានីភ្នំពេញ ។
ជនរងគ្រោះ ក្នុងហេតុការណ៍ផ្ទុះសម្បកគ្រាប់នេះ ១-ឈ្មោះ ណុះ សាមីន ភេទប្រុស អាយុ៥៤ឆ្នាំ ជាជាងផ្សារដែក រងរបួសធ្ងន់ មានលំនៅភូមិក កន្លែងកើត ហេតុ ត្រូវបានបញ្ជូនទៅកាន់មន្ទីរពេទ្យកាល់ម៉ែត ។ ២-ឈ្មោះ យ៉ើ បារី ភេទប្រុស អាយុ៣២ឆ្នាំ របួសធ្ងន់ ។ ៣-ឈ្មោះ មិន យូរី ភេទប្រុស អាយុ៣០ឆ្នាំ រងរបួសធ្ងន់ ។ ៤-ឈ្មោះ លី ប្រហីម ភេទប្រុស រងរបួសស្រាល ។
នគរបាលមូលដ្ឋាន បានឱ្យដឹងថា មុនពេលកើតហេតុអ្នកភូមិ២នាក់ បានយកសម្បកគ្រាប់ផ្លោងទៅផ្សា ដើម្បីធ្វើជាជើងម៉ាញ ស្រាប់តែផ្ទុះនៅលើបែចិញ្ចឹមត្រី ក្នុងទន្លេ បណ្តាលឱ្យមនុស្ស៤នាក់រងរបួស។ បច្ចុប្បន្នអ្នករងរបួសធ្ងន់ ដែលជាជាងផ្សារដែក ត្រូវក្រុមគ្រួសារបញ្ជូនទៅកាន់មន្ទីរពេទ្យកាល់ម៉ែត ដោយឡែក២នាក់ទៀត បញ្ជូនទៅកាន់មន្ទីរពេទ្យសម្តេចឪ ក្រោយមកបន្តទៅកាន់មន្ទីរពេទ្យធំ និងម្នាក់បញ្ជូនទៅគ្លីនិកឯកជន។
បុរសម្នាក់ដែលរស់នៅក្បែរកន្លែងកើតហេតុ បាននិយាយប្រាប់អ្នកសារព័ត៌មានថា បុរសម្នាក់ដែលរងរបួសនោះ គឺជាអតីតទាហានជើងចាស់ ហើយគ្រាប់ដែលផ្ទុះនោះក៏ចាស់ដែរ។ លោកបន្តថា ពីដំបូងឡើយ មានបុរសម្នាក់ផ្សេងទៀត គឺជាអ្នកផ្សាដែក ហើយក៏មានបុរសម្នាក់ទៀត ដើរមកនិយាយប្រាប់ថាគ្រាប់នេះដូចជាមិនស្រួលទេ កុំផ្សាកែច្នៃវាអី ហើយបុរសម្នាក់នោះក៏ចាប់ផ្តើមផ្សា ប៉ុន្តែបុរសនោះផ្សាដូចជាមិនទំនង ក៏ស្រាប់តែឈ្មោះ ណុះ សាមីន ចូលមកផ្សាម្តងព្រោះខ្លួនជាអ្នកជំនាញខាងផ្សា និងជាអតីតទាហានជើងចាស់ស្គាល់គ្រាប់ច្បាប់ និងធ្លាប់កែច្នៃគ្រាប់អស់ជាច្រើនមកហើយ ប៉ុន្តែចៃដន្យអាក្រក់ ក៏ធ្វើឲ្យគ្រាប់នោះផ្ទុះតែម្តង៕
