កម្ពុជា និងវៀតណាម នឹងរៀបចំសមយុទ្ធ សង្គ្រោះ ពេលមានគ្រោះមហន្តរាយនៅតាមបណ្តោយព្រំដែន
ភ្នំពេញ៖ នៅព្រឹកថ្ងៃព្រហស្សតិ៍ ទី៣១ ខែតុលា ឆ្នាំ២០១៩នេះ នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ បានអនុញ្ញាតឱ្យ លោក ឧត្តមសេនីយ៍ឯកបម្រុង ផាន វ៉ាន់ហ្សាង (Phan Van Giang) អនុរដ្ឋមន្ត្រីក្រសួងការពារប្រទេស និងជាប្រធានអគ្គសេនាធិការ នៃកងទ័ពប្រជាជនវៀតណាម ចូលជួបសំដែងការគួរសម និងប្រជុំពិភាក្សាការងារទ្វេភាគី នៅសាលសវនាការរបស់អគ្គបញ្ជាការដ្ឋាន នាទីក្រុងភ្នំពេញ។
ក្នុងជំនួប និងកិច្ចប្រជុំពិភាក្សាការងារនាពេលនោះ លោកផាន់ វ៉ាន់ហ្សាង បានពាំនាំពាក្យផ្ដាំផ្ញើសួរសុខទុក្ខ ពីថ្នាក់ដឹកនាំក្រសួងការពារប្រទេស និងអគ្គសេនាធិការកងទ័ពប្រជាជនវៀតណាម ពិសេសនាយករដ្ឋមន្ត្រីវៀតណាម ជូនចំពោះ លោក នាយឧត្តមសេនីយ៍ អគ្គមេបញ្ជាការ រួមនឹងថ្នាក់ដឹកនាំទាំងអស់ ក្នុងកងយោធពលខេមរភូមិន្ទ ក្នុងដំណើរទស្សនកិច្ចរបស់លោក រួមនិងសមាជិកប្រតិភូយោធាជាន់ខ្ពស់ អគ្គសេនាធិការកងទ័ពប្រជាជនវៀតណាម មកកាន់កម្ពុជាលើកនេះផងដែរ។ លោក ឧត្ដមសេនីយ៍ឯកបម្រុង ផាន វ៉ាន់ហ្សាង ក៏បានសម្ដែងនូវអំណរគុណ ជាអនេកចំពោះ លោក នាយឧត្តមសេនីយ៍ អគ្គមេបញ្ជាការ រួមនិងថ្នាក់ដឹកនាំទាំងអស់ របស់កងយោធពលខេមរភូមិន្ទ ចំពោះការទទួលស្វាគមន៍ និងធ្វើបដិសណ្ឋារកិច្ចចំពោះប្រតិភូប្រកបដោយភាពរាក់ទាក់ ស្និទ្ធស្នាល កក់ក្តៅបំផុត សម្រាប់ដំណើរទស្សនកិច្ចរបស់លោក រួមនិងសមាជិកប្រតិភូអគ្គសេនាធិការកងទ័ពប្រជាជនវៀតណាម មកកាន់កម្ពុជាលើកនេះ។ ឧត្តមសេនីយ៍ឯកបម្រុង ផាន វ៉ាន់ហ្សាង បានបញ្ជាក់ថា៖ កិច្ចសហប្រតិបត្តិការ រវាងក្រសួងការពារជាតិទាំងពីរ គឺបានប្រព្រឹត្តទៅយ៉ាងល្អប្រសើរ លើការពង្រឹងពង្រីកចំណងទាក់ទង នៃការរឹតចំណងសាមគ្គីភាព មិត្តភាព កិច្ចសហប្រតិបត្តិការ រវាងកងទ័ព និងប្រជាជនប្រទេសទាំងពីរ ពិសេសលើការរៀបចំឲ្យមានការធ្វើសមយុទ្ធរួមគ្នា លើប្រធានបទសង្គ្រោះគ្រោះមហន្តរាយ និងមនុស្សធម៌ សំដៅត្រៀមជាស្រេច ពេលមានគ្រោះមហន្តរាយកើតឡើងជាយថាហេតុ នៅតាមបណ្ដោយព្រំដែន នៃប្រទេសទាំងពីរ ដែលសមយុទ្ធនោះ នឹងប្រព្រឹត្តទៅនៅក្នុងខែធ្នូ ឆ្នាំ២០១៩ខាងមុខ។ លោក បានថ្លែងថា៖ ការថែរក្សាសន្តិសុខ និងសណ្ដាប់ធ្នាប់ តាមបណ្តោយព្រំដែន និងការស្វែងរកអដ្ឋិធាតុ រួមជាមួយនឹងការហ្វឹកហាត់បណ្ដុះបណ្ដាលនាយទាហាន គឺជាប្រការសំខាន់ចាំបាច់បំផុត ដែលកងទ័ពប្រទេសយើងទាំងពីរត្រូវតែផ្ដល់កិច្ចសហការ ជួយគ្នាដូចដែលប្រទេសយើងទាំងពីរធ្លាប់បានធ្វើកន្លងមក ទៅតាមកិច្ចព្រមព្រៀងរបស់ក្រសួងការពារប្រទេស នៃប្រទេសទាំងពីរ។
លោក នាយឧត្តមសេនីយ៍ វង្ស ពិសេន ជំនួសមុខឲ្យថ្នាក់ដឹកនាំក្រសួងការពារជាតិ ពិសេសកងយោធពលខេមរភូមិន្ទ បានសំដែងនូវការស្វាគមន៍ នឹងបានថ្លែងអំណរគុណ ចំពោះការផ្ដាំផ្ញើសួរសុខទុក្ខផងដែរ របស់ថ្នាក់ដឹកនាំក្រសួងការពារប្រទេស និងអគ្គសេនាធិការកងទ័ពប្រជាជនវៀតណាម ដល់ថ្នាក់ដឹកនាំកងទ័ពកម្ពុជា។ ជាមួយនេះ លោក អគ្គមេបញ្ជាការ នៃកងយោធពលខេមរភូមិន្ទ ក៏បានសំដែងនូវការរីករាយផងដែរ ជាមួយនឹងទំនាក់ទំនងកាន់តែជិតស្និទ្ធ រវាងកងទ័ពទាំងពីរកន្លងមក ដែលទំនាក់ទំនងទាំងនោះ បាននាំមកនូវផលប្រយោជន៍ ជូនដល់ប្រជាជន ជាពិសេសប្រជាជនដែលកំពុងតែរស់នៅតាមព្រំដែន។ ចំពោះការរៀបចំសមយុទ្ធ សង្គ្រោះ ពេលមានគ្រោះមហន្តរាយ លោក អគ្គមេបញ្ជាការ បានមានប្រសាសន៍ថា៖ នេះជាការអនុវត្តមួយ ដែលផ្ដល់នូវផលប្រយោជន៍ដល់ប្រជាជនទាំងពីរ នៅពេលដែលមានគ្រោះមហន្តរាយ ជាពិសេសនៅពេលដែលមានភ្លើងឆេះព្រៃ និងមានខ្យល់ព្យុះ ទឹកជំនន់ជាដើម។ លោក បន្តថា៖ ភ្លើងឆេះព្រៃ វាមិនស្គាល់ព្រំដែនទេ ដូច្នេះការអនុវត្តសមយុទ្ធនេះ ត្រូវតម្រូវអោយកងទ័ពកម្ពុជា អាចចូលទៅក្នុងទឹកដីវៀតណាម ហើយកងទ័ពវៀតណាម ក៏អាចចូលមកក្នុងទឹកដីកម្ពុជា តាមបណ្ដោយព្រំដែន ដែលមានបញ្ហាទាំងនោះ ។ ដើម្បីជៀសវាងដល់ការយល់ច្រឡំ និងអោយមានការយល់ដឹងទូលំទូលាយផងនោះ លោកអគ្គមេបញ្ជាការ បានផ្តល់អនុសាសន៍ថា៖ ឲ្យមានសកម្មភាពមនុស្សធម៌ ជាមួយគ្នាក្នុងសមយុទ្ធនោះ គឺភាគីកម្ពុជា អាចចូលទៅជួយសង្គ្រោះ ព្យាបាលប្រជាជនវៀតណាម ហើយភាគីវៀតណាម អាចចូលមកជួយសង្គ្រោះ និងជួយព្យាបាលប្រជាជនកម្ពុជា ដើម្បីត្រៀមនៅពេលមានគ្រោះមហន្តរាយ ហើយក៏អាចជំរុញឲ្យមាន