សម្តេចតេជោ ហ៊ុន សែន អញ្ជើញជួប លេខាធិការគណៈកម្មាធិការបក្សកុម្មុយនីស្តចិនខេត្តយូណាន
ភ្នំពេញ៖នៅព្រឹកថ្ងៃចន្ទ ទី ១៨ ខែវិច្ឆិកា ឆ្នាំ២០១៩នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជួបពិភាក្សាការងារជាមួយ លោក DU Jiahao សមាជិកគណៈកម្មាធិការមជ្ឈឹមបក្ស និងជាលេខាធិការគណៈកម្មាធិការបក្សកុម្មុយនីស្តចិនខេត្តយូណាន នៅវិមានសន្តិភាព។
សម្តេចតេជោនាយករដ្ឋមន្ត្រីបានស្វាគមន៍យ៉ាងកក់ក្តៅចំពោះគណៈប្រតិភូ ដែលបានអញ្ជើញមកកម្ពុជាតាំងពីថ្ងៃទី១៥ រហូតដល់ថ្ងៃទី១៩ វិច្ឆិកា នេះ ។ លោក DU Jiahao បានថ្លែងអំណរគុណចំពោះសម្តេចតេជោ ដែលបានផ្ដល់ឱកាសឲ្យរូបលោកបានដឹកនាំគណៈប្រតិភូ ចូលជួបសម្តែងការគួរសម។ លោក DU Jiahao បានជម្រាបជូន សម្តេចតេជោ ថា លោក បានធ្វើការជួបសំណេះសំណាលជាមួយថ្នាក់ដឹកនាំក៏ដូចជាមន្ត្រីនៅថ្នាក់មូលដ្ឋានក្នុងខេត្តបាត់ដំបង និងខេត្តសៀមរាប រួចមកហើយដែរ។ តាមរយៈការសំណេះសំណាលនេះលោក បានយល់អំពីការដឹកនាំគ្រប់គ្រង និងជំនឿទុកចិត្តចំពោះការដឹកនាំរបស់រាជរដ្ឋាភិបាលកម្ពុជាដើរលើមាគ៌ាដ៏ត្រឹមត្រូវមួយ ក្រោមការដឹកនាំរបស់សម្ដេចតេជោ នាយករដ្ឋមន្ត្រី ប្រធានគណបក្សប្រជាជនកម្ពុជា ដែលបានធ្វើឲ្យប្រទេសជាតិកាន់តែរីកចម្រើន។
ជាមួយគ្នានោះផងដែរ លោក DU Jiahao ក៏បានពាំនាំការផ្តាំផ្ញើសួរសុខទុក្ខពី លោកប្រធានាធិបតី Xi Jinping និង លោកនាយករដ្ឋមន្ត្រី Li Keqiang ជូនចំពោះសម្តេចតេជោនាយករដ្ឋមន្ត្រី។ ទន្ទឹមនឹងនេះ លោក DU Jiahao សូមថ្លែងអំណរគុណ សម្ដេចតេជោ ហ៊ុនសែន ដែលបានអញ្ជើញទៅប្រទេសចិនចំនួន២ ដងនៅក្នុងឆ្នាំ ២០១៩ ហើយកន្លងមកនេះហើយថ្មីៗនេះ សម្ដេចតេជោ ក៏បានជួបនៅជាមួយនឹងលោកនាយករដ្ឋមន្ត្រី Li Keqiang នៅទីក្រុងបាងកកប្រទេសថៃផងដែរ។
លោក DU Jiahao បានបញ្ជាក់ថាប្រទេសចិន និងប្រជាជនចិនបានចាត់ទុក សម្ដេចតេជោនាយករដ្ឋមន្ត្រី និងប្រទេសកម្ពុជាជាមិត្តល្អ មិត្តចាស់ មិត្តដែកថែប មានទំនាក់ទំនងល្អណាស់ និងមានកិច្ចសហប្រតិបត្តិការគ្នាល្អ។
នៅក្នុងទស្សនកិច្ចនៅកម្ពុជាប៉ុន្មានថ្ងៃនេះ លោក DU Jiahao មានចិត្តសប្បាយរីករាយដោយឃើញកម្ពុជា ទើបនឹងបានប្រារព្ធខួបលើកទី៦៦ ឆ្នាំនៃឯករាជ្យជាតិ ប្រកបដោយជោគជ័យសប្បាយរីករាយ ហើយទឹកមុខប្រជាពលរដ្ឋសប្បាយរីករាយ មានជីវភាពធូធារ រស់នៅក្នុងសន្តិភាព ដែលបង្ហាញពីជំនឿនិងទំនុចិត្តលើការដឹកនាំរបស់ សម្តេចតេជោនាយករដ្ឋមន្ត្រី។
លោក DU Jiahao បានជម្រាបជូន សម្តេចតេជោនាយករដ្ឋមន្ត្រីអំពីខេត្តយូណាន ដែលមានប្រជាជនដល់ ៧០លាននាក់។ ខេត្តនេះ គឺមានផលិតនូវគ្រឿងចក្រ និងឧបករណ៍ល្បីៗ ដូចជារថភ្លើងក្រោមដី រថភ្លើងល្បឿនលឿន សម្ភារៈសម្រាប់បម្រើក្នុងការកសាងរចនាសម្ព័ន្ធ ក៏ដូចជាក្នុងវិស័យកសិកម្មដែលអាចសហការល្អជាមួយនឹងប្រទេសកម្ពុជា ហើយនឹងជួយហេដ្ឋារចនាសម្ព័ន្ធ ព្រមទាំងវិស័យកសិកម្មនៅកម្ពុជាទៀតផង។ លោក DU Jiahao បានស្វាគមន៍ចំពោះទំនិញកម្ពុជានាំទៅកាន់ប្រទេសចិន រួមទាំងទៅខេត្តយូណាន ពិសេសជាទំនិញម្ហូបអាហារ និងផ្លែឈើជាដើម។
លោក DU Jiahao ក៏បានបញ្ជាក់ផងដែរថា លោកនឹងជួយផ្សព្វផ្សាយការរីកចម្រើនរបស់ប្រទេសកម្ពុជាទៅដល់ប្រជាជនចិន និងខេត្តយូណាន ហើយនឹងបន្តជំរុញឲ្យខេត្តយូណានពង្រឹងនិងពង្រីកកិច្ចសហប្រតិបត្តិការ និងទំនាក់ទំនងកាន់តែល្អថែមទៀត ព្រមទាំងបន្តជួយគាំទ្រដល់ប្រទេសកម្ពុជាទៀតផង។
ជាមួយគ្នានោះដែរ លោក DU Jiahao បានគោរពសូមអញ្ជើញ សម្ដេចតេជោនាយករដ្ឋមន្រ្តីទៅបំពេញទស្សនកិច្ច នៅខេត្តយូណាន ប្រសិនបើជាសម្ដេចអញ្ជើញទៅទស្សនកិច្ចនៅប្រទេសចិនលើកក្រោយនេះ។
ជាការឆ្លើយតប សម្ដេចតេជោ ហ៊ុន សែន នាយករដ្ឋមន្ត្រី បានមានប្រសាសន៍ថ្លែងអំណរគុណ ចំពោះគណប្រតិភូចិន ដែលបានពាំនាំការផ្តាំផ្ញើសុខទុក្ខពី លោកប្រធានាធិបតី Xi Jinping និង លោកនាយករដ្ឋមន្ត្រី Li Keqiang ហើយសម្ដេចតេជោ បានចាត់ទុកថាទស្សនកិច្ចកន្លងទៅរបស់លោក DU Jiahao ខេត្តបាត់ដំបង និងខេត្តសៀមរាបគឺបានធ្វើឲ្យ លោក បានយល់ដឹងកាន់តែច្បាស់អំពីការដឹកនាំ និងការខិតខំប្រឹងប្រែងរបស់ គណបក្សប្រជាជនកម្ពុជា។ ទន្ទឹមនឹងនេះ សម្ដេចេជោមានប្រសាសន៍ថា ជោគជ័យរបស់ គណបក្សប្រជាជនកម្ពុជា កន្លងមកនេះគឺជាការយកចិត្តទុកដាក់របស់សមាជិកបក្ស ធ្វើយ៉ាងណាឱ្យសមាជិកមានទំនុកចិត្ត មានអារម្មណ៍ល្អ សាមគ្គីភាពផ្ទៃក្នុង និស្មោះត្រង់ ដែលបានប្រែក្លាយសមាជិកបក្សម្នាក់ជាសន្លឹកឆ្នោតមួយដល់បក្សផងដែរ ។
សម្ដេចតេជោនាយករដ្ឋមន្ត្រី បានយល់ព្រមតាមសំណើ លោក DU Jiahao ទៅចូលរួមទស្សនកិច្ចនៅ ខេត្តយូណាន ប្រទេសចិនក្នុងពេលដ៏សមរម្យណាមួយនាពេលខាងមុខ។
ឆ្លៀតនៅក្នុងឱកាសនេះដែរ សម្ដេចតេជោ ហ៊ុន សែន នាយករដ្ឋមន្ត្រី បានអបអរសាទរសាជាថ្មីចំពោះខួប ៧០ឆ្នាំនៃការបង្កើតសាធារណរដ្ឋប្រជាមានិតចិន ក្រោមការដឹកនាំរបស់ គណបក្សកុម្មុយនីស្តចិន។ ទន្ទឹមនឹងនេះដែរ សម្ដេចតេជោ ក៏បានបញ្ជាក់ថានៅថ្ងៃទី៤ ធ្នូ ខាមុខនេះ កម្ពុជានឹងចាប់ផ្ដើមចរចាលើកិច្ចព្រមព្រៀងពាណិជ្ជកម្មសេរី រវាងចិនកម្ពុជា ដែលទាំងអស់នេះនឹងផ្ដល់ផលប្រយោជន៍ កាន់តែច្រើនដល់ប្រជាជាតិនៃប្រទេសទាំងពីរ ហើយក៏មិនគ្រាន់តែជាផលប្រយោជន៍សេដ្ឋកិច្ចប៉ុណ្ណោះទេ ប៉ុន្តែក៏ជាផលប្រយោជន៍សម្រាប់នយោបាយនៃប្រទេសទាំងពីរផងដែរ៕