កម្មវិធីដូចជាកីឡា សិល្បៈរួមគ្នាផងដែរ។ សំខាន់ជាងនេះទៀតធ្វើយ៉ាងណាបន្តកិច្ចសហប្រតិបត្តិការដែលមានស្រាប់ និងជំរុញបង្កលក្ខណៈ ធ្វើយ៉ាងណាឲ្យប្រជាជនទាំងពីរប្រទេស អាចប្រកបអាជីវកម្មតាមព្រំដែនបានដោយងាយស្រួល។ លោក វង្ស ពិសេន ក៏បានសម្ដែងនូវអំណរគុណផងដែរ ចំពោះរដ្ឋាភិបាល កងទ័ព និងប្រជាជនវៀតណាម ដែលរហូតមក តែងតែបានផ្តល់ការគាំទ្រទាំងស្មារតី សម្ភារៈ ចំពោះគោលនយោបាយដឹកនាំប្រទេស របស់ប្រមុខរាជរដ្ឋាភិបាលកម្ពុជា ពិសេសបានផ្ដល់នូវកិច្ចសហការដ៏ល្អ ក្នុងការផ្តល់ព័ត៌មានពីគ្នាទៅវិញទៅមក ក្នុងការចូលរួមទប់ស្កាត់ រាល់បទល្មើសឆ្លងដែនខុសច្បាប់ ឧក្រិដ្ឋកម្មឆ្លងដែន បទល្មើសព្រៃឈើ បទល្មើសគ្រឿងញៀនឆ្លងដែន ពិសេសក្នុងពេលកន្លងមកបានផ្ដល់នូវកិច្ចគាំទ្រសហប្រតិបត្តិការ ពិសេសក្នុងការមិនផ្ដល់ទឹកដី និងអនុញ្ញាតឲ្យដល់ក្រុមប្រជាធិបតេយ្យក្លែងក្លាយ ដែលតែងតែប្រឆាំង នឹងការដឹកនាំប្រទេសរបស់រាជរដ្ឋាភិបាលកម្ពុជាកន្លងមក ក្នុងការបង្កភាពវឹកវរ ចលាចល នាំនូវគ្រោះមហន្តរាយ នៅភ្លើងសង្គ្រាម ដើម្បីប្រឆាំងជាមួយនឹងកម្ពុជា។
តាមរយៈនៃដំណើរទៅទស្សនកិច្ចផ្លូវការ និងមិត្តភាព របស់ លោក ឧត្ដមសេនីយ៍ឯកបម្រុង ផាន វ៉ាន់ហ្សាង រួមនឹងសមាជិកប្រតិភូនៅលើទឹកដីកម្ពុជាលើនេះ លោកវង្ស ពិសេន បានស្មើដល់លោក អនុរដ្ឋមន្ត្រីការពារប្រទេស និងជាប្រធានអគ្គសេនាធិការកងទ័ពប្រជាជនវៀតណាម ឲ្យបន្តជួយបណ្ដុះបណ្ដាលធនធានមនុស្សដល់កងយោធពលខេមរភូមិន្ទបន្តទៀត និងជួយផ្ដល់នៃការសាងសង់អាគារសាលប្រជុំមួយកន្លែង ដែលអាចចំណុះមនុស្សបានចំនួន ៥០០ នាក់ នៅក្នុងអគ្គបញ្ជាការដ្ឋាន រួមនឹងការកសាងនូវសំណង់និមិត្តរូប នៃការរឹតចំណងសាមគ្គីភាព មិត្តភាព រវាងប្រទេសទាំងពីរ នៅតាមបណ្ដាខេត្តជាប់ព្រំដែនផងដែរ។ ជាការឆ្លើយតប លោក ឧត្តមសេនីយ៍ឯកបម្រុង ផាន វ៉ាន់ហ្សាង បានទទួលយក នូវរាល់សំណើរបស់ភាគីអគ្គមេបញ្ជាការ នៃកងយោធពលខេមរភូមិន្ទ ដើម្បីរាយការណ៍ជូនថ្នាក់ដឹកនាំក្រសួងការពារប្រទេសវៀតណាម ក្នុងការពិនិត្យ នឹងផ្តល់លទ្ធភាព ដោះស្រាយជូនដល់ភាគីមិត្ត នៅពេលដែលលោក និង គណ:ប្រតិភូ និវត្តន៍ទៅដល់ប្រទេសវៀតណាមវិញ៕
